漫遊毒物

Free玩高達免屈機《 MOBILE SUIT GUNDAM BATTLE OPERATION》

乜話？又係高達？作為真正「男人的浪漫」，到我抱孫嗰陣可能仲玩緊馬沙反擊戰。就睇近期推出呢隻《機動戰士高達－激戰任務》，唔單只係高達系列首隻官方中文化遊戲，而且仲加上大熱嘅《 GUNDAM VS GUNDAM》式玩法，最多更可以 12人同房對戰已不簡單。怕佢好似《 GVS》咁屈你畀 cash買機體？唔使驚，筆者試玩發現，大部分機體都能免費玩到，絕對唔屈機，難怪一出就引到各路 fans上網開戰啦！

機種： PS3
廠商： NAMCO BANDAI Games
類型： ACT
人數：線上多人
售價：免費
Playstation Network下載

登場機體

陸戰高達 

老虎 

大魔 

勇士 

12人大混戰

遊戲以高達故事最傳統嘅「一年戰爭」時期做背景，出現嘅機體肯定係認受性最高。玩法係分成自護同聯邦兩邊，機體則分成泛用、格鬥同支援 3種屬性，各自有相剋特點，所以唔一定用高達就贏。一開 game就發現必須 online玩，似一般 FPS咁分房，最多可以 12人同房、 6對 6咁對戰，比起《 GVS》最多只係 2對 2，刺激感直情超絕× 3 up！而各種機體仲能夠由玩家改裝同塗裝，可應付唔同場地需要之餘，更有 style。

一開 game粉絲就大讚佢同時有齊港、台翻譯，香港人唔使驚高達變鋼彈、自護變吉翁，細心！ 

遊戲好考團隊合作，英雄主義只會累街坊，死衝冇用！ 

要鬧反而係集齊 12個 friend一齊玩的話，都會有 lag機情況，乜唔係有大中華 server咩？

做個真實駕駛員

煲咗一排，筆者覺得隻 game最真實係駕駛員可以離開機體，幫機體做緊急修理或者放地雷等人中伏。再唔係，拎起支火箭炮去射人都得，玩法夠晒多變。雖然遊戲係免費，唔使錢就可以下載試兩手，但就會類似手機玩 app咁，每次開戰都要消耗 1點出擊能源（油），如果唔想等兩個鐘靠系統畀 1點你，就需要畀 HK$8買 1點油，一次過買多啲仲會有 discount。另外，想快啲有勁機或武器設計圖，都可以用錢解決。

隻 game畀你用駕駛員走來走去，不過你唔係多蒙同東方不敗，唔可以拳腳打爆機動戰士，都係拎火箭炮啦！ 

駕駛員好處係細粒，靜雞雞深入敵陣放炸彈都冇人知。 

如果你有 PSV，仲可以下載個 app帶住 PSV隨時隨地組裝愛機。

任砌高達 GUNDAM BREAKER

如果嫌隔籬隻高達最多都係改 parts同上色，未夠 free，咁呢隻 6月發售嘅《 GUNDAM BREAKER》應該更啱你！入面每部高達其實都係模型，風格、遊戲節奏都唔玩真實，較近《高達無雙》咁爽快。最正係對手隻模型比例可以同你完全唔同，你用 1/144渣古，對手可以用 1/60嘅高達同你打！仲畀你 customize埋機體，大魔頭夾高達身再拎老虎把熱能刀，咪話唔霸氣！而且連舊化塗裝、拋光處理等都有，冧埋砌開模型嘅 fans。

機種： PS3
廠商： NAMCO BANDAI Games
類型： ACT
人數：待定
售價：待定

1/144對 1/60嘅高達模型決戰，場面好爆笑，究竟大隻嘅好抽，定細隻靈活有着數？ 

改機自由度冠絕所有高達遊戲同模型，淨係呢部元祖高達加 Freedom再加吉姆，都睇到 fans大呼過癮！ 

為求更有模型對打感覺，經常會出現斬到甩皮甩骨場面，而場景亦有輪盤、餐枱等人類擺設。

撰文：熊俊彥