尷尬影合照
記者起哄下，楊怡和羅仲謙亦終於起身影合照，其間二人表情十分尷尬。
滾熱辣
搵神婆擇吉日 楊怡羅仲謙 9月結婚
33歲楊怡和 28歲羅仲謙的姊弟戀愈來愈浮面，羅仲謙上周日（ 2日）於大馬奪男配角獎時，忍唔住公開多謝楊怡，搞到台下觀眾起哄催婚。
本刊收到消息，上月羅仲謙帶埋楊怡，秘密幫襯睇三世書的批命師娟姐，羅更叫娟姐擇定下年吉日，話要辦喜事。
上周二（ 4日），記者放蛇向娟姐求證，她說：「羅仲謙帶阿怡上嚟，問我幾時和合（結婚），我話出年九月囉！」事業心重的楊怡和羅仲謙，被記者追問結婚一事時，二人亦轉晒口風。羅仲謙話：「緣份到就結。」楊怡亦和應：「隨緣啦！最緊要開心。」未結婚已經夫唱婦隨，認真 sweet。
楊怡羅仲謙前後腳返港
本刊曾踢爆羅仲謙今年初秘訪出名睇三世書的娟姐，更攞埋楊怡的時辰八字夾姻緣。事後羅仲謙例牌否認報道，他說：「我唔會咁快結婚，想再衝刺多幾年先。」
娟姐：阿怡好旺佢
話口未完，本刊收到消息，指羅仲謙上月再度幫襯娟姐，今次更不避嫌帶埋楊怡一齊上去。目擊者說：「嗰陣係夜晚十點幾，娟姐嗰度得番我一個客，都準備收工㗎喇。點知突然有人 㩒鐘，抬頭望就見到係羅仲謙同楊怡。佢哋一上嚟就直衝入房！」據知當時羅仲謙除帶楊怡上去俾娟姐贈言幾句外，主要目的是想娟姐為他們的婚事擇定吉日。知情人士說：「羅仲謙提議咗三個日子俾娟姐夾，全部都係出年農曆新年之後，問究竟邊日搞喜事最利佢哋喎！」
助手兩份用
記者發現楊怡出閘時，羅仲謙的助手不時陪伴在側。而當日祝捷會完畢後，羅的助手又做回自己工作崗位，護送羅返大埔屋企。
刻意分開坐
上周二（ 4日），無綫吹雞藝員大晒冷，有份出席的楊怡和羅仲謙就刻意分開坐，坐喺中間的謝天華亦忍唔住說：「我使唔使行開一陣！」
遙距偷望
上周一（ 3日），楊怡和羅仲謙由大馬返港，現場有極多 fans接機，二人亦夾埋一先一後出閘，不過記者發現羅仲謙不時偷望楊怡。
車震訂終生
「車震事件」發生後，羅仲謙和楊怡立即齊齊開記招否認，楊怡更讚羅是「信得過嘅人」。據知二人感情亦因此事更加穩定。
上周二（ 4日），記者放蛇到娟姐位於佐敦的神壇，就羅仲謙和楊怡擇日結婚一事向娟姐求證。她起初支吾以對，以極唔純正的廣東話說：「我唔知邊個明星，我唔使記住人個名……（拍劇嗰位羅仲謙喎？）哦！羅仲謙好靚仔，好好人。佢問我幾時和合好呀！我話出年九月啦！佢帶埋嗰個做電視嘅女仔，叫阿……阿怡，好靚女，好旺佢，邊個黐到佢（楊怡），事業一定發展得好好。」之後記者進一步再問當時情況，但娟姐就決絕說：「唔好講咁多人哋嘅嘢，總之佢哋好好人㗎！」
羅仲謙和楊怡拍拖只有年半，但已經到談婚論嫁階段，發展神速緣於早前的疑似「車震」事件。今年九月，一直偷偷摸摸的羅仲謙和楊怡，被《蘋果日報》拍得二人深宵疑似「車震」 40分鐘，震驚電視城。向來擔心戀情影響事業的楊怡，更因此報道而崩潰。楊怡密友說：「佢哋開始嗰陣，阿怡都驚謙仔會玩玩吓。不過『車震』發生之後，阿怡先覺得謙仔處事成熟，同埋好保護到佢。」二人共度患難，亦令他們認定對方為終生伴侶。
隔空打情罵俏
上周一（ 3日），楊怡和羅仲謙於機場富豪酒店出席祝捷會，對於搵捐姐擇吉日一事，二人雖然否認，但提到結婚，二人口徑一致，話有緣就會結。
結婚隨緣啦
緣份到就結
上周一（ 3日），羅仲謙與楊怡和其他藝人大隊由馬來西亞返港。出閘時，二人刻意保持距離，楊怡一馬當先，而羅仲謙則全程留後。不過記者發現羅仲謙為照顧女友，竟派出女助手傍實楊怡出閘外，更吩咐女助手幫埋楊怡推行李，認真細心。之後二人前後腳步行到機場旁邊的酒店出席祝捷會，記者於是把握時機，就結婚一事訪問二人。
記：記者 羅：羅仲謙
記：經過「車震」事件，同楊怡嘅感情係咪再進一步呀？
羅：（語氣堅定）係！上次件事令我同佢更加互相支持，大家多咗了解！
記：係咪諗住結婚喇？
羅：婚姻係一種緣份，緣份到就結。
記：知道你最近搵咗娟姐擇日喎？
羅：唔…唔…我唔信呢啲嘢！
記：介唔介意老婆年紀大過你同搵錢多過你？
羅：我唔係一個大男人，我係傳統但思想唔守舊，總之搵到個人，大家溝通到，其他嘢都係小問題。我會努力，但唔會強求自己一定要賺到好多錢先去娶老婆！
記：你驚唔驚結婚影響事業？
