面對面
狂人日記 周啟生
與周小君和周啟生姐弟倆在銅鑼灣街頭拍完照，一行人移師到附近的餐廳訪問，我們的對話，就從周啟生接連罵走三個餐廳經理開始。
非繁忙時間限定交枱時間，又多次打斷對話諸多規限，第一個經理態度的確不友善，不過餐廳有餐廳的規矩，記者主張息事寧人別耽誤訪問，周啟生卻連醞釀時間也省掉，已經爆發：「我哋係客人，我哋有幫襯，點解要我哋走？我硬係唔走，叫埋老婆仔女嚟開飯，坐到今晚！」
從廣東話到英文，餐廳派出三個經理都被節節擊退，見我嚇到 O嘴，周啟生再轉 channel唱了句國語歌安慰：「看你受的委屈我會難過……哦……哦……」下午五點，他叫了支黑啤，卻敏感的收埋一邊不讓黑啤入鏡：「我為你哋出氣，你就話我脾氣大，世人就係鍾意咁睇我。」
16歲開始為顧嘉煇點煙斟茶做學徒， 17歲已經可以全權為《香港小姐》選舉及《獅子山下》配樂編曲， 20歲升任亞視音樂總監， 30歲不到就是 hit歌無數的金牌音樂人，世人看周啟生，是天才，不過性格狂妄、曲高和寡，所以在流行樂壇朋友不多、聲望不夠，撈得的油水也有限。
這一天，周啟生說自己想要對世人澄清三點，其一：「我唔係天才，係勤力！」
其二：「我冇話過自己叻，係人哋渣啫！」
其三：「 51歲，其實我已經收晒火……」
噢……睇得出，睇得出……
我大隻過劉華，劉華皺紋多過我！
誰在香港樂壇彈琴最叻？我真的不知道走出去找誰能問到答案，好在有周啟生自問自答：「我好鍾意李小龍，佢講得啱，呢個世界冇最叻，認唔到第一，但係我都唔會認第二！」
周啟生和周小君的父親是粵語片明星周吉，兩姐弟說父親生性風流，試過出街有陌生細路叫周吉「爸爸」，流落在外的兄弟姐妹可能十數個，不過出自正印、一起長大的則只有六個，周小君說，弟弟自信不無道理：「我哋細個住廉租屋，日日都有細路不停咁敲門、敲窗：『阿生，練完琴未？出嚟玩啦！』但係佢一坐就係幾個鐘，佢嫌出去玩出去溝女阻住佢練琴。」
周啟生接口：「我 9歲開始攞阿哥支結他嚟玩， 4蚊一把大陸牌子，好硬好渣彈到全部手指起晒泡照彈； 10歲阿媽畀小君學琴，我望望吓自己彈識晒小君所有琴譜。三十幾年前我已經彈到八級琴，𠵱家每日一樣練 6、 7個鐘琴，鑽研古典音樂同 Jazz。我相信，全世界除咗最叻嗰幾個人，就係我最叻，再畀多十年、廿年啦，我會係全世界最勁。」
周啟生自稱，雖然未去到全球最勁，不過音樂造詣亦已經在亞洲無敵手，有時候甚至覺得寂寞：「亞洲唔好玩，玩音樂冇乜腳……我最自豪唔係天分，係我嘅學問同堅持。呢啲嘢可以呃人、唔可以呃自己， 51歲，有邊個好似我一樣，仲可以每日練 6、 7個鐘頭琴？
每日睇書學語言學心理學？一年堅持三百日以上每日跑 4至 14公里？我 30年都 keep住冇超過 135磅，劉德華同我一樣大，我 keep得同佢一樣好，不過我大隻啲，皺紋就佢多啲……哈哈，唔係話乜嘢，我都好欣賞劉華。
我係想激勵𠵱家嘅年青人，一定要堅持、一定要勤力！」
小君接口：「佢係一分天分，九分努力！」周啟生打斷：「錯，我係一千分努力至啱，我夠膽話人渣，係因為我對自己要求最高！」
周啟生與周小君的《小生小君 Love& Live》下月 11、 12日在九展 Star Hall舉行：「我哋兩個對住屋企人合唱過一千幾百次，對外，係第一次。」 
為新演唱會，拉攏葉世榮合錄新歌，久無新歌登場的周啟生信心不減：「我相信無論七十、八十定九十後都會鍾意。」 
周不時與兒子周樂（中）、侄兒周永恆有合作，周啟生訪問當天說：「個仔唔夠我勤力，周永恆我就唔想再提。」《壹週刊》圖片
91年為追落選港姐梁晶瑩而寫下的〈 Crystal〉成為太極首本名曲，不過兩人生下兒子周爵四年後已經各行各路。《蘋果日報》圖片 
16歲入行做顧嘉煇徒弟至今 35年，周啟生說：「我作品唔算多，不過十首有九首都 hit，命中率高。」
𠵱家鬧你唔起呀？
