探熱針
樂易玲余詠珊 爭仔反枱
無綫上月舉行的公益金慈善騷，發生薛凱琪因被縮減演出時間，索性 no show唔做事件，有指是綜藝節目總監余詠珊，不滿製作資源部總監樂易玲擅自安插同屬黃栢高旗下新人雷琛瑜（ J. Arie）演出，而連累薛凱琪成為高層鬥爭犧牲品。
據知，近日樂易玲正着手安排年底約滿的許廷鏗，由何哲圖（余詠珊老公）打骰的「星煥」，轉會到太陽娛樂，因而再度辣着對方，兩個女頭目，開會時拍枱嗌大交，擺明車馬，勢成水火。
向志偉告狀
太陽娛樂藝人被祭旗，事後有指揸弗人 Paco曾向在無綫有特殊身份的曾志偉告狀，一個是好友（樂），另一個是愛將（余），志偉聽完就算，未有採取任何行動。
無人願意出面，兩女暗鬥浮面變明爭。日前再傳出許廷鏗年底約滿「星煥」，會過檔太陽娛樂，雙方導火線，更加一發不可收拾。
「公益金件事後一個星期，樂小姐同 Sandy坐埋一齊開公司例會， Sandy當住一班同事好嬲咁話樂小姐唔啱數，話 Herman（何哲圖）有份捧起許廷鏗，但樂小姐就一手送俾第二間公司。 Sandy仲嬲到拍晒枱，當時大家都冇出聲，大家都明白，做經理人嘅雖然係睇錢睇條件，但話晒捧一個新人唔易， Herman都出咗好多力，不過由佢老婆出面爭仔就有啲奇怪。」無綫中人透露。
何哲圖力捧無綫人鍾嘉欣不遺餘力，有指更被公司其他歌手投訴大細超。 
許廷鏗前年加盟星煥，樂易玲撐行出席，跟仍未反面的何哲圖，在記者會依然有偈傾。 
曾志偉孭飛的《獎門人》，雖屬余詠珊掌管，但以他在無綫地位，黃宗澤、周麗淇、苗僑偉等自動波俾面出席，成為最多紅星肯上的遊戲節目。
太陽娛樂的女子組合 As One，據知自公益金事件後，就連由曾志偉炮製的無綫新劇《 Aerobic Girl》唔再有面試機會，曾生似乎傾向余詠珊多啲。 
打正旗號由余詠珊帶入 TVB的黃翠如及洪永成，拍綜藝節目又接劇，成力捧對象。 
四大解封後，薛凱琪難得有機會再上無綫節目，點知殃及池魚演出臨時取消，無辜成犧牲品。
許廷鏗最慘
開會明挑機，樂易玲亦以牙還牙。據了解，藝員科已收到密令，凡綜藝科要搵巨聲幫演出，短期內唔放人。
「樂小姐一向都好少放啲一線藝人上綜藝科節目，尤其係遊戲節目，經常用唔同藉口去推，你有冇見過林峯、徐子珊會上節目俾人玩；而家唔妥到咁，更加唔使俾面。最慘嗰個係許廷鏗，扯線公仔，公司話乜都要聽，仲要俾人話放料，成隻死貓食落肚。」知情者說。
賣碟新人王
許廷鏗 09年參加第一屆《超級巨聲》得冠軍簽約無綫， 11年加盟星煥國際，半年內先後推出兩張個人大碟，同年再橫掃樂壇四大頒獎禮新人獎。人氣高企外，賣碟成績亦很好，至今推出過三張唱片，銷量均得到金唱片。
留言列表
