二人站在台上傾偈，邵家臻（左二）話， Scott當時聲稱有「好消息」，仲有緊要事要同陳惜姿講。（ SocREC社會記錄頻道圖片）

八卦陣

CY前助理扮代表　鐵證曝光

2013年02月21日 ~~ 第1198期 香港《壹周刊》

早排國民教育家長關注組出版新書《爸爸媽媽上戰場》，大爆上年九月七日， CY前私人助理鄭希喧（ Scott）自稱代表中聯辦，邀請召集人陳惜姿與中聯辦單獨會面。事件被踢爆之後， Scott至今仍然潛水，唔肯現身回應。

本刊就喺「 SocREC社會記錄頻道」當日拍攝嘅片段入面，發現 Scott嘅蹤影，原來佢先後兩次走上台搵邵家臻搭路。
邵家臻回憶，在○八年 CY出席由佢主持嘅 TVB節目《一百萬人的故事．全民開講》時認識當時做緊 CY助理嘅 Scott。去年九月七日十二萬人圍政府總部當晚， Scott突然現身走上台搵佢，話有啲好緊要嘅事一定要同召集人陳惜姿講，不過邵因為知道佢係 CY嘅人，未敢即刻聯繫，再三問佢乜事， Scott只係話︰「唔講得，但真係好緊要！」邵家臻於是問「係咪一個好消息？」 Scott靜咗一秒，就答係。於是佢就幫 Scott搵家長關注組嘅成員聯絡陳惜姿。不過，陳惜姿企硬，堅拒與中聯辦單獨會面。
據邵家臻憶述，當晚 Scott同陳惜姿傾完電話， Scott又再上台搵佢話︰「依家已經唔係 CY嘅事，係中聯辦嘅事，只要陳惜姿肯同中聯辦單獨見一次面，件事就可以搞掂。」
邵形容當時 Scott煞有介事︰「佢仲話政治唔係咁玩，唔傾無得玩，又話自己搞唔掂無得走，叫我幫手勸陳惜姿。」不過，邵最後並無再理佢，而 Scott亦無癮地離開。
本刊多次聯絡 Scott求證，但佢依然唔聽電話。其實自 CY贏咗特首選舉後， Scott無份入「熱廚房」，忽然掉轉槍頭喺去年六月撰文批評 CY處理僭建風波同政府改組議案等問題，話佢俾市民「專橫霸道」印象。之後 Scott喺立法會選舉期間幫過何君堯同泛民嘅甄文星做公關，依家就去咗港鐵事務部擔任公關，負責新項目同物業發展。（林璐菁）


去年九月七日當晚，身穿藍色恤衫嘅 Scott上台搵邵家臻（右三），同場仲有吳志森（右一）同發緊言嘅林輝。（ SocREC社會記錄頻道圖片）


自從《爸爸媽媽上戰場》出版，大爆 Scott自稱代表中聯辦，要求與陳惜姿見面後， Scott一直深潛。


Scott（右）擔任 CY嘅助理足足六年半，以往逢親 CY出現就見到 Scott，儼如其背後的男人。不過，其後 Scott並無入到 CY嘅熱廚房。

長毛 sir孭書包

上週六，即係人日，長毛同大約十名社民連成員去禮賓府向 CY「拜年」，仲帶埋個露出屁股嘅假人梁振英，大街大巷打屁股。長毛話，佢要化身長毛 sir，教授國民教育第一課：「民無信不立。」佢仲話，由於 CY大話蓋大話，無晒誠信，所以要打佢 pat pat，鞭撻同鞭策吓佢。
當日長毛 sir孭住個黑色背囊，仔細一望，上面竟然用原子筆寫住「 long hair長毛」，十足十幼稚園學生要喺書包寫名咁。原來長毛前年自資買機票跟「無家者世界盃」嘅香港代表隊去巴黎嗰陣，為免喺球場內人多袋又多，同人撈亂背囊，所以就寫咗自己個大名上去。（林璐菁）


長毛孭住「 long hair長毛」背囊，依然霸氣十足。（鄒潔珊攝）


長毛阿 sir上身，即場向 CY施以體罰，教導大家千祈唔好講大話。（鄒潔珊攝）

元宵佳節對對碰

下星期日就係正月十五元宵佳節，記者同大家分享吓幾 pair人嘅靚相。（馮普賢）


（蔡正邦攝）

過年前，記者見到董生董太在中環香港會食飯，兩個鬼咁恩愛，拖到實落樓。
今年係沙士爆發十周年，大家實記得當年董太成副生化裝備去牛頭角下邨叫人「洗手洗手洗手」個經典 look。之不過，無論佢點怪、形象點負面，董生董太結婚五十二周年，執子之手，與子偕老，確實唔容易。 


（鄒潔珊攝）

呢一 pair，真係唔識點形容。話說立法會議員莫乃光（左）同梁繼昌（右）約記者茶聚。佢哋話，响年初三當晚，兩條友都無嘢做，各自單拖去金鐘太古廣場 AMC睇《黑殺令》，點知佢哋唔只睇同一場戲，仲要買埋隔籬位！梁繼昌睇睇吓戲發覺隔籬條友係咁望住佢，原來就係莫乃光，梁繼昌仲話當時驚訝到大叫咗出嚟添！
其實，係你哋真係心有靈犀，定扮晒緣分的天空咋？ 




話說，記者前排在中環陸羽門口，撞到兩個十指緊扣嘅男人，望真啲，其中一個係大肚腩兼嚴重地中海嘅中央政策組首席顧問邵善波，另一個就係前排幫 CY主持施政報告諮詢會嘅盧瑞盛。雖然兩個都係梁粉，但無人講過佢哋係搞呢科！
好彩，原來佢哋只係咁啱撞到，肉緊得滯，拖住手咬吓耳仔啫。放心放心，唔好誤會，唔係搞嗰科！