周啟生是香港樂壇 80、 90年代舉足輕重的人物，姐姐周小君則是唱足 30年和音，又是陳寶珠、梁詠琪、楊千嬅、古天樂的歌唱老師，兩位入行加埋 70年，第一次姐弟班開個唱。
下月 11、 12日在九龍灣展貿 Star Hall舉行的《小生小君 Love& Live演唱會》，最貴門票賣到 880大元。
早兩個月甄妮開騷，有說門票滯銷，甄妮姐姐於是咬住後輩 G.E.M.唔放谷票房，周啟生都肯鬧後輩鬧樂壇，不過堅持不准記者開名：「嗰個係甄妮，甄妮有資格喺呢個樂壇講任何嘢，換着我，會講少兩句。不過嗰個係甄妮，甄妮個性格就係咁，大佬呀，好笑啦……佢係甄妮，鬧你唔起呀！
不過講真，我又幾鍾意阿 G.E.M.，好有風格。我唔怕你寸、唔怕你冇禮貌，我怕你渣啫，真係有料到嘅人，做咩要謙？」
說某當紅影視歌三棲男藝人，周啟生說：「佢係商品，唔係歌手，你求其問一個人，我同佢唱歌邊個好聽啲？
但我錫住啲後輩，唔想同佢比！」說某吃香流行音樂人：「出去飲撞到，老婆話佢一見到我就縮，我請佢嚟我演唱會玩，佢話自己呢排冇練琴……超……」還有些上位歌星、全能音樂人，在他口中都是茂利。我問他：「真係唔開得名？」周啟生十級認真：「真係唔開得名，我當同你傾偈咁傾，但唔想惹事生非。
我唔想喺我嘅訪問提人哋，我諗唔到有邊個值得我提。」
我說：「但學似甄妮一樣撩事鬥非鬥票會搶手啲，上報又多啲喎？」
周啟生和周小君異口同聲說：「我哋追求嘅都唔係呢啲。」
換着第二個，三十年前已經在樂壇響噹噹，現在一早升上神枱，被尊稱甚麼「大師」甚麼「音樂教父」，或者開緊群星拱照演唱會、出緊自選創作集掠緊水。
周啟生說，他追求的成就不是這些：「唔使叫我大師喇，我有樓有車有老婆有仔女，生活得好好……
有名有利係成就咩？喺《勁歌金曲》有獎攞係成就咩？
我一早有成就，就係得到行內人嘅尊重同認同，唔信你出去問吓，呢行邊個彈琴最叻？」
30年三個老婆係專一！
周小君早年離婚，現在單身，周啟生則是離婚結婚再離婚再結婚，現任相差二十年的大提琴手太太 Cleo已經是第三任妻子。雖然是第三任，周啟生愛起來一樣去得盡，左手無名指、右手手背和手臂，一共紋了三個「 Cleo」在身上。
第一任太太，是 20歲閃婚、第二任太太落選港姐梁晶瑩是寫下一曲〈 Crystal〉，好在各任太太示愛方式都不同，紋身這招只用在現任身上。
「啲人話我花心，其實我好專一，三十年嚟我都係得三個女人，所有時間我都係留喺屋企彈琴睇書享受家庭樂，幾時有人見過我出街又蒲又飲？何來花心？」
與首任妻子不歡而散，十多年不許見長子周樂，說三人現時關係已經在修補中；現年 12歲的次子被斷診有學習障礙，最傷心是「 Crystal」放棄兒子撫養權，十年間又對兒子不聞不問；與 Cleo的女兒則在兩年前出世，周啟生說她是全世界最好的女人：「佢識音樂，亦都欣賞我嘅音樂，最好嗰樣，係佢唔嫌棄我內心同外身都唔夠富有！」
我不明白此話何解：「身外物我唔多，內心我又對自己要求高，永遠都覺得自己唔夠好，佢咁都忍到，真係同我好夾。」
與梁晶瑩分手後，一直獨自照顧學習障礙次子周爵：「佢媽咪走咗之後再冇理過個仔，所以我特別心痛佢。」《忽然 1周》圖片 
兩年前與大提琴手司徒靄杰再婚，女兒周晴現時兩歲：「𠵱家屋企個大佬就係個女，佢好叻，啱啱俾維多利亞（天后名幼稚園）收咗！」《忽然 1周》圖片
認叻
周啟生喜歡認叻，周小君則不喜歡認叻，好在姐弟情深，弟弟幫她認：「小君七九年已經同張國榮主持麗的節目，佢後生好似柏安妮咁靚！〈蒼海一聲笑〉係小君幫林青霞唱，〈感情線上〉把高音係小君，你哋又知唔知？
小君成日都企得太後，佢唔介意，我介意吖嘛！」懶謙卑懶圓滑的受訪者我見得多，像周啟生和周小君這一對，一個堅叻又愛認叻；另一個猛料又不肯認叻的，還真是第一次見識。我同意周啟生，真係有料到，又何必太謙？但願香港多些狂人。
留言列表
