石鍋家鄉扣肉飯餐$33
秘製南乳醬帶椰香，新鮮荔芋煮得鬆化入味。午餐送無味精老火湯，熬足四至六小時。

庶民飯堂

素食大包圍蓮花新派健康料理 元朗

2013年02月21日 ~~ 第1198期 香港《壹周刊》

每逢初一、十五，阿媽都要食齋，菜式來來去去嗰幾味：芋頭魚、素雞、羅漢齋，悶到我識背。幸好，今年入元朗拜年時，發現一間新開素食店，單看餐牌已甚有驚喜：石鍋扣肉、流沙魚塊、鰻魚飯——街坊素食店竟然有得食西餐同日本菜？

正值午餐時間，店內擠滿客人，幾乎每張枱都有石鍋飯，一於嗌嚟試試。上桌時滾燙熱辣，洋溢南乳香氣，大豆製的仿扣肉爽口彈牙，沒有一般素食店的通病——油膩。大廚謝師傅出來問食客意見，傾談下才知道，他入行二十多年，第一次執掌素食店。「我想將西式、日式、越南菜、印度菜與素食玩 fusion，創新派素菜。」就算是傳統中菜，謝師傅也選擇意想不到的組合：石鍋扣肉，連食齋三十多年的老街坊也說未見過，難怪成為新店招牌菜。但沒有肉，點做到夠味？「靠汁醬帶起，口感可以做到七八成似。」素菜主要材料是蔬菜、大豆和菌類，不用任何葷類如蒜頭、葱、韮王等，只能靠技術來調味。謝師傅說：「我用麵包糠炸魚，效果十足椒鹽魚塊。還有用香茅葉、黃薑製作印尼沙爹，連小朋友也愛吃。」


士多啤梨咕嚕肉$48
用新鮮番茄煮汁，酸甜開胃。大豆製的咕嚕肉外形似到十足，咬落滑嫩易入口，沒半點油膩感。


鰻魚紅米飯$40
自家製日式燒汁夠惹味，仿鰻魚底部鋪有紫菜，與健康糙米飯口味配襯。


焗芋蓉黃金流沙魚塊飯餐$33
即叫即焗，芋蓉加南瓜醬香甜可口，口感豐富，餸菜分量甚多。

蓮花新派健康料理

地址：元朗昌盛徑 18號元通樓地下 9號鋪
電話： 2475 8218
營業時間： 11am-10pm

撰文：鄭鳳
攝影：胡春輝