探熱針
吸血裝修 豪搞錄音室 陳奐仁被當水魚
業主逼遷
年前陳奐仁因為業主賣樓，被迫壯士斷臂，放棄原有的錄音室，無地方做音樂，去年他索性轉攻幕前，拍劇、拍電影、做舞台劇再開演唱會，搵得到之餘，仲攞埋金像獎最佳新演員。
不過，音樂始終排第一！陳奐仁對重搞錄音室一直未死心，早前他終於在黃竹坑找到合適地方，並第一時間搵裝修公司報價，重張旗鼓。
「我見到張報價單嚇 咗一跳，成二百六十萬，普通一道實心門都收七千，我同對方講唔使實心門，都要收五千。」陳奐仁說。
位於黃竹坑的錄音室，幾經辛苦終於展開裝修工程，現在陳奐仁一有空檔，便落場監督工程。
陳奐仁來港發展數年，雖然去年音樂工作大減，但幕前不愁演出機會，初次拍戲便奪得最佳新演員獎。
唔敢加價
陳奐仁新碟《矛盾》，曲詞由他自己一手包辦，唱片封套亦找來著名設計師陳幼堅拔刀相助， MV又有金像獎剪接師黃海操刀，碌盡人情牌。
被當水魚的陳奐仁，新加坡國立大學經濟系畢業，當然識計數，見裝修公司開天索價，於是向地產界朋友求救，轉公司再親自落區格價，結果埋單計數只需百零萬，慳足一半有多。
「朋友話可能對方見我係藝人，所以先開價咁高；之後我同 BB（陳奐仁太太暱稱）都有親自跟實啲工程，免得再節外生枝，阻慢進度。」
除了掟過百萬裝修，錄音室在器材設備方面亦有加碼，不過陳奐仁強調自己無將成本加諸客戶身上，依然五萬一首歌，收舊價！
「依家唱片公司投資做碟好謹慎，好少會成張大碟咁做，多數都係 EP或者 Single，但我有番自己嘅錄音室，就可以做定多點歌，等人有得揀。」陳奐仁說。
泊黃栢高碼頭加盟太陽娛樂後，陳奐仁不但成為公司御用音樂人，今年還有機會返內地拍戲，跟內地導演李欣合作，由於他戲中角色是個土生土長上海人，稍後陳奐仁會跟老師上課，學好上海話，開創新天地！
陳奐仁開口埋口都提住太太 BB，還說要跟林峯爭用「 BB」這個暱稱，因為 BB是他叫先的。
據知陳奐仁的新碟主打歌，原本是寫給鄭秀文，但她聽過後認為陳奐仁比她更適合唱。
愛錫太太的 Hanjin，經常出雙入對，一起外出撐枱腳。
Hanjin泊黃栢高碼頭後，也成為公司的御用音樂人，稍後會有機會跟薛凱琪、小肥等合作。
前年陳奐仁因為錄音室受業主賣樓影響而無奈結束，轉攻拍電視劇，反而贏得不少師奶觀眾。
初入影壇的陳奐仁，憑處女作《李小龍》奪得香港電影金像獎最佳新演員。
市差唔易做
出碟唔賣錢，唱片公司縮皮，陳奐仁投資開錄音室，花費百萬裝修，還要提供一條龍服務，作曲、作詞、編曲全包。
張敬軒有契媽投資六千萬於廣州開錄音室，佔地三萬呎，頂級錄音器材，足以應付音響樂團高規格要求，設備齊全到連住宿都有，但開業以來，本地歌手預算有限，甚少幫襯。陳奐仁靠自己，錄音室要做到收支平衡，更不容易。 
留言列表
