潮𡃁便當

茶記轉型

早排荃灣肥嘟嘟茶餐廳玩 30蚊任食噱頭，點知俾貪心怪食住上，搞到餐廳賠本收場。
加埋最近茶記冰室密密開，生意有幾難做大家都知。
今期且看新上場茶記新貴，用咩奇招突圍。

工廈執到寶　椰香面咖啡底味夠奇

身處灰壓壓的工廈同貨櫃車中間，差點看不到瑞士咖啡室，偏偏鑽進餐廳大門，變得好懷舊，好似穿越時光隧道咁。老闆 Terry，望上去 35歲上下，非常年輕，原來已是 4間餐廳的老闆。餐廳 2月才開張，但午市爆到暈，起碼走 3轉共 600人。餐廳有一般炒粉麵飯多士三文治，不過最想推介咖喱農夫包，茶餐廳中較為少見，而且咖喱特別在加咗咖啡粉，唔知係咪心理作用，入口先是一道椰香撲鼻，食到喉嚨椗略帶回甘，似係咖啡味！到覺得係咖啡嗰刻，咖喱已經吞咗落肚，搞到小記嗰日不停反覆去試，好似玩味蕾測試咁。

食客 Alex& Peggy製衣平時好少出街食，為咗呢碟瑞士雞翼嚟，好正呀！仲點咗免治牛肉飯，肉汁幾豐富。

傷風感冒餐$32話明係傷風感冒餐，梗有大量健康番茄，茄味特別 fresh，配埋熱辣辣菊花薑蜜，連病人都冧埋。

海南雞飯配雙丸湯$48海南雞入口嫩滑，不會太肥，有埋牛丸貢丸湯，好住家 feel。

咖喱農夫包$48咖喱內有香濃椰漿味，食到底略帶咖啡香，可選豬頸肉、牛肉或雞肉 3款。

蝦醬炒瑞士雞翼公仔麵$42（午市）/$35（下午茶）蝦醬用紹興酒炒過，味道香得來較醇，令公仔麵鹹香惹味，而瑞士雞翼鹹甜得宜，快快口就食完！

午市人多嗰陣，餐廳人龍仲會企到入餐廳之內，勁誇張。

突圍奇招：開業在工廠區內，但環境一點不地痞，食物簡單但有創意。

瑞士㗎啡室
地址：葵涌葵昌路 9-15號貴豐工業大廈地下
電話： 2153 0370/ 2153 0371
營業時間： 7:30am-6pm（星期日及公眾假期休息）

懶人必食　大粒花生醬兼免切西多

開在荃灣一隅的茶記，地點算不上方便，以為會無人識去，原來下午茶時段都有一班街坊食客打[!9046]，店內環境光猛企理，唔同一般茶記坐唔舒服。有齊一般茶記所有，多的是晚市有火鍋供應，店內主打陳皮鴨腿湯飯、大蝦撈麵等，不過仍不及一大啖可以放落口的西多吸引，唔使切，上枱就食得，入面有大粒花生醬，點埋煉奶，簡單得來好食。

骰仔西多士$18西多士外脆內軟，入面塗上大粒花生醬，下午 tea一 tea最啱！

美國黑毛豬肉眼扒$85肉身有 8安士重，筋肉分明，肉質尚算腍軟，加埋黑椒汁味道更香濃。

古法老陳皮鴨腿湯飯$48鴨腿味落晒湯內，湯內加入甘草，卻帶出回甘效果。

蝦子大蝦球瑞士汁撈粗麵$58粗麵入口較腍身，大蝦球一口 size，肉質帶爽，略帶蝦子味。

突圍奇招：玩高檔茶記 feel，環境不侷促，坐得舒服。

茶記
地址：荃灣青山公路 388號中國染廠大廈地下 G06號鋪
電話： 2628 0636
營業時間： 7:30am-11pm

和風茶餐廳　芥辣照燒汁撈飯

從事餐廳樓面 20年，粵品的老闆魏先生 3個月前決定自立門戶，回到年輕時居住的地方開茶餐廳，並將曾在日式餐廳學到的東西，搬到茶餐廳，例如照燒牛肉包，牛肉用上日式燒汁炒香，鐵板餐的特色鐵板汁，用上自行調配過的日本芥辣及蜜糖汁，甜甜辣辣，好醒胃，茶記得來帶點日本風情。

照燒牛肉包$22牛肉包以照燒汁炒過，若然汁香濃些更佳，特別用上紫椰菜，咬落更爽口。

秘製鐵板燒飯$36鐵板餐冇鐵板伴上，聽唔到「滋滋」聲誘惑，不過甜甜辣辣加咗芥辣及蜜糖的醬汁，同樣是亮點。

食客梁小姐學生價錢幾公道，啱啱點咗個常餐，味道還好。

突圍奇招：芥辣蜜糖汁乃自家調配，唔係一味黑椒番茄汁，若能在鹹牛肉內加入辣油，更正！

粵品茶餐室
地址：西灣河筲箕灣道 218號地下
電話： 2205 0811
營業時間： 7am-10pm

80年代　 D.I.Y.鹹牛脷

一個 60後，因為懷緬 80年代年輕時光，開咗呢間懷舊茶餐廳，店如其名香港 80's，牆上貼滿自製 sticker如啟德機場風景，張國榮、 Beyond歌星相等。問到有咩好推介，他就說鹹牛脷，自家醃製，大大塊，夾喺烘底餐包度一齊食，又脆又軟，唔錯！另外仲有一杯大橙檸，出面較少見到，鮮榨橙汁加檸檬，勁 fresh，最重要係維他命 C爆燈，流感殺埋身都驚少啲。

鹹牛脷三文治配 500c.c.凍橙檸$49鹹牛脷乃自家醃製調配，牛肉味濃，入口帶沙律醬鮮香，不俗！建議三文治烘底食，更可口！

鮮油菠蘿包$18

豬扒薯條$32（下午茶）豬扒表皮炸得脆卜卜但不算油膩，肉身肥厚，食落啖啖肉。

食客 Tiffany& Rachael學生點咗豬扒薯條，唔肥膩，薯條好食過某啲連鎖店。