close

 

恕我膚淺，當初我望文生義、先入為主，把卓韻芝去年的楝篤笑《死去活來One Night Stand》，解讀為另一個販賣情史的口水騷，偏偏她的楝篤騷是講70、80後在理想與生活之間的困擾與糾結，還強調是關於笑中有淚的life journey。

 
「我返嚟香港同朋友傾偈，有邊個唔係有理想？邊個唔憎自己份工？個個都有自己嘅理想，細如搞隊波，大如開咖啡店。大家都諗呢一刻退唔退呢？兩萬零蚊都幾好㗎喎，有望供到樓喎，如果我走去搞咖啡店可以好大鑊喎！還是返去做嗰份日日唔想起身返嘅工呢？呢啲掙扎就令到自己在人間死去活來囉！《死去活來》唔係佈道大會，我唔會講一句做人道理，大家笑完再諗番，自己係咪經歷緊同一樣嘅嘢呢？理想，追唔追呢？幾時追呢？肯放棄犧牲幾多？」 即是卡夫卡在《變形記》中探討資本主義壓迫人性的問題啦。誰不想老闆恩准停薪留職，讓其闖蕩；或者，如阿芝般只是個快33歲的「高齡青年」、但有指已擁千萬身家，方可無後顧之憂。 這條殘酷的選擇題，我決定以卡夫卡的日記回答：「不要絕望，甚至對『你並不感到絕望』這一點也不要絕望。恰恰在似乎一切都完了的時候，新的力量畢竟來臨，給你以幫助，而這正表明你是活着的。」大抵，死去活過來的卓韻芝，最明白。

華麗的挑戰
09年，阿芝辭去了任職16年的商台DJ高薪厚職，赴英留學唸了一年Fine Art，後來又跑回香港繼續寫書、拍短片、開楝篤笑，還拍了脫毛和護髮用品廣告。跟TVB合作的清談節目《芝人口面不知心》，上月底已在J2播出，下月重演的《死去活來One Night Stand Again》棟篤笑，爆滿宣布加場。工作量不少，但總給人遊戲人間的感覺。早慧的人，從來不愁選擇。
但其實好多廿零歲、三字開頭嘅人都經歷緊呢個moment㗎！究竟應該去搵你嘅理想，定係既然份工穩定落嚟都係唔好轉，喊住都繼續做到退休？趁我家仲可以轉行，仲可以搵幾年理想，之後先翻兜？好似在一個好成熟穩重嘅男人同一個好玩得嘅靚仔之間抉擇咁，家呢一刻應該揀邊一種life呢？
當初一個人去到外國，要住宿舍同人共用廚房要洗碗，到返嚟香港發現，死喇，job又quit咗，做咩好呀？搞間鋪呀？不如搞楝篤笑啦！其實有人搵過我拍鬼節目添，但我怕鬼唔得。旅遊節目都有，但我真係未做過personality show，所以《芝人口面不知心》真係一個好大嘅挑戰。我做一個電視節目嘅host太新喇，我應唔應該講自己嘅嘢呢？我驚觀眾會諗點解個主持講自己嘅嘢嘅？有啲網上comment我好鍾意，好似話「我想啲燈再暗啲同飲緊酒」。但其實我嘅夢想係做《今晚不設防》囉！


我覺得人生太短暫啦，冇時間去講一啲我唔想去講嘅嘢，亦冇時間去對一啲我唔鍾意嘅嘢話鍾意！我成日都會喺個心度提醒自己，我唔可以畀自己浪費青春。我係一年比一年心急，其實身體係全世界最坦白。我以前可以連通四晚頂，做完嘢去蒲，家只可以通一晚頂要瞓四晚。
早前有個朋友話畀我知，佢媽媽想環遊世界，直到仔大女大又夠錢啦，到對腳行唔到，嗰種諷刺，我唔想變成咁，我想我後生有咩想做就做咗先。家唔拉吓條筋，3年後未必拉到。

