阿強雖然已不是碼頭工人，但仍仆心仆命為工人搞 facebook及為工人爭取加人工。不過佢就相當低調，做訪問時極不願上鏡。 

搜尋氣

碼頭風雲全城撐　搞手「怪獸」：廿年來見盡碼頭黑暗

葵涌貨櫃碼頭風雲，工人為爭取合理權益，不惜罷工示威，週一（ 8日）行動已去到第 12日，一眾碼頭工人依然喺碼頭留守爭取合理薪酬。
市民齊心撐工人，當初原來靠操作俗稱「怪獸」的起重機工人阿強，開設碼頭工人 facebook專頁「碼頭的辛酸」，成功將一向似盤散沙的工人凝聚。如今碼頭工人得到市民支持，阿強話最開心係件事令到全世界關注，現時個個都知：「班外判商有幾咁賺盡。」

今次碼頭工運令到全城關注，全靠碼頭「怪獸 3人組」阿強（左）、阿駒（右二）和阿翁（右）及職工盟的李卓人。 

上週六（ 6日）碼頭工會派發第二年 1,500蚊生活津貼，另一位罷工發起人之一阿翁（中）亦有到場分錢畀工人。 

外判工人喺碼頭外通宵留守已踏入 12天，得到不少學生、團體到場支持。 

阿強搞嘅 facebook專頁叫「碼頭的辛酸」，初時得百零人 like，但經過連日嚟報道，至今已過 18,000人支持。 

我今年 46歲喇！ 94年 3月入行，當時出面啲人工幾千蚊㗎咋，嚟碼頭揸「怪獸」（貨櫃起重機）有萬二、三叫好工喇，所以咪入嚟做囉。做咗十幾廿年，見盡碼頭嘅黑暗，真係忍無可忍。
我哋 06年已經要求調整番啲人工，冇話硬性要加幾多，點知都冇人理我哋。我哋班工人日日搵命同佢哋搏，亦知班外判賺好多，我哋要求調整啫！咁都唔得？冇人敢出聲，我咪出聲囉！其實我同好多香港人一樣，好怕搞事，以前從未接觸過工運，當年已經有人叫我唔好搞事，話會炒㗎，以前亦真係有人試過想加人工，但跟住好快冇得撈。
我做咗咁多年冇所謂喇，個仔都已經 10歲，要炒我咪炒囉！家人知道我今次搞罷工，佢哋都好支持。我就係因為搞對抗，喺今年 1月 1日 8點收工，突然就被人炒咗，班工友都戥我唔抵。𠵱家派津貼我冇份攞㗎！但冇所謂！我仲有儲蓄，生活費暫時都冇問題，我要等全世界都知班碼頭工人幾辛苦，𠵱家件事連英國 BBC亦都有報道，全世界都知班外判商有幾咁賺盡！
我成日上網見 facebook咁多群組有咁多人 like，我咪試吓搞碼頭工人 facebook。開頭得 100人，自己同兩位拍檔阿駒、阿翁一齊叫班工友加入，𠵱家都有過 18,000人 like，估唔到 facebook咁勁。我未有打算住呀！將來等班兄弟加咗人工先啦！

撰文、攝影：娛樂組