新車激試

電動宅急便　 Mitsubishi MINICAB MiEV

係人都知香港島啲路面係點？主要由橫街窄巷、上山斜路組成，路旁有店鋪又或是豪宅，所有揸搵食貨車嘅司機都怕咗嚟呢區，相反呢區嘅住客、鋪頭又怕咗貨車嘅廢氣同噪音。既然係咁，最新到港嘅三菱 MINICAB MiEV電動 van仔就啱晒喺港島開工！冇廢氣、冇聲、車身細、仲要大扭力。環保企業係時候劏晒啲電油車仔嘞！

Mitsubishi MINICAB MiEV Spec.

驅動電池： 330V、 16.0kWh鋰離子電池
摩打馬力： 41ps/2,500-6,000rpm
摩打扭力： 20kgm/0-3,000rpm
100%充電時間：約 7小時
續航距離： 150km
傳動： 1前速自動
懸掛：前麥花臣支柱、後三連桿
制動：前透氣碟、後鼓式
車身： 3,395× 1,475× 1,810（ mm）
車重： 1,110kg
車價：$358,800
查詢：環宇汽車（ 2721 1111）

玩電動車，三菱都算係本港市場先鋒， i MiEV就係全港首款公開發售電動車。 MINICAB MiEV其實發源自 i MiEV，底盤、動力系統、電池等，全部來自 i MiEV，但就換上一個 MINICAB車殼，方形 cute車身反而一啲貨車味都冇，相信唔少鍾意玩 Box Car嘅人都會 buy，但記住揸佢要有 2號牌先得，而且牌費要$2,229/年，同一般貨 van一樣，冇 so！

齋車身可塑性高

本港三菱代理一直以來都冇引入過 MINICAB，原因好簡單，冇市場。因為汽油版 MINICAB採用 660c.c.引擎、 4座位，你認為佢載重貨後可以夠力上山頂嗎？ K-Car規格嘅商用車根本難以生存，所以代理索性引入 MINICAB MiEV，打出環保旗號，一定比 K-Car更有綽頭。 MINICAB MiEV由外到內都係一部齋到冇得再齋嘅車，全車冇多餘扮嘢設計，一個方盒車身，再加上幾近絕種嘅 12吋鐵皮軨，呢啲先係搵食車嘛，買返去點玩都得！除此之外， MINICAB MiEV都用雙趟門，當然冇什麼電動遙控功能，因為根本冇後座乘客要招呼，做送貨嘅壯男冇理由被兩隻趟門難到啩？

終極 Pick up最好用

日本廠方其實仲有一個 Pick up版本 MINICAB MiEV，全車只得車頭一個屋仔，而尾箱冇頂，兩側加活動門，可以三邊都放低方便上落貨，其實都好適合工程公司用，售價比硬頂版平 4分 1，不過據知唔會到香港。

最早到港 Fiat Doblo EV

去年 8月 Fiat已經引入 Doblo EV，代理可以為車主申請「綠色運輸試驗基金」，車價可以由 50幾萬減到$260,000。不過呢部車其實係由意大利 Micro-Vett公司改裝，將原有 5速手波改為兩速半自動波，擁有 82匹馬力，可持航 180km。

搵食車都有心思

其實喺日本， MINICAB MiEV都係一部實而不華嘅貨車，同 i MiEV嘅私家車定位好唔同，所以車廂中控台上都用最普通裝飾，有冷氣已經好好，代理仲加埋大面板車機，算係有少少得着。不過，其實車廠設計車廂設備時都有用過心思，照顧到搬嘢搬到滿頭大汗嘅運輸大佬，好似冷氣出風位同杯架合二為一，只要開冷氣，任何時候都有冰凍飲品！此外，雙座位設計其實幾討好，外表望落好似又薄又唔夠承托，但事實係筆者坐住佢上落山頂彎路，腰骨都未有投訴。

駕駛艙簡單到不得了，有冷氣、有音響已經唔錯嘞。 

上落貨方便過人

雖然車身只有 3,395× 1,475× 1,810mm，比本港最常見嘅 Hiace短 1,300mm！但呢個車身正正係 MINICAB MiEV優點，走入中環窄巷同山頂小路簡直完美！一般車調唔到頭嘅路，都可以輕鬆調頭。而且因為車內只有兩座位，車內載貨空間可以有 1,935× 1,370× 1,230mm，直入 3部單車都仲有位剩！此外，雖然車底裝有電池同摩打，但側趟門上落車位置離地只有 415mm，泊喺窄巷上落貨方便過好多大貨 van。

座位外觀齋到暈，但出奇地有唔錯承托力。 

雖然車底有大量電池，但都可以做到 415mm特低離地距。 

測試車只係未裝上隔網，但都見到尾箱超大。

實在適合本港用

據廠方數據， MINICAB MiEV嘅動力設定同港版 i MiEV有啲唔同，馬力少咗 23匹，扭力多咗 1.6kgm， MINICAB MiEV充滿電可續航 150km，比港版 i MiEV少 30km。筆者試車當日冇試盡佢，因為榨盡電力冇意思， MINICAB MiEV只適合喺類似港島嘅小路用，例如花店送花、薄餅店送外賣、又或係郵差送件， 150km足夠有餘啦！你唔會叫赤柱薄餅店送外賣去屯門啩？此外，電動摩打扭力輸出超強，達到 20kgm，只推動 1,110kg車身，就算載滿重貨再上山，都一樣易過食生菜啦！汽油版最多只有 8.8kgm扭力，點同佢比？筆者試車 3-4個小時，上落中環同山頂，只不過用咗 3格電量，還車前特別走去天星碼頭快速充電，用咗 15分鐘就充到 82%完事，而且完全免費，只需要畀停車場錢就可以，方便程度係就係唔及油站，但仍可接受。

單速自動波設有「 ECO」及「 B」波，作用都係為慳電及增強制動效果。 

表板源自 iMiEV，中間指針表顯示電池及放電狀況。

摩打同電池組全部放喺車尾底，騰出更多車廂空間。 


天星碼頭停車場只有一個快速充電位，約 15分鐘就充電到約 80%。

快速及慢速充電插頭分別置於車身兩邊。 

後記　配套致命傷

筆者對 MINICAB MiEV充滿期望，覺得喺香港其實大有可為，但卻面對唔少問題。首先，車價達$358,800，同 i MiEV比較，只平$36,200，比大部分柴油 van都貴近 10萬！小企業幾難入手。此外，香港島只得 3個快速充電站，分別於天星碼頭、赤柱廣場，同海怡半島，其實唔夠用。慢充電站雖然多，但要充成 7粒鐘充滿，最可恨係經常被無良汽油私家車車主霸位，令到電動車主享用唔到，似乎車廠已 ready，係配套同公民教育未夠。

日本方面提供多款拉花示範，真係咩行業都啱用。 

撰文：袁國基
攝影：葉偉豪