Amanda的紙紮屋以 1比 25比例製造，手工精細，圖中的作品售$8,800。 

青雲路

紙藝師　紙紮產品幾可亂真

創意無價，只要花點心思，加上一雙巧手，平平無奇的紙張也可以千變萬化，像任職 OL的 Amanda， 2年多前因為受母親影響，愛上紙藝創作，其紙紮產品全部幾可亂真，包括勞力士手表、眼鏡及手機等，不近看還以為是真品。最近漸多人慕名找她做婚禮布置、櫥窗裝飾等，連明星谷祖琳也找她作場地布置，令她的紙藝興趣，成功化成一盤生意。

每個人都想住豪宅，最好是 2,000呎大宅，實用面積達 95%，複式設計，設有花園、車位，屋內有齊電器、傢俬，如雙門雪櫃、平面電視、洗衣機等全部一應俱全，更叫人驚喜是，這間豪宅呎價不用$4.4，「我呢間紙紮屋好似樓盤模型，以 1比 25比例製作，屋內嘅嘢全部跟足比例，按真實嘅尺寸縮細。」記者眼前這間豪宅雖是紙紮品，但每一部分都做得十分仔細，用了 1個月來造。
再看 Amanda其他作品，更是幾可亂真，像金勞、指甲鉗、手機等，像真度極高，連鎖匙的狗牙凹凸位都跟足實物。「每件產品都係跟足客人要求去做，會叫佢哋先 send張相同實物 size畀我，跟住我開始試做。」她指眼鏡、舊式的 Motorola摺機等，難度都頗高，「好似眼鏡要立體，個鏡片要用環保膠片，要用熱力令佢變軟，做出弧度。摺機因為多弧度，要好似做衫咁，設計紙樣去做，要成個星期時間。」
每件產品的每一部分尺寸也要計算得很準，差 1mm已經要重頭來過，「如果某部分計錯咗，好似輪椅咁，個轆就會歪，行得唔暢順；如果係摺疊手機，可能會打唔開。黐貼技巧都好重要，唔可以貼到起泡，以免有礙美觀外，同樣驚影響到個設計。」

紙紮屋全部選可燒的環保物料，如棉布、飛機木等，屋內連傢俬、樓梯、木地板及汽車等，都參照實物製造，十分精緻。 

紙紮品對客有意義

係場地布置公司幫我設計呢個 backdrop，啲玫瑰花好靚，又有立體感，非常有特色。Amanda為谷祖琳婚宴製作過千朵紙玫瑰。《蘋果日報》圖片 

Amanda很用心去做紙紮品，全因這些產品對客人有特別意義，「好似有個兒子想幫爸爸做番生前最鍾意着嘅西裝，我就跟套真衫去做；又試過有客收到先人報夢，話燒畀佢嘅輪椅坐得唔舒服，個轆唔夠暢順，跟住我再做咗張新嘅畀佢，個先人就冇再向客人報夢。」
說到第一件紙紮品， Amanda說是為嫲嫲而做的。 2年多前，因嫲嫲過身， Amanda想為她做一間紙紮屋，於是買書自學，「我嫌坊間買到嘅紙紮屋唔靚，唔夠現代化，所以想自己設計，去買咗啲建築學嘅書嚟睇，學吓點計比例。」為了環保，她所選用的材料都可以燒，例如紙張、飛機木、棉質布及乾花等，不會用燙膠面紙。
媽媽又是另一個令 Amanda愛上紙藝的原因，「我全家人都鍾意做手工藝，媽咪鍾意玩微縮模型，佢趁住 60歲前，仲可以 claim到政府資助，走咗去 HKU SPACE報讀建築模型設計課程。」媽咪經常向她展示所學技藝，令 Amanda也對紙藝漸起興趣，貪紙張這類材料易搵，價錢又平，「原本我有諗過去讀媽咪嗰科，但覺得媽咪都可以教我，就轉咗去讀室內設計，大家互相指教。」

