萬人起跑一刻係必影場口

CLOSE-UP

渣打香港馬拉松 渣馬影相全攻略

2013年02月21日 ~~ 第1198期 香港《壹周刊》

呢個禮拜日，渣打香港馬拉松（簡稱：渣馬）開跑，今屆參賽人數又破紀錄，總共有成七萬幾人參加，無論 10K、半馬抑或全馬，身邊總有親友玩埋一份。
想幫手做啦啦隊兼影相留念？
咪住！影馬拉松話易唔易，如果唔知影相靚位喺邊，又或者霸咗靚位但只影到啲平凡相，就認真嘥料！
睇完今期影相攻略，包你可以扮影渣馬專家。

全馬影勻全港九
1.起點位

沿途呢啲位都有人影相，跑過記得精神啲。

必影指數：★★★★★
逼人指數：★★★★★（ 5★為最高）
等足一年，點可以錯過渣馬開跑一刻。李寬勝話起跑前其實仲多嘢影，「近年渣馬搞到嘉年華會咁，好多跑手著到全身奇裝異服，早啲起身捱眼瞓都值得。而且仲可以影到朋友熱身時認真樣，令全輯相更整齊。」而且半馬全馬各組賽事分時間起步，唔使擔心影完備戰相趕唔切霸起步靚位。 

2.奧海城

必影指數：★★★★
逼人指數：★★
跑手由圓方轉上天橋後，基本上九龍區賽道全部係高速公路，冇乜位俾人企。李寬勝話奧海城港鐵 E出口天橋底，原來可以企出馬路同跑手零距離接觸，「呢個位本來係行車路，不過當日會封路，可以偷雞影吓相，再加上距離夠近，影出嚟特別 sharp醒之餘，仲可以同朋友打埋氣。」 

3.西隧入口

西隧收費亭年年都逼爆人，要影靚相就要早些少去霸位。

必影指數：★★★★
逼人指數：★★★★★
半全馬參賽者折返經過奧海城，之後就會到西隧入口收費亭，可以再次近距離影相。平時由圓方行過去約莫十分鐘，不過，三位達人都話呢個位好多人，一定要早啲去霸位。 

4.IFC水站

IFC水站可以影到跑手飲水場面

必影指數：★★★★
逼人指數：★★★
出西隧後，聶永輝話雖然剩低嘅路段好近行人路，但如果想影特別相，最好企水站附近，「可以影到朋友潑水淋面、爭拎水場面，幾經典。」 

5.灣仔碼頭

文星話配合大廈低炒跑手，影出來更有氣勢。

必影指數：★★★★
逼人指數：★★★
去到比賽末段，好多人會想影朋友衝線，但文星話終點位選手先入得，銅鑼灣又太多觀眾，「加上兩邊有大廈，天氣唔好影出嚟嘅相灰灰沉沉，冇生氣。唯一可揀駱克道轉入東角道彎位，唔單只街景壯觀，見到 friend順便嗌兩句支持吓，佢就會發力衝刺，影出嚟較有速度感。」
文星話港島區最佳位置，首選灣仔碼頭，選手直頭喺側邊跑過，加上唔多人圍觀，上年文星索性坐住櫈仔影，「低炒仲靚呀！」 

半馬必到位　港外線碼頭

必影指數：★★★★★
逼人指數：★★★
半馬同全馬路線有一半重複，如果朋友參加半馬嘅話，李寬勝推介去港外線碼頭，「大會上年將路線由干諾道天橋改經中環民寶街，好多人都唔知嗰度影到靚相，而且半馬參賽者只係跑咗三分二距離，嚟到呢度狀態最 fit，仲有氣力擺到精神 pose。」

霸靚位

渣打香港馬拉松，賽道同樣長 42.195公里，最大特色係有大半賽道都係遠離民居嘅高速公路同大橋，除咗大會攝影師同工作人員，基本上冇人去到，所以剩番落嚟嘅影相位實在唔多。請教三位資深渣馬攝影達人，推介幾個去到又影到靚相嘅地方。

達人 Profile

李寬勝　香港長跑網（ longrun.hk）總幹事
○五年起開始影渣馬，近年仲負責網上召集影友，去靚相位幫跑手打氣兼影相。 




文星　業餘攝影師
「影齡」廿年有多，近年跑而優則影，三年來影過逾百次長跑賽事。 




聶永輝　香港運動攝影協會會長
每逢大型運動賽事都見其蹤影，影渣馬已近十年，對每個影相靚位瞭如指掌。 

提提你　前半獨家

青馬同汀九橋係官方獨家影相位

由於大半賽事都要跑高速公路同天橋，一般人根本去唔到，所以想要自己跑過青馬大橋、三號幹線嘅靚相，就要靠大會攝影師。大會沿途特別喺以下地點設置影相位，就算跑到幾攰都好，跑到呢度都要提起精神。事後只要上大會網站，就可以俾錢下載（每張相約$195）。 