羅：緣份係上天安排，話之自己係唔係搏殺期。
羅仲謙暗示結婚隨時都得。於是記者將他這一番話，轉述俾楊怡聽，楊怡聽後不時冧笑。
記：記者 楊：楊怡
記：咁你又有冇諗結婚呀？
楊：暫時冇諗住呀！繼續努力工作先啦……哎吔！隨緣啦！（忽然轉口風）
記：介意老公年紀細過你同搵錢少過你嗎？
楊：呢啲唔緊要，最緊要大家一齊開心，溝通到就得，其他嘢唔係問題。（與羅仲謙口徑一致）
記：去咗睇娟姐喎？
楊：我唔係好信呢啲嘢，最近都冇乜喜事呀！你做專訪呀！（忽然寸嘴）
記：問多一句啦！羅仲謙攞獎嗰陣話《 On Call 36小時》帶俾佢人生最重要嘅事物喎！
楊：（撒嬌）我都唔係一件物件，我係一個人嚟㗎！我唔知佢係咪講緊我喎！你問番佢啦！
羅父羅母讚準新抱
訪問中，羅仲謙自言是一個傳統男人，其實他自小父母就離異，所以他比起一般完整家庭長大的人，更渴望擁有一個幸福家庭。雖然羅仲謙和楊怡處於半同居狀態，男方經常到女方位於將軍澳領都的香閨過夜，但他有時亦會返回大埔舊居，與父親共聚天倫。 49歲的羅父現時於大埔舊墟一間平民髮型屋工作，洗剪吹一腳踢。上周二（ 4日），記者幫襯過羅父的髮型屋，提到阿仔拍拖結婚，羅父說：「吓！佢都未同我講，佢都冇帶過個女仔返嚟俾我睇，淨係電視見到咋！不過仔大仔世界，呢啲嘢都管唔到，但我都覺得個女仔幾靚女，應該都係好女仔嚟！」
至於今年 46歲的羅母，雖已另組新家庭，但為了爭取與阿仔見面機會，仍堅持於大埔開美容院搵食。對於羅仲謙和楊怡的婚姻大事，她說：「佢都咁大個仔，最緊要佢鍾意。（好似就快結婚喇喎！）呢啲佢哋自己安排，我唔方便講得咁多。做得人阿媽當然想個仔成家立室啦！」
據知楊怡與羅仲謙下年 5月時，完成新劇《 On Call 36小時Ⅱ》後，就未有新工作安排，看來二人為這場婚事，真係部署嚴密呀！
羅父：佢係好女仔
羅仲謙父親現時於大埔舊墟做髮型師，上周二（ 4日），他為記者剪髮時手起刀落。其間記者提到楊怡，羅父說：「佢係好女仔。」
羅母：想佢成家立室
羅仲謙母親雖然經已 46歲，但樣貌和身形保持不俗，現於大埔一商場開設美容院，做街坊生意。對於阿仔結婚，羅母開心對記者說：「想佢成家立室。」
楊怡和胞姊楊卓娜的感情深厚，提到楊怡結婚一事，楊卓娜周二（ 11日）出席活動時說：「我唔知呀！我自己都未擺酒啦！」以自己私事來維護胞妹，認真夠義氣。
無綫製作資源部總監樂易玲亦承認楊怡拍埋《 On CallⅡ》就未有新劇，她說：「咁阿怡都好多嘢要做！（結婚？）你俾佢哋多啲時間拍下拖先啦！」
同屬星皓旗下的羅仲謙和傅穎，二人去年由愛變恨。本刊曾致電傅穎，但截稿前仍未獲回覆。
$300睇通三世
娟姐神壇位於佐敦寶靈街，由於她素來低調，故此大堂和正門均不設招牌，只在門鈴位置貼上「娟姐」二字，極唔起眼。
娟姐專長睇三世書，只要客人提供出生日期和時辰，她就會一輪嘴分析客人前世、今世和後世的重要事，甚至今世點死都知。娟姐每次講大約二十分鐘，而收費亦悉隨尊便，客人只要封利是就得，但至少三百蚊起錶。
據知已過身的沈殿霞和梅艷芳曾是娟姐熟客，而娟姐 09年亦曾點化關菊英母親，叫她接受女兒轉性的事實。
娟姐親證
上周二（ 4日），娟姐向記者親證羅仲謙和楊怡有搵她擇日結婚。
進展神速
去年， 33歲的楊怡與細她 5年的羅仲謙因拍劇撻 着，男方頻頻出招，而已到適婚年齡的女方亦鬼咁進取。二人愛得零舍癡纏，拍拖年多已談婚論嫁，關係突飛猛進。
11年 8月撻 着
二人合作劇集《 On Call 36小時》撻 着，火速發展。羅首次出招，暗地通知劇組台前幕後，於錄影廠為楊舉行驚喜生日會。女方 冧爆於微博話︰「多謝謙謙，今年生日好難忘，一點也不覺寂寞，好充實！」姊弟戀曝光。 
11年 10月熱戀
去年萬聖節當日，羅駕車接楊到大尾篤 BBQ，更特別挑選水壩旁的暗角位起爐，二人黐埋一齊坐，愈燒愈埋，態度親暱。玩到凌晨五時多，羅才駕車送女友返回將軍澳寓所。 
《壹週刊》圖片
今年 6月同居
去年尾，楊以 617萬購入將軍澳領都千三呎單位，之後羅便被拍得戴住口罩，自出自入。有指二人秘密同居半年，之後男方被拍得深夜到訪女方香閨，至翌日下午才離開，駕車返電視台。 
留言列表
