遊戲係收錢嘅，所以一開波已有：悟空、悟飯、無限、魔童、比達、菲利、斯路 7個角色揀，唔使再抽蛋先拎到新人物。

Fun App

平過最低工資手機篤龜波

貨櫃碼頭工人嘅人工仲少過 97年前，唔通係李氏力場引發時光倒流？最近有隻《龍珠 Z》格鬥 game仲復古啊！正版 BANDAI貨賣平過最低工資$30， 350yen（即$28）就玩到超任《超武鬥傳》式 2D格鬥，加上有藍牙雙打，即成近日超 hit手機下載遊戲！

點撈？

呢隻 game暫時只有日本 Google play購買，需要用到 VPN模擬日本手機先下載到（邪道下載就唔建議啦！）。不過 4月中日本 Apple App Store都會上架，到時用日本 iTunes戶口登入，用點數咭就買到。

Dragon Ball Tap Battle 350yen（約$28） iOS及 Android平台

日本 Google play下載 link（需使用 VPN下載）

齋篤芒免 chok招

Chok樣呢個 term都 out啦，呢隻《龍珠》格鬥亦係為手機而設，出招唔使用 joypad chok招（可揀傳統操作，但試過好難用）：篤角色前後左右即係移動， double tap天空、地面仲可飛天同降落。任何時候篤對手就可以出招；視乎自己跟對手距離，會自動揀拳腳、突進打擊、氣功波。按實角色可儲氣，成功後氣功波會自動升級做龜波等必殺技。如儲夠 2格以上超必 bar，大頭圖案又爆出「怒」字樣，仲可出元氣玉等究極必殺技，動畫效果畫到個波會射穿大氣層，但記者卻發現唔少招式唔識自動空對地、地對空，好鬼反高潮。

出超必當角色好似碼頭工人咁嬲， icon出現怒字就可以用 2行必殺技 bar出究極必殺技，有晒動畫 cut-In同埋日文配音對白，個波仲會射穿大氣層飛上太空！記者以 Xperia Z玩，完全支持 1080p屏幕，廿幾蚊嚟計交足功課。

基本招畫面正下方顯示近/中/遠距離，對手身下嘅字樣代表你篤佢之後會出乜招。

必殺技長按自己可以儲氣；被人打都儲到，儲夠超必 bar後，遠距離攻擊會自動升級做必殺技。

龍珠特色有齊

隻 game原來仲有空中對招、鬥波呢類《龍珠》招牌場面，前者係篤畫面上紅、綠點鬥多，而鬥波就堅要狂篤 touch screen鬥次數，玩得耐可能要換過塊保護貼。總體而言，此 game簡單易玩，兩隻拇指一齊篤，好簡單就做到埋身出拳再放波嘅簡單連技，真係幾爽，但今時今日喺 3DS出，真係連小學雞都唔買，換落手機平台廿幾蚊仲有 2P對戰，咁又玩得過！

鬥招第 1步係鬥篤畫面上嘅紅綠點……

篤得多一方可追加攻擊，兩個圓形重疊時篤芒追打。

鬥波實試 4至 6隻手指一齊喪篤會篤多好多 hits數，用 1隻手指篤實輸。

鬥疊馬過版有 Z戰士咭收集，可加角色能力，去到超必 Vs超必鬥波時，亦睇邊個啲牌點數多先算贏。