孖住波友阿彬煲煙睇豪宅，余文樂手上戴住的 Audemars Piguet Royal Oak Offshore 44mm Chronograph手錶，是去年的款式，市價$285,000。
探熱針
霆鋒掃二億地鋪 余文樂跟睇四千萬豪宅
出名投資有道的謝霆鋒，早於○五年已經在中環落釘買鋪做包租公，上月中，再豪花二億入市，買入擺花街兩個相連地鋪，富貴逼人。
至於被謝霆鋒藐爆拒合作的余文樂，自從成為郭富城、沈嘉偉等有米人的鐵膽玩樂飯腳後，靚車買完一部又一部，努力 upgrade做上等人，兩年無入市的他，緊隨霆鋒後，四出睇樓準備郁手。
上星期，余文樂孖住波友阿彬專程入赤柱，到區內唯一放盤的歌敦臺睇頂樓連天台無敵海景單位，即使唔似霆鋒入貨以億元起跳，余文樂睇得上眼的，都要四千萬，過去半年，收入二千萬的他，供得起。
煙駁煙睇樓
今年六月，被踢爆同模王璐瑤（ LuLu）互傳情慾短訊後獲封「機機樂」的余文樂，剛在內地拍完三十集電視劇《玲瓏局》，上星期二（八月十四日），余文樂揸住四驅王載着「橫洲工業」籃球隊波友阿彬同到赤柱，兩人先往附近巡地產鋪，在門外煲煙研究樓盤廣告。
一名男經紀主動遞上宣傳單張力 sell，余文樂毫無反應，到另一名女經紀上前招呼，三兩下手勢就氹掂他到位於佳美道的歌敦臺睇樓。
一行人先睇一個千八呎連天台、三房兩廳無敵海景單位，煙駁煙的余文樂對該單位頗感興趣，在屋內逗留超過廿分鐘，之後再上天台 hea多十分鐘才走人。之後經紀再帶他們睇另一個單位，余文樂循例行個圈便離開。
據了解，余文樂所睇的無敵海景單位，開價四千萬，可租可售。
「歌敦臺有四十八年樓齡，業主放盤都好一段時間，聽啲行家講，余文樂嗰日話搵樓買嚟投資。」區內一名地產經紀說。
清潔工人捱熱掃地，余文樂竟丟煙頭落地，自私！
余文樂對三樓連天台的單位情有獨鍾，在天台扯住煙聽經紀講解環境，再走到露台視察四周。
余文樂所睇的三樓連天台單位，間隔實用，最吸引莫過於天台擁有無敵海景。
余文樂 𥄫中的佳美道歌敦臺，已有 48年樓齡，是區內僅有放盤。
人買你又買，你有冇我咁好眼光先？（設計對白）
三級片發圍
攝到靚位上
昔日同陳冠希爭 job再爭女，自從死敵發生淫照事件一沉不起，余文樂趁無對手加上影圈缺人攝上位，長拍長有。搵到錢，○五年首次上車做業主，以六百三十六萬買入元朗翠逸雅園與家人同住，之後成功黐到郭富城、沈嘉偉等富貴兵團，買衫買錶買車。一○年將元朗單位售出執二百萬，未幾再先後以六百二十萬買入錦綉花園洋房給家人，並以一千六百二十六萬買入肇輝臺一個千四呎單位自住。
同年主演的《志明與春嬌》收七百萬反應好，余文樂片酬即時升至二百萬，今年續集《春嬌與志明》，香港好收，國內更收近一億，余文樂片酬企上三百萬。
林寶堅尼玩咗一年，上月底余文樂以 81萬買入 Range Rover Evoque的三門 Dynamic Edition越野車。（《蘋果日報》圖片）
被踢爆同模 LuLu（王璐瑤）互傳情慾短訊，余文樂甚至將沖涼中的「毛腳」肉照傳給對方。
八年冇拍電視劇的余文樂，最近以視帝鄭嘉穎三十五萬一集的身價，與台灣的徐潔兒合演《玲瓏局》。
心郁想買鋪
成為沈嘉偉、城城同 Chilam的鐵飯腳，余文樂不時獲三人傳授投資秘訣，去年四月，他們一同前往捧 Chilam首個個人演唱會。
收入大躍進，老友沈嘉偉又不時在投資上提點教路，余文樂蠢蠢欲動入市再做業主。
「近兩年樂仔跟住沈嘉偉、 Chilam炒股都有唔少斬獲，但點都唔夠買磚頭賺得咁多，佢見霆鋒買鋪，眨吓眼就賺幾個開都好心郁，不過班富貴朋友叫佢買多幾間屋先， roll大啲筆錢，先再諗買鋪。佢拍咗個內地劇又賺咗一大嚿，返嚟咪即刻搵樓買，擺錢貶值呀！」余文樂身邊人透露。
開 turbo狂搵，一二年上半年，余文樂已經進賬二千萬，要掃四千萬豪宅，無難度！
留言列表
