close
BIGBANG五子坐住有自己個名嘅「太空艙」出場，又 chok到行擺 pose，粉絲當然嗌到拆天，媽咪姐差啲聾咗！
左起： T.O.P.、大成、太陽、 G-Dragon、勝利
媽咪姐
萬千星輝賀 BIGBANG
韓國熱爆男子組合 BIGBANG強勢來港，媽咪姐與時並進㗎嘛！梗係跟足三晚，企到腳仔都軟呀。
晚晚都有唔少圈中藝人捧場，好似鄭伊健、梁漢文、蔡卓妍、容祖兒、周秀娜與男友 Avis，仲有方大同同薛凱琪等，勁多星睇！開騷期間，粉絲紛紛揮舞官方「王母燈」，全場形成一片燈海，而 BIGBANG五子又學番幾句廣東話同英文勁𠱁歌迷，難怪有好多粉絲同媽咪姐講，冧到頭暈呀！講真吖， BIGBANG真係跳得睇得（手臂差啲粗過媽咪姐大髀呀！），啲歌又夠 power，香港班歌星蝕晒囉！
假眼仔
最紅嘅 T.O.P.帶住假眼 con，踩住德國名牌 MCM版滑板車唱歌，型囉！
晒紋身
太陽唔係最紅，但一定係最搏！件衫開大 V，不過唔係露胸，係露腰側嘅紋身，估佢唔到呢。
天后容祖兒同阿 Sa都到場取經！但陪住佢哋嘅並唔係另一半。哎吔！少咗好多嘢睇囉。
梁漢文帶埋老婆 Karen睇騷，仲齊齊着紅衫，好有 heart。
估唔到 45歲嘅伊健都 keep住步伐睇 BIGBANG，但就無預女友蒙嘉慧，反而搵助手陪睇。
啲妹妹仔粉絲睇到 high晒，但周秀娜就睇到嘟晒嘴，好似唔多 enjoy！ Avis要諗計𠱁吓女友嘞。
全站熱搜
留言列表
