湯告魯斯早前同老婆姬蒂離婚，情場失意，但職場有新意。本身佢有幾套動作片揸手，嚟緊將會拍《職業特工隊》第 5集， keep住有排忙。
來路貨
我冇講過我夠高
我要幫湯告魯斯平反。
新作《烈探狙擊》，根據英國人氣小說改編而成。小說主角本身昂藏 6呎 5吋；但飾演佢嗰位（即係湯告魯斯），俾到盡只係得 5呎 7。
反差咁大，上至影評下至粉絲，全部有微言。
不過嘥氣啦，正如特首冇講過冇僭建，湯佬由始至終都冇講過佢夠高飾演，大家係吹佢唔脹，掹佢唔長。
主角高度差異，當然不能單靠一句「嘥氣」平息風波啦。湯告魯斯（ Tom Cruise）墊定底，講明原著作者如果唔 alright，佢絕對會辭演。另一邊廂，原著作者李查特（ Lee Child）亦出言力撐：「你搵其他演員做，可以得到 100%嘅高度、 90%小說主角嘅神髓。但如果係湯告魯斯，你會有 100%神髓、 90%高度。」
事實上，係 87%先啱。不過賣文字，善修飾，正常嘅。如果唔係，作品點會賣個滿堂紅？
原著小說 1997年面世，由於反應熱烈，作者極速斬多幾両，至今已經出版 17本之多。整個系列被翻譯成 40種不同語言，售出 6千萬冊，更勇奪推理小說最高殊榮 Anthony Awards，被譽為現代版嘅《福爾摩斯》。
反派由 Jai Courtney（右）飾演， Jai雖然係奀星，但遲下會參演《虎膽龍威》第 5集，飾演布斯韋利士個仔。
動作、飛車場面大多數由湯佬親自負責。佢更另外花咗 4個月苦練「奇斯格鬥術」，打起上嚟零舍逼真。
追擊冷血兇手
《烈探狙擊》（美國、香港 12月 20日同步上映）改編自系列第 9部作品《完美嫌犯》（ One Shot）。劇情講冷血殺手隨街掃射，令 5人喪生。警察迅速緝拿疑兇歸案。不過疑犯死口唔認，仲叫警方搵 Jack Reacher（湯告魯斯）破案。
Jack Reacher何方神聖？原來阿 Jack曾效力美軍，退役後浪跡天涯，四出偵破奇案。今次阿 Jack連同男差人、女律司一齊追查真相，點知愈查愈黑暗，最後更身陷險境。
疑犯向群眾亂槍掃射，被警方扣查。但佢死口唔認罪，為證清白，要求警方搵湯佬破案。
槍擊事件疑點重重，湯佬專登搵神槍手（右）幫拖。神槍手一角由《教父》老戲骨羅拔杜維飾演，老一輩嘅觀眾應該有親切感。
女主角有前邦女郎露莎蒙碧姬，戲中佢飾演女律師，同湯佬由初時嘅針鋒相對發展到惺惺相惜。不過後來難逃厄運，被奸角擄走（右圖）。
口碑不俗
電影早前舉行試映，口碑不俗。影評話古仔簡單直接，動作、飛車場面極盡官能刺激，並大讚湯佬表現稱職，身手敏捷絕對唔似 50歲。當然，有死硬派始終認為湯佬身高跟原著有出入。計我話，當掌摑變成「輕撫你的臉」嘅時候，做人又何必咁斤斤計較呢。
警察以為已經捉到槍擊手，誰不知食詐糊，最終迫住同湯佬合作追兇。
導演 Christopher McQuarrie（左）以寫劇本為主，作品《非常嫌疑犯》、《華爾基利暗殺行動》均備受推崇。來年佢將會為《壯志凌雲》續集、《職業特工隊》第 5集寫劇本，可以話係影壇新貴。
《烈探狙擊》上周一（ 10日）於倫敦舉行首映禮。呢一次，係湯佬離婚後首次踏足紅地氈。當日佢同拍檔有講有笑，心情相當不錯。
留言列表
