名氣生活
美人煮婦 鄺美雲
眼前穿圍裙、手執鑊鏟的鄺美雲，跟平日珠光寶氣的富婆形象有點距離，她手起刀落熟練地斬瓜切菜，沒有量杯只憑經驗灑油鹽糖，三扒兩撥不用兩小時便煮好四餸一湯，得戚地說：「男朋友放工，我煮個油豆腐粉絲煲，他不知食得幾滋味。」
看着笑不攏嘴的她，突然明白快樂就係咁簡單！
雖然拍拖只有幾個月，但 Cally與男友一有時間便玩煮飯仔。 
沒有牛眼般大的珍珠耳環及戒指，鄺美雲穿上圍裙成個賢妻咁款。揸住大隻鑊煮南瓜魚翅，既要顧火候又要試味，最難得依然兼顧到靚樣。
豆腐送飯
未拍拖前，鄺美雲十餐有九餐都在外面吃，除非在家中請客，她才自己出手，「平日我負責試味，下廚其實是熟能生巧，我好難跟你講要落幾多匙糖或鹽，好講 sense同 heart，有時工人煮得不夠味，我會忍不住自己炒。其實久不久都要自己入廚，不可完全依賴工人，如果你唔識，對方知你無要求就可以馬虎。」在外面食到好味的餸菜，她都另外再買一份帶給家中傭人，「未食過點知咩叫好食，讓他們試味，他們食得開心，下次又會研究製法。」
盡享榮華，食盡美食的鄺美雲，原來對食要求不高，一碟豉油蒸豆腐，隨時是她一頓晚餐。「世上最美味的食物其實好簡單，豆腐幾蚊一磚，真係平靚正，煮幾分鐘就食得，我用兩磚送一碗白飯添。」
自言有了男友林達民後，多了機會玩煮飯仔增加情趣，還以為她愛浪漫要燭光晚餐心形牛扒，查實她比較實際喜歡煮住家菜，「我打開雪櫃，有什麼就食什麼，他也沒特別要求。但我每餐都一定要有老火湯。」說穿了，原來家常便飯，更能俘虜男人的胃同心。
好刀法 
她親自操刀切豆腐和鹹魚，刀法熟練利落。 
有功架自言煮慣大鑊飯的她，揸起鑊鏟果然有板有眼。
夠心思 
為了令賣相夠靚，她自備餐具外，更用碗把炒飯弄成半圓形。
十歲下廚
三餸一飯一湯：南瓜素翅、鹵水冬菇、蒸豆腐、台式辣腐皮和素鹹魚雞粒炒飯。
Cally有乜煮乜的習慣，源於她童年時捱過窮，家住深水埗，爸爸出外工作，有病的母親及弟弟便要由她照顧，「我十歲就入廚房煮飯俾媽媽同弟弟吃，直到我出外打工。當時屋企好窮，廚房得雞蛋、午餐肉、罐頭同公仔麵，偶爾先有隻雞髀或紅腸。」每日放學，她第一時間要煮飯給有病的媽媽，「後來十二歲時她住南朗醫院，我就一個人由深水埗放學，返山東街屋企，先送飯俾媽媽，然後返去再煮給弟弟吃。」
廚房只有簡單食材，人仔細細的她，已學會花心思以不同煮法煮蛋，「有煎蛋、炒蛋、蒸水蛋，落了蒜蓉、麻油同胡椒炒、甚至跟腐乳一起炒都得，總之口感、層次會不同。單是荷包蛋，半生熟或香口脆邊？真係有好多不同食法。翠華炒公仔麵，廿幾年前我就已經整。」
出素食書
身為佛光會會長， Cally偶然都跟其他大師姐一起煮飯慰勞義工。這日她就煮了南瓜素翅、鹵水冬菇、蒸豆腐、台式辣腐皮和素鹹魚雞粒炒飯，「動物被人宰殺時會好惶恐，釋放很多毒素，你睇有瘋牛症、豬瘟、禽流感，人食咗肯定有事。你話植物都有生命，但無心臟唔會驚，收割時至少唔會放毒，有農藥就另計。」
珠寶書、類似心靈雞湯的書都出過，今年她又準備將三十多年的素食心得，結集成書，「我的食譜都是簡單方便，你睇個蒸豆腐，放工返屋企煮六分鐘就食得，營養不比條魚少，好過殺生。」然後一臉滿足，問旁邊的師姐們，「正唔正呀？」
不只基督教飯前要祈禱，穿上會服的 Cally，跟師姐們食飯前都要唸佛光四句偈。 
身為會長， Cally每次都主動服務師姐們，頻頻夾餸給她們。 
Cally說蒸豆腐趁熱伴飯食，最能保存營養和美味。 
Cally三歲多時與弟弟合照。 
八歲的鄺美雲。
在深水埗讀德貞中學時，十四歲的她身形已相當高䠷。 
上週三，鄺美雲捐了七百八十萬給理工大學做學術研究，弟弟帶埋太太現身支持。 
撰文︰鄭子瑩
攝影︰李敏軒
留言列表