死亡從不遙遠
在我生命裏面，死亡係一個好近嘅題目。我愛嘅人死（指卓母），我自己嘗試過去死，所以「死亡」係好近。你活多一日就係少一日，所以嗰次（自殺）經歷對我嘅人生有個好根基嘅改變。唉，好彩死唔去啫！介不介意自殺一事經常被人重提？我面對到我自己做過嘅事，唔會閃閃縮縮，做過就做過囉！
雖然好老土，但係我覺得屋企人嘅支持真係好緊要。有時做得勁攰，會有一刻好迷失，自己喺度做緊乜呢？有冇意義呢？但返到屋企又會有碗西洋菜湯等緊你，咁你就會明白努力做嘅嘢係有意義。我知係老土，但係我試過有晚飲湯時想喊，當時婆婆已經瞓咗覺。我17歲時已搬走咗，但有時候會覺得有一個責任去照顧佢哋，而唔係俾佢哋照顧囉。啲人成日同我講「你真係孝順，照顧婆婆」，其實唔係，家我會覺得係婆婆照顧我。
由細到大我都有樣嘢唔使煩惱，就係錢。我未經歷過要煩養家、冇煩過冇錢畀家用。曾經有段時間我好大使，因我唔知道搵咗啲錢應該用嚟做咩。當你見到有人會用10萬蚊去買部電話嘅時候，你知道佢係唔識點用錢。有一段時間我就算等人都要買2萬蚊衫，其實我只需要企係度等15分鐘啫，都走咗入去買衫，仲要唔試，買咗返去又唔開，一袋袋紙袋放喺度，到半年後先發現。


又試過在北京食飯要買起人哋張枱。嗰段時間因為不停工作，自己會覺得有咩可以擁有、可以玩吓呢？不如買張枱啦！其實搬咗返香港又點，一樣用嚟寫稿，一樣俾人追你交劇本追到死！最記得17歲生日，送咗條好貴嘅鏈畀阿媽，當年買咗10萬蚊，我只係要話畀媽咪聽，我係有能力做到㗎。廿歲女已經經歷咗2年咁樣嘅生活，跟住突然間覺得呢啲嘢係冇意義，唔知自己做緊乜。
基本上我係一個童星，童星到最後一定會吸毒、醉酒，最後好似Drew Barrymore走入正途，或者好似冇走入正途嘅Britney Spears咁，但我又冇喎，咁咪渣囉！（自殺都不算走歪？） 嗰啲都唔係真曳，真曳係街頭醉酒呀，跟住除咗衫呀，咁我都未算曳過，好cheap囉！

我很無奈
講感情嘅話，我都數唔齊拍過拖嘅男友有幾多個，最多咪係MJ（樂隊Mr.成員）同陳輝陽（音樂人）！總之家我仲物色緊男朋友。有拍拖扮冇拍拖，或者冇拍拖扮有拍拖，我都唔覺得係大罪嚟。
所謂嘅慾照，只係我哋（與法籍模特兒）影緊本新書《活得像戀人》嘅封面。我哋影完之後決定自拍。當時我已寫咗一篇文講自拍，但因為張相像數太低先冇用。我好多謝高登仔留意，我一路以為高登仔唔關心我。當我流出呢張相在微博時，有個女仔留言話「我很無奈」。因為你覺得一個藝人唔應該做呢啲嘢？任何人都唔應該做呢啲嘢？定係唔鍾意阿芝做粗口手勢？我覺得要反省番真係令人覺得唔舒服嘅地方，而且其實我又冇露肉！我啲fans 唔會話我以後唔鍾意卓韻芝，有啲仲話「幾靚仔吖，識食喎」！
我唔係一個幾肯講感情同煩惱嘅人。我好男人㗎，一句「飲杯嘢吖」，啲friend 就feel到「你係咪唔開心呀」，我就話「飲啦」！我會等時間慢慢消化，慢慢就會釐清一啲問題。多數情況做電視節目、做電台、做talk show、甚至做訪問，都係我講，所以有時候需要放低自己，再唔係性格巨星喇，而係一個聽人講嘢嘅朋友。


