真面目
10年恩怨 吼實阿梅 10周年騷 90歲梅媽:邊個敢出嚟搞
張國榮逝世十周年紀念騷剛完成,有傳哥哥的前經理人陳淑芬借一連串紀念活動賺大錢,袋走近 2千萬。
適逢今年亦是另一巨星梅艷芳逝世十周年,據知阿梅生前一班好友對紀念騷非常有興趣,有意仿效陳淑芬,為悼念阿梅「大搞」紀念活動。搞騷有錢搵,相反阿梅的 90歲母親覃美金連開飯錢都冇,去年 4月更正式破產,現時要靠借錢度日。對於阿梅分分鐘被人借過橋,梅媽週一( 8日)激動表示:「邊個敢出嚟搞!我即刻登報……」
90歲梅媽頭腦清晰,講嘢中氣十足,反而雙腳唔太靈活,出入需工人扶實。
梅媽指阿梅死前幾個月完全聯絡唔到愛女,直至 12月 29日收到電話先知阿梅原來已病危。《蘋果日報》圖片
陳淑芬幫哥哥搞紀念騷,仲請埋唐唐出席,大賺 2千萬。《蘋果日報》圖片
冇錢出自傳
剛於週一( 8日)上庭的梅媽,再次向遺產執行人匯豐國際信託追討每月 12萬生活費。本刊到高等法院找到梅媽,發現梅媽雖然已經 90歲,但對愛女生前點滴依然記得非常清楚。
講起阿梅生前一班徒弟如安仔、何韻詩,梅媽大嘆人情冷暖:「一個電話都冇打過嚟!」而問到阿梅今年逝世十周年會否搞紀念騷,梅媽更即時扯火,「邊個敢出嚟搞,我即刻登報要求佢哋將收入捐咗去,冇人可以借阿梅個名呃錢!我都想親自幫阿梅搞,最衰我冇錢,之前一直想出一本阿梅嘅自傳,但到𠵱家都搞唔成,就係因為冇本錢!」
為了應得的生活費, 90歲梅媽本週一仍要出入法庭,又要費神睇法律文件,認真陰功!
梅媽同梅啟明曾多次追討阿梅遺產,均被判敗訴。《蘋果日報》圖片
爆最後遺言
梅媽自稱:「我只係想攞番生活費,其他嘢我唔理!」對於外界盛傳阿梅與家人關係惡劣,因此寧願成立遺產基金管理遺產都唔直接交畀屋企人,梅媽反指被人抹黑。
「阿梅不知幾錫屋企,佢走之前嗰個中秋節返屋企食飯,之後佢叫我上佢屋企,打開書房入面個夾萬畀我睇,話『我遲啲會去美國醫病,去幾耐唔知,但我會每日打畀你,你唔使擔心生活費,你將呢間屋(壽山村豪宅)租出去,啲租夠你生活㗎!呢度有啲珠寶,你鍾意就拎去,留番大呢粒畀我做嫁妝得喇!』點知一直到阿梅走嗰日我先再見到佢!」
徒弟好友逐個數
阿詩冇晒影「阿梅走咗咁多年,佢一個電話都冇打嚟問候過我!」《蘋果日報》圖片
安仔唔畀飛「佢開演唱會都冇話畀張飛叫我去睇呀,莫講話請我飲茶!」《蘋果日報》圖片
Marianne擸遺物「阿梅走咗之後, Marianne(前經理人)瞞住我幫阿梅攞死亡證,又漏夜搵架 van去阿梅屋企攞走晒啲嘢!仲唔畀我入屋!」《蘋果日報》圖片
劉培基忘恩「冇阿梅根本就冇人識劉培基,點知有次阿梅搞演唱會冇搵佢做歌衫,佢即刻周圍唱阿梅,又用啲好難聽嘅字眼鬧佢,後尾阿梅心軟先畀佢做番一件!」《壹週刊》圖片
梅媽大控訴
梅媽現時仍住在跑馬地雲地利道,雖然已被業主入稟法庭要她搬走,但梅媽說:「我冇錢搬呀!」
梅媽家中仍掛了多幅阿梅的生活照,隔籬更有兩個神主牌供奉阿梅及比她早 3年同樣因癌離世的胞姊梅愛芳。
11年 10月,「梅艷芳遺產基金」曾托蘇富比將阿梅的首飾拍賣,聲稱將籌得的 6百幾萬留畀梅媽做生活費,其間梅啟明闖入會場阻止,梅媽則表示至今仍未收到有關款項。《蘋果日報》圖片
街數冇人還
梅媽週一向本刊展示一份會計師樓文件,上面清楚列明阿梅的債仔及拖欠金額,梅媽表示知道阿梅一向疏爽,但唔甘心愛女的血汗錢被呃!
蔡一智文件指出阿梅曾借出 100萬予由蔡一智及葛民輝成立的 Double X,蔡葛二人向會計師解釋阿梅曾表示唔使還,但並無提供任何實質證據支持。
連炎輝文件顯示阿梅曾給予生前好友連炎輝(現職 AIA區域總監)近 80萬,連炎輝在 08年解釋因替阿梅畀了 170萬保險費,所以阿梅分兩次償還 45萬及 80萬,而尚欠的 45萬保險費,連炎輝則表示可以不收取,但一直未有證據證明他曾幫阿梅墊支保險費。
彭敬慈文件指阿梅徒弟彭敬慈欠阿梅共 20萬 3千,彭解釋其中 20萬係一個音樂會的演出費,而 3千元欠款則在 04年終止與 Mui Music合約時一併取消。
採訪、撰文、攝影:娛樂組
留言列表