不停接公司新人客

Amanda把紙紮作品放上網，並設立網站，因為作品夠吸引，很快已有客人主動聯絡她，慢慢除了紙紮品外，更有其他公司找她做設計，像 11年瑞銀便找她做了 10條紙金龍，「佢哋想要金龍，我就由零開始設計、配色，做咗大大細細唔同 size嘅金龍，佢哋就掛咗喺公司入面。」
又有不少新人找她做大量紙玫瑰花布置婚宴場地，其中包括谷祖琳，「係幫谷祖琳做場地嘅公司搵我喺佢婚宴上，做咗千幾朵雪白玫瑰花作為場地布置，我用咗 2個星期，通宵幫佢趕工。」之後陸續接到不少婚宴單，現已排至 2014年，「之前啱啱幫賣鞋嘅 BeLLE公司嘅 annual dinner做 backdrop，有成米咁闊，我會自己跟車運送，因為紙張一定要小心搬運，唔可以有摺痕，否則就唔靚。」
見紙玫瑰受歡迎，去年情人節， Amanda貪玩地做了十多朵紙玫瑰，花內安裝了小燈，走到中環街頭售賣，「每朵玫瑰賣$99，唔使 3個鐘已經賣晒。」還因此吸引到都會海逸酒店的職員，找她在復活節時合作，設計活動 backdrop，及開班教小朋友摺紙。「𠵱家做咗好多次玫瑰花，唔想次次咁大路，所以會加多啲其他元素落去，例如蝴蝶、雀鳥等，令畫面更豐富。」

Amanda為瑞銀設計及製作了 10條不同 size的金龍，樹立公司各處。 

電影公司找她合作

本身任職 OL的 Amanda，近年在行內漸有名氣，最近有電影公司找她合作，要做大量紙紮品，「我要做成個香港出嚟，例如北角咁，電影公司會畀相同資料我，要逐部分咁做，起碼要搞幾個月，我仲要搵內地嘅公司幫手去做，要不停上深圳開會。」
現時 Amanda每月接到至少有 1、 2單大 job，如 backdrop、櫥窗設計等，一般要花 2至 3星期時間，收費過萬；而紙紮品則由百多元至過千元不等，時間約花 3、 4日。雖然每月兼職已有過萬收入，但她坦言不敢貿然辭職，「因為紙製品工作量仍然好浮動，好難儲到長期客，全職去做會有壓力，𠵱家用 freelance形式，當係興趣，反而做得好開心，又比較輕鬆。」

海逸酒店除請 Amanda做復活節 backdrop，還有請她開班教小朋友摺紙。 

產品像真度高

Amanda製作的紙紮品像真度極高，全部需要訂造，收費由$300至過千不等。

輪椅 

輪椅的車轆難度最高，接合位要做得準確，才可行得暢順，售$2,800。 

鎖匙鎖匙的凹凸位也跟足實物，售$800。「做得唔好，驚先人開唔到門。」

手表金勞連扣位也做得十分仔細，真的可以扣起來，約$1,800。 


手機舊式 Motorola摺機，除可以打開，更有埋叉電機，約$1,500。


指甲鉗細微如指甲鉗也有客人訂造，售$600。 

模型製作有助紙藝?

仙之居網址： http://www.soulhousehk.com媽咪不但令 Amanda愛上紙藝，還經常協助女兒趕工，母女感情深厚。 

想像 Amanda般製作紙模型，可報讀模型製作證書，學識製作不同款式模型，坊間有不少機構開設相關課程，其中包括 Amanda媽媽就讀的 HKU SPACE，參考如下：

模型製作證書
機構： HKU SPACE
要求：有興趣人士
課堂： 4個月，共 96小時。
收費：$10,710（不包括材料及工具）
內容：建築模型、室內設計模型、展覽場地模型、考察專業模型製作室等，有導師示範和學員實習部分。
查詢： 3762 0074

後記：母女檔

媽媽除了影響 Amanda愛上紙藝，也是其好拍檔。採訪當日，伯母全程從旁協助，搬運紙模型、找工具等，「媽咪成日幫我捱通宵，一齊趕工，真係好幫得手，好多謝佢。」
伯母聞言笑說：「 3年前，我先生住院，個人壓力好大，成日唔開心，惟有做紙模型就會乜都唔記得，冇晒壓力，先生過咗身後，我就決定要去上堂學。」原來紙藝背後，還有這麼一個故事。

撰文：洪芳俠
攝影：傅新發
部分圖片由被訪者提供