漫遊毒物

《 Dragon's Dogma Dark Arisen》　突擊死亡島

轉型，你有冇膽？
CAPCOM有。佢以《街霸》打出名堂，《生化危機》喪屍出到濫，又畀佢諗到隻《芒亨》大賣，同類風格 RPG《龍族教義 Dragon's Dogma》唔聲唔聲又賣過百萬隻。 PS4預覽會入面， CAPCOM示範作《 Deep Down》都一樣玩歐陸 RPG風味，不過十畫未有一撇，想 keep住做屠龍勇者， 4月尾《龍族》有隻新改版《黑暗再臨 Dark Arisen》，超大型黑暗邪島地下迷宮等緊你挑機。

廠商： CAPCOM
類型： RPG
機種： XBox360、 PS3
人數： 1人
語言：英/日配音及字幕
發售日： 4月 25日
售價：$228

黑暗改版

雖然《 D'sD》冇連線 multi-play元素，但玩家可以將自己個 look同能力複製上 server，換句話說遊戲世界內真係有上百萬個唔同樣子、特性、能力嘅角色，畀各玩家自組冒險隊伍，呢批協力角色嘅人工智能寫得幾好，一支公打 RPG都好似跟真人拍檔組隊咁，喺反應唔算熱烈的情況下推出，卻備受好評， XB360、 PS3版加埋賣出 100萬隻以上。早排來港跟《 Face》進行訪談嘅日本製作人 Kent氏都話多得 fans支持，仲畀咗好多意見同想法，先推動到 CAPCOM出呢款改版《 Dark Arisen》，新版光碟除原版元素外會加入新地圖黑咒島，啲怪物唔係骷髏骨就係魔鬼，仲有唔少打不死嘅惡靈，迷宮入面長期昏暗，感覺幾似玩緊《 Diablo 3》。

當你殺得太多怪物，屍體嘅氣味仲會吸引一啲超高呢食人惡龍飛嚟搵食，十分難打，記得打唔過就快閃。但打得死佢哋，將會得到好多隱藏 items。 

新種敵人有吸血蝙蝠（ Strigoii），會將主角成個人捉上半空放血！ 

呢隻死神，阿 Kent用佢隊高 level隊伍去打，一刀被劈死 3個同伴，見到就好走啦！

體貼新手

Kent氏（木下研人）仲跟記者講，如果打爆過上集，可以過 save去新版繼續玩：「上集如果爆過機、或者 Level達 50左右，咁完全唔使打怪升呢，一口氣直闖黑咒島，大概一星期就可以爆機。」新手亦唔使驚，因為黑咒島地底迷宮係一層比一層難玩，只要喺表層玩到 10級左右，就可以一步步殺落去。
佢仲畀咗貼士，新手玩家去黑咒島升呢仲快過玩原版地圖，而且會收集到更多 items，對你打番原版地圖亦有幫助。不過 Kent就提醒記者，黑咒島有隻死神，佢 level高到嚇死人，任何時間都會忽然出現突襲玩家，新手唔夠打一定要掉頭走，否則多幾條命都唔夠死。以《魔戒》比喻，上集不過係《魔戒現身》啲青翠森林，今集先係《雙城奇謀》入面嘅黑暗魔境。記者對上集興趣不大，但見到今集啲氣氛，真係好想試玩一下！

今集可以執到鑲有 1至 2粒 EX Skill能力晶石指環，啲晶石係冇得自由組合，所以要打多幾次執好嘢，以求提升實用嘅能力組合。 

遊戲內主角係曾被惡龍搶走心臟嘅「覺醒者」，上集主角係唔知有其他同類存在，今次去到黑咒島會得到其他「覺醒者」幫手，幫你修武器、賣道具。

應 fans要求而追加嘅隨時影相功能，任何時候都可以定鏡郁構圖角度去 capture戰鬥畫面，乜嘢波士都俾你影清楚晒，放上 facebook fan page。 

兩位日本來港製作人 director木下研人先生(左)、同埋 producer松川美苗小姐(右)。 

撰文：鍾世傑
攝影：傅新發
special thanks： CAPCOM ASIA