有正戲
聖誕新年打餐飽 偉仔單挑發哥成龍
以往聖誕、新年檔期例牌係外語片天下，好似舊年華語片得套 3D《龍門飛甲》硬撼，不過得 500萬票房蝕入肉。
好囉好囉，今年終於有四套華語片出籠為華人爭光，仲要套套由頭打到落尾。不過睇落幾乎個個演員都 5字頭，當中有半百朝偉、花甲成龍同發哥，仲要整多件 啱 啱過 50歲生日 嘅靚佬湯。老馬有火，索性湊夠腳，搵埋志偉切磋武技啦！
《一代宗師》
◆導演：王家衞
◆演員：梁朝偉、章子怡、宋慧喬、張震、趙本山
◆上映日期： 12年 12月 27日
劇情梁朝偉飾演 嘅詠春宗師葉問，同武林各派連場激鬥。雖然有個正室宋慧喬，不過就同張震齊齊對武林高手章子怡嗒糖。
忽評由籌備到上畫足足用咗 10年時間，拍傳記都唔使咁耐啦。況且同《一》片鬥雙胞嘅甄子丹版《葉問》續集都上映 咗兩年。老實講偉仔做葉問打功夫，睇怕有姿勢冇實際，不過咁，班師奶客可能會 buy㗎，事關有 cctvb式嘅四角戀情節囉！ 
《大上海》
57歲
文強再現
◆導演：王晶
◆演員：周潤發、洪金寶、黃曉明、吳鎮宇
◆上映日期： 13年 1月 3日
劇情由發哥飾演嘅黑幫老大，喺大上海打拼嘅真實經歷，而黃曉明就飾演發哥 嘅年輕版。
忽評周潤發同黃曉明兩代「許文強」互相較量，一個真好戲，一個真係 chok。唔使多講都知幾大對比，又難怪呢套戲要用大量槍戰同爆炸場面嚟轉移觀眾視線。 
《十二生肖》
◆導演：成龍
◆演員：成龍、權相佑、姚星彤、張藍心
◆上映日期： 12年 12月 20日
劇情成龍自導自演嘅奪寶片，佢飾演嘅私家偵探，為攞巨額獎金，周圍搵圓明園十二生肖中失散咗嘅最後四個獸首。
忽評標榜用 3億人民幣，去 咗巴黎、澳洲拍外景，仲話係成龍最後一套功夫片。可惜套戲一味 close up成龍七情上面跳 嚟跳去，冇乜靚景睇。雖然有權相佑坐鎮，但成龍先係主角。咁重口味加愛國味濃，自認係中國人嘅香港人先好去睇。
58歲
收山之作
《血滴子》
◆導演：劉偉強
◆演員：黃曉明、阮經天、余文樂、李宇春
◆上映日期： 13年 1月 3日
劇情由阮經天領軍 嘅清朝秘密殺人部隊「血滴子天團」，接到雍正命令，要剷除前朝革命分子「天狼」黃曉明，最後失手遇害。
忽評 N年前《滿清十大酷刑》已經夠恐怖，呢套片仲加插更多重口味環節。除有雷凱欣式人體炸彈外，仲有痛過「五馬分屍」 嘅「五牛分屍」。血腥變態溝片愛好者心水之選。 
血肉橫飛
《吸血新世紀 4破曉傳奇下集》
◆導演：比爾干頓
◆演員：羅拔柏 廸臣、姬絲頓史釗域、泰勒洛特
◆上映日期： 12年 12月 20日
劇情上集講到男女主角愛德華同貝娜終於修成正果生咗個女。今集講班外地殭屍齊齊搵佢 哋一家人尋仇，大家就出盡全力保護半人半殭屍 嘅囡囡 Renesmee。
忽評上集睇住貝娜由慾婦變道姑，一狼一屍婆婆媽媽 咗成集，觀眾忍 咗咁耐，貝娜最後終於變殭屍。大結局，由浪漫愛情故事，筆鋒一轉變成妖獸大亂鬥，真係估你唔到囉！
狼屍混戰
《孤星淚》
慘絕人寰
◆導演：湯賀柏
◆演員：安妮夏菲維、曉治積曼、羅素高爾
◆上映日期： 12年 12月 25日
劇情背景設定 喺法國大革命之後，曉治積曼飾演 嘅窮苦農民，成功逃獄後遇上安妮夏菲維飾演 嘅女工。安妮為養女賣牙賣頭髮仲賣埋肉，不過最後都病死，留低孤女。
忽評《孤星淚》呢類名著改編電影，一向都係荷里活紅星發財立品之作。而靚女安妮夏菲維仲要開金口唱「靚聲村姑」成名作〈 I Dreamed a Dream〉。星光熠熠，可惜香港人對歌劇一向麻麻。
《哈比人-不思議之旅》
◆導演：彼德積遜
◆演員：伊恩麥基倫、馬田費曼、姬蒂白蘭芝
◆上映日期： 12年 12月 13日
劇情《哈比人-不思議之旅》係《魔戒三部曲》 嘅前傳。故事係講番六十年前，《魔戒》男主角佛羅多個阿叔比爾博巴金斯，加入矮人軍團去討伐巨龍，其間遇上妖精咕嚕同寶物「魔戒」，從此改變一生。
忽評導演彼德積遜拍《魔戒》系列後名利雙收，之後拍過乜？最新 嗰套叫做《丁丁歷險記》，冇乜人識。今集雖然又係講番隻戒指同班小矮人，但作為苦等 11年 嘅粉絲，套戲講乜？ Who cares！
粉絲必選
《烈探狙擊》
例牌湯佬
◆導演：基斯杜化麥戈里
◆演員：湯告魯斯、羅拔杜維
◆上映日期： 12年 12月 20日
劇情英國作家 Jim Grant筆下著名幹探系列，講飾演獨斷獨行 嘅警察湯告魯斯，捲入一宗冷血殺人事件後，遭連串追殺。
忽評靚佬湯年屆 50，依然老當益壯，拳腳肉搏、擒高爬低、飛車槍戰等，今次依然係特工動作片，究竟同《職業特工隊》有乜分別？有，靚佬湯離婚前同離婚後囉。 
留言列表