朋友問到，我會講，但我諗我唔識將唔開心嘅事講出嚟。就連我寫嘢都好少寫自己，有次我有個講情感關係嘅網劇叫《男女字典》，講三個女主角同一個基仔杜汶澤。有個朋友問邊個係我（指角色性格），正如啲人睇《Sex and the city》會諗自己係Carrie定Charlotte，但其實冇一個係我，我冇興趣寫番自己啲嘢落去，我鍾意創作。正如我睇《Sex and the city》都唔覺得自己似四個女主角，因為我一定係Mr.Big！
對，Mr. Big總是很高傲，懂的事很多，會教你怎麼辦，來無影去無跡，能夠享受孤獨，卻又不告訴你他在快樂什麼。我看，根本就是卓韻芝本人。

青春期最幸運的事
那些年的卓韻芝，是個「好奇怪」的女孩子：「我細個已經聽啲奇怪音樂，阿媽以為我入咗邪教，跟住去睇啲懶深嘅書、歐洲電影呀。讀中學（嘉諾撒聖方濟各書院）時我日日都去踩冰，然後去飲啤酒。我小學時候已經喺學校賣Yes咭，賺好多錢，多錢到會送80蚊一本嘅紀念冊畀同學。細個已經喺呢啲位搵到奀皮嘢。」同是童星出身、讀屋邨學校的林一峰，反而跟我說過，假如自己在名校長大，必入歧途。「如果我在一個可以有權say no、有權去質疑個制度嘅環境長大，太早、太有自己嘅睇法而又做得到嘅話，咁就大鑊嘞！可能今日我已經死咗，一係被人打死，一係就闖禍死咗！」看來阿芝能被商台這playground一早收編，才是比靈根早慧更幸運。 ####


由細到大我都有樣嘢唔使煩惱，就係錢。


《死去活來One Night Stand Again》下月在會展重演三場，阿芝上次於演藝台上摸過古天樂、張智霖和黃宗澤，今次揚言想摸黃德斌、陳豪和林保怡。


阿芝說貪玩自拍「慾照」時，共有十多位工作人員在場，跟法籍model只是朋友關係，但上週三（15日）又被拍到二人在尖東海傍手拖手食雪糕。


今月9日阿芝被拍到與年約30歲、貌似祖迪羅的德籍金融才俊於中環蘇豪親密遊街。


阿芝自去年返港已被TVB一直邀請合作，「我之前聽到好多傳聞，話TVB製作好求其，但做落又覺得幾認真吖！」


09年，阿芝遠赴倫敦入讀Goldsmiths University讀Fine Art，「嗰度完全係另一個世界，讀Art嘅人癲㗎，我去到都只係假『弗』，有太多奇遇夠我開騷嚟講。」


我唔係一個幾肯講感情同煩惱嘅人。


阿芝與樂隊Mr.結他手MJ於08年底拍拖，更公開讚男友眼球生得性感而想舔，愛得大膽。


自幼父母離婚，阿芝與母親關係親密，至06年10月更因惦念患癌逝世的母親而服藥自殺，她返港後與婆婆同住至今，相依為命。


阿芝14歲加入商台，16歲已有自己電台節目，少年得志，「我諗係因為我嘅古怪，令電台覺得既然收咗7個叻人（指招募），點都要收個怪嘅。」《蘋果日報》圖片

卓韻芝洩攬仔床照超激

arrow
arrow
    全站熱搜
    創作者介紹
    創作者 litalife 的頭像
    litalife

    818 娛樂八掛大放送★

    litalife 發表在 痞客邦 留言(0) 人氣()

    E-mail轉寄