龔仁心細仔龔皓，現擔任華懋物業管理部高級經理，月薪十多萬元。 

中環人語

龔仁心細仔　「爆嘴」之謎

龔仁心細仔龔皓，喺公司樓下被「扑爆嘴」，邊度來咁大仇口？數一數，龔家仇口又真係多的是。先係糾纏多年嘅陳振聰，再有打官司時出盡力幫忙、但未有報酬嘅各路人馬，再而有老臣子王禮泉及甜甜契仔張雁坤，各自走出來鬧龔醫生管理不善，情況亂過「亂世佳人」！

上月尾，華懋喺尖東嘅戲院突然結業，激到老臣子王禮泉扎扎跳。（廖健昌攝） 

近月華懋亦多動作，例如突然結束尖東華懋戲院。呢間戲院，一向係王禮泉地盤，雖則連年虧損，但佢每月十五萬顧問費袋袋平安。小宗收到風，王禮泉一直要求 claim番過千萬，費用包括當年佢幫甜甜搵老公嘅交通費！不過收到嘅回覆係：「得一球（一百萬）！」企到咁硬，即係無偈傾。
而家華懋行政總裁個位，已懸空咗半年，曾經有獵頭公司搵咗好多人選俾龔醫生，但佢都用各種各樣嘅理由推咗。佢仲將公司嘅物業、酒店、建築等部門「分割」，每個部門由兩個 CEO共同管理：一個，係遺產管理人羅兵咸嘅職員；另一個，自然就係醫生派系嘅人啦！而龔皓喺公司，亦曾經要求撤走旗下一個商場嘅更亭，要保安多巡邏，結果曾有保安累到暈低。呢啲係咪華懋精神呢，又？

Give me a break　 Topshop進駐中環大件事

上週四，來自英國的 Topshop，殺入中環皇后大道中，與同街的 H&M、 GAP同 A&F開戰。 Topshop今次有備而來，市傳租金每月三百八十萬元，平過月租五百萬嘅 GAP同 H&M，以及七百萬嘅同門 A&F。但在現今 fast fashion的世界，鬥快、鬥平、鬥多，係未夠㗎！ Topshop使出獨家的 personal shopping一招。
原來 Topshop有駐場 stylist，免費幫顧客揀衫兼教 mix and match。小宗有朋友試過服務，預約時， stylist會問定衫褲尺寸、鍾意類型、要去嘅場合，仲強調「唔一定要買」。到試衫嗰日，步入專屬房間，第一件事唔係試衫，而係食 cupcake同飲 champagne！成間房就只 serve一個客，客人可以邊飲香檳，邊試 stylist準備好嘅衫褲。埋單時，一樣房內俾錢，可以避過幾圈「蛇餅」。咁貴賓嘅享受，兼且飲到 wing wing哋，自然買得爽手， Topshop除笨有精呀！

Topshop殺入中環，不少 OL即前往「潮」拜，對面的 H&M亦要推優惠搶客。（嚴寶權攝） 

Stylist（右）提醒身形較肥及矮的 OL，最緊要著高跟鞋，下身要著得深色，上身的衫要攝入褲頭，可以顯得腳長同有線條喎！ 

在 VIP房內，客人可免費享用 cupcake及香檳。

「楷女郎」法庭大戰「韋小寶」

插圖：劉志誠 

楊家誠涉嫌洗黑錢案開始入直路，現階段由專家證人作供，盤問內容技術性兼難消化，聽到大家皺晒眉。但庭上卻另有風景，早前被影到同小小超撐枱腳嘅「楷女郎」梁芳，原來係控方副手。梁大狀初出茅廬，行內名氣一般，今次參與其中，只係負責讀吓 statement，小宗未有機會見識到佢盤人嘅功夫；但佢似乎幾「論盡」，佢部 iPhone無晒電，想用「尿袋」叉電，搞嚟搞去個「尿袋」都無反應，佢搵同事出手，同事好無奈咁話佢知：「你未開機喎！」
至於辯方，楊家誠搵幫過陳奕迅老豆陳裘大打官司嘅資深大律師夏偉志助陣。佢盤問技巧尖銳，喺行內出晒名，但更出名嘅係佢嘅感情生活。絕對講唔上係靚仔嘅佢，有「司法界韋小寶」之稱，佢幾乎拍親拖都會結婚、生小孩，仲話已經唔記得有過幾多段婚姻，但前妻國籍遍及中、英、泰、紐，每次離婚都會俾足贍養費，佢兩年前獲委任為資深大律師，仲公開感謝前妻同現任。一個迷倒「王老五」，一個贏盡女人心，到底喺法庭上，又鹿死誰手呢？

本週消暑

（林志謙攝） 

夏日炎炎，著住套西裝都咪話唔辛苦；學吓呢位仁兄，喺 ifc平台，剝晒衫著短褲，一邊耍功夫，一邊講電話，自然舒暢、實在愉快！

金牙大狀講嘢　 689不得不腳痛

689專門講「雙反話」，睇嚟佢已到咗不得不腳痛嘅臨界點矣。 

「我冇講過我冇僭建」之 689再次親身演繹何謂 double negative，呢一趟佢嘅矛頭指向佔中––「冇可能唔犯法」！專門講「雙反」話，意欲何為？
王國興議員解讀「我冇講過我冇僭建」呢句「雙反話」，認為 689係唔服氣、唔甘心俾人捉到痛腳。新近嘅「雙反」演繹，其層次就更高啦––閃鑠其詞、志在威嚇：試吓佔中吖嗱，睇我會唔會搵差人拉晒你班知法犯法嘅不法分子？
有話唔直講，而要好似哈哈鏡咁講雙反話，佢開口埋口話會開誠布公你又信唔信呢！到咗呢個地步，阿爺有冇 Plan B唔緊要，特區七百萬人，已冇人唔知 689係到咗不得不腳痛嘅臨界點矣。唔好話我哋冇有言在先也！

中環人語迷你版

“我哋今日有唔和平咩？”

估中邊個中環人講呢句說話，送你 PNY「棉花糖」造型 Candy 3.0 Attaché USB(16GB)一件

有意參加者，請於六月十七日 24:00前將答案電郵 mailto:centralman@nextmedia.com小宗只接受電郵，郵寄免問。

本刊員工及直系親屬不得參加。為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。超過一位讀者估中，先到先得，恕不接受上訴。答案及中獎者姓名將於一三年六月二十日本欄揭曉。

上週人語揭曉

“我一知半解下，就把「斯德哥爾摩症候群」寫在電郵裡。”

答案：徐漢光
得獎者： Philip Wong
中獎時間： 1:00pm 5/6/13

廣告時間

你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp： 6829 5929