close


周麗淇為咗《女》劇連去大陸掘金機會都放棄，點知套劇家喺大陸PPS有得播，咪當香港價錢拍大陸劇囉。

衰過倉底

呢個世界講求等價交易，小生花旦要拍劇換獎，估唔到連無綫都要用劇換約。事緣上週二（3日），周麗淇同謝天華在2月才剛拍完的新劇《女警愛作戰》，香港有排都未播，但失驚無神喺強國視頻網站PPS任睇。據知無綫同大陸播映合約就完，為咗獻媚，無綫以一新劇再加其他舊劇套餐價換續約，女主角周麗淇慘成交換籌碼之一。無綫以物易物，咁啲演員用續約換獎，都好合理喎！


32歲周麗淇雖然唔係無綫親生女，但一向有拍開無綫劇，而且收視不俗。上年12月尾播嘅《我的如意狼君》，雖然同期有神劇《天與地》壓住，但結局都有40點，證明周麗淇有一定叫座力。

急住播放
周麗淇加埋Laughing Gor謝天華孭飛嘅《女警愛作戰》，有卡士斷估會排在「靚檔」播出，點知上週二（3日）國內煲劇網站PPS，神奇地獨家首播《女》劇。知情者說：「無綫同大陸嗰邊就完約喇，佢想大陸嗰邊繼續播佢啲劇，咪以一套新劇再加啲舊劇博同佢續約囉，於是咪揀咗《女》劇 去sell囉！」而據無綫以往慣例，一經海外播放在先嘅劇集，至少半年唔會喺香港出現，加上唔少劇嘅檔期已定，即係話《女》劇註定要步《盛世仁傑》後塵成為倉底貨。由於向大陸獻媚行動倉卒，所以PPS播嘅《女》劇質素超差，連主題曲都無。片頭只將一堆片剪好，然後加段罐頭音樂就完成，相當粗製濫造。周麗淇經理人Marianne上週五（6日）對本刊說：「Niki為咗《女》劇，推咗部大陸劇嚟接㗎，同埋原本諗住4、5月抽個期同天華錄主題曲，諗住大劇會慢慢搞啦，但估唔到突然咁急！」你唔急啫，無綫賺人仔急嘛！

4個月超趕出貨
一般20集劇，由造型到拍攝基本上三個月完成，但通常都要花上幾個月時間做後期，如果套劇有一線卡士，仲會配合埋宣傳先上。今次《女》劇4個月內由拍到網上播，基本上破晒紀錄，認真史無前例。而且下半年播映嘅劇大致定晒，下年仲有《金枝玉孽2》、《衝上雲霄2》、《大太監》及《On Call 36小時續集》排緊隊，《女警愛作戰》真係唔知排到幾時？

4月出街

11月造型
上年11月周麗淇為《女》劇造型，當時無綫都未決定將呢套劇掟去大陸播。

12月開工
12月至2月為《女》劇拍攝，當時周麗淇除為《女》劇開工，仲要忙《我的如意狼君》宣傳。

2月煞科
2月尾《女》劇煞科，周麗淇仲自掏腰包請大家食煞科宴。

無綫：PPS偷步播！
####


衰過倉底謝天華和周麗淇兩個收視保證，點知套劇下場分分鐘同《盛世仁傑》一樣，擺足幾年先變出土文物。


狄仁傑陪你入倉！（設計對白）


周麗淇孭飛嘅劇一向收視有保證，上年12月播嘅《我的如意狼君》一致睇淡下，結局攞到40點，唔係個個花旦有咁嘅成績！


上週二（3日）PPS首播《女》劇，但大馬華麗台astro個logo大大隻喺右上角。經無綫外事部副總監曾醒明表示，未授權PPS播映。


黃智雯喺劇中飾演硬朗女警官，喺第4集罕有地有換衫場面，可惜性感程度就唔及陳法拉、陳茵媺喇！


《蘋果日報》圖片


除咗周麗淇、謝天華、黄智雯，《女》劇其他卡士一般，但勝在多索女警。《壹週刊》圖片


無綫外事部副總監曾醒明


雖然無綫未正式授權畀PPS，不過PPS上週已經有4集偷步播出，分晒集數，仲強調「獨播」令人以為佢攞正牌！

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