close


蠢係有極限！退選啦！真實對白
本刊週一（20日）踩上咳神其太子約500呎的單位內訪問，他一講起唐唐就唔停口，知道他獲379選委提名，正式參選特首後，咳神忍唔住大叫：「退選啦！」

唐英年「唔覺意」將九龍塘約道7號豪宅地牢挖深又僭建2,200呎，搞到要搵老婆食死貓，但你有你鬧，唐英年週一攬379個選委提名，正式參選特首。
全城怒插謊唐冇膊頭冇腰骨，09年開始插手政治漫畫而上晒位的40歲插畫家咳神（Cuson，盧熾剛)，以一幅「比堅尼唐太色誘唐唐」抵死抽水，短短一日吸引二萬幾人like爆。以黑色幽默代替激進派掟蕉，週一（20日）咳神接受本刊訪問時，坦言好自豪，更嘲唐唐：「蠢係有極限……佢退選啦！」又親手畫幅最新「唐唐點星爺」，手口繼續反唐。


幾年前從未同政治扯上任何關係的咳神（Cuson），曾經做過廣告設計，去年轉做自由插畫師。與30歲港女老婆CaCa Yu結婚4年的咳神，曾推出《港女老婆》系列漫畫，將港女行為，變成輕鬆笑料大受歡迎。勢估唔到佢惡搞謊唐一畫成名。

最新惡搞　謊唐點星爺
咳神應本刊邀請，獨家畫張新反唐圖，曾開記招高調撐唐唐：「我唔同蠢人做朋友」嘅星爺，被指僭建事件後，妖爆唐唐，咳神就食住timing，畫張「謊唐點星爺」贈興，唐太變秋香幫老公頂。

地牢噴酒hit爆
簡單一幅圖經已寸爆卸膊唐唐，吸引2萬人畀like狂讚，連咳神自己都估唔到反應咁好！

崇拜毓民
97年咳神聽到黃毓民的商台「烽煙」節目《毓民七鐘敘》，發現毓民博學多才，從此成為癲狗的死硬粉絲兼開始留意政治新聞，後來更義務幫人民力量畫漫畫出Q版公仔，有時間更會去遊行示威，絕對係熱血中年。

「唔應該搵老婆頂」
其新書出爐，亦有搵偶像毓民寫序，fans變老友。週一，在其太子約500呎單位內接受訪問時，咳神難掩自豪話：「我都估唔到幅畫咁大回響，多咗廣告同政府部門搵我做嘢，其實一個人蠢係有極限，呢單嘢（僭建事件）佢應該搵個好啲編輯去編呢個故仔，唔應該搵老婆頂，要頂就自己頂，不過呢單笑料帶挈咗好多人，好似我咁，（惡搞圖）帶畀好多人歡樂。」其實咳神兩年前的一幅政治插畫《邪惡雪姑七友》已衝出香港，遠至克羅地亞亦有雜誌希望轉載。「我細個冇學過畫畫，只係F.5後讀過白英奇同IVE嘅設計課程，一畢業就入咗廣告公司做插畫師，一做十幾年，到上年決定辭職，家主力幫報刊畫吓畫，總算搵到兩餐！」

創意爆棚
唐唐豬為選特首寧願陷老婆於不義，唔少網友睇唔過眼，喪鬧之餘更發揮創意自製惡搞圖，不過一早成為惡搞對象嘅唐唐早前表示會尊重市民創作自由。面皮幾尺厚，唐唐又真係幾啱做特首喎！

詹Sir笑唐唐硬膠膠
網友愛惡搞，就連舞台劇大師詹瑞文都即興拍咗條用粗口諷刺唐唐嘅短片《詹瑞文笑唐英年做男人硬膠膠》上YouTube，其中：「我俾人話我硬膠……我只係鍾意酒窖……」上週四（16日）記者會後，詹Sir再加埋蝦頭整多條《硬膠人生》，好抵死。 ####


視毓民為民主鬥士，咳神（右）當年親自將毓民畫像送去對方嘅食店博取偶像歡心，從此成為好友。


除咗政治漫畫，咳神亦有關於愛情嘅作品，其中《我的港女老婆》系列數盡港女惡行，勁受年輕人歡迎！


咳神同老婆CaCa（左）07年認識，現職政府庫房部電腦程式員，freelance做make-up artist嘅太太，雖然對社運興趣不大，但非常支持老公。


唐唐豬笑料百出，咳神早前又以唐唐做題材，將佢打拳「英」姿畫出嚟。


咳神其中一幅名作《雪姑七友》，將劉慧卿畫成邪惡版白雪公主，而民主黨台柱成員李永達、何俊仁等就變咗七友，啜核到爆！


咳神兩公婆搏殺搵錢，搞到租住大伯嘅單位，都冇時間執。


地下唐宮曝光，「有膊頭」唐唐竟然擺老婆上枱，搞到攬晒上身嘅唐太喊住道歉，唐唐就一副甩身樣！美聯社圖片


網友創意無限，將唐唐僭建事件惡搞成多款電影海報。


詹Sir一向轉數快，今次抽水快人一步，網友都覺得夠晒貼題，抽得好！

arrow
arrow
    全站熱搜
    創作者介紹
    創作者 litalife 的頭像
    litalife

    818 娛樂八掛大放送★

    litalife 發表在 痞客邦 留言(0) 人氣()

    E-mail轉寄