影到盡

如果想幫半馬全馬朋友影多幾張相，唔係冇辦法。一影完起跑相，就即刻行過佐敦飛的去奧海城，然後搭港鐵去中環 IFC，最後先去銅鑼灣等衝刺；只要你朋友唔係紀嘉文或來自肯亞，就一定趕得切。

10K必到位　太古城天橋

太古城天橋影到萬人跑上馬路相，好有氣氛。

必影指數：★★★★
逼人指數：★★★★★
10K全程跑東區走廊，聶永輝話影相位除咗銅鑼灣興發街，仲可以去太古城對出行人天橋，「呢個位每年都係必爭之地，因為 10K最多人參加，高炒落去影出嚟勁有氣勢。」 

影跑心得

知道影相位喺邊但唔知點影，猶如捉到鹿唔識脫角，放相上 Facebook亦只會淪為普通洗版分子。
其實只要帶埋啱用鏡頭加特別構圖，輕輕鬆鬆就可以影出大師級靚相。

三鏡走天涯

Brian係香港奧委會攝影師，同時亦係渣打馬拉松大會攝影師，話影馬拉松帶三支鏡就通殺，「除咗用 70-200mm長鏡遠距離影跑手淺景深相， 24-70mm廣角至中距離鏡都好重要，尤其喺鬧市入面，低炒影跑手同大廈，最易表現到香港特色。至於第三支鏡嘅焦距唔重要，最緊要有 F2或以上光圈，先可以喺天光前影到有現場氣氛嘅相。」雖然 Brian話用閃光燈影會破壞現場氣氛，但如配合 1/30s快門加後簾同步閃燈，亦可以影到動感跑步相，視乎你孭唔孭到咁多裝備。 

高炒靠單腳

影咗渣馬四、五年，而家幫 U21.hk做義工攝影師嘅 Edwin都有貼士俾影友，「記得帶多張後備記憶卡，就算『死卡』都可以換另一張卡頂上。」另外，單腳架同快門線都唔少得，「影渣馬隨時要拎住部機幾個鐘，單腳架可以用嚟減輕相機重量，有需要時又可以舉高腳架影高炒相，唔使張張都水平角度咁悶。」 

斜路突圍

示範相
上斜位可以將朋友後面嘅跑手群當背景，效果突出兼靚過水平影好多。（ 400mm、 1/500s、 F8、 ISO 800）


水平位影馬拉松效果見慣見熟，睇落唔搶眼，感覺比較悶。

低炒特色

示範相
低角度唔單只可以影埋兩邊大廈，仲可以表現出朋友提腳嘅肌肉線條。（ 25mm、 1/200s、 F5、 ISO 200）


就咁喺旁邊影只見到馬路，張相嘅搶眼度完全靠朋友嘅表情同動作。

高炒震撼

示範相
用單腳架高舉相機，配合埋快門線同超廣角鏡頭，就可以影到有動感又有張力嘅起跑相。記得要輕微轉部機幾次，影多幾個角度。（ 15mm、 1/125s、 F4、 ISO 3200）


水平影完全睇唔到邊個跑手搶出，震撼力同氣氛都大打折扣。

捕捉心態

示範相
天光前只用大光圈同推高 ISO影朋友熱身，畫面偏黃，感覺凝重，完全表達出大戰一觸即發嘅氣氛。（ 50mm、 1/50s、 F1.4、 ISO 800）


用閃光燈影雖然畫面夠光，但除咗相中人著住運動衫同掛住號碼布比較特別之外，其實同行花市相差唔多。

裝備清單

DSLR單反相機（最好係全片幅相機）
70-200mm長焦距鏡頭
24-70mm廣角至中距離鏡頭
F2或以上大光圈鏡頭
1.4倍增距環
閃光燈
單腳架
兩張記憶卡

租機追馬

租相機時一定要睇清楚合約條款，有冇列明交還時限以及遲還罰款等。

就算有玩開相機，都未必有齊 Brian或 Edwin推薦嘅鏡頭及裝備。問唔到朋友借？可以使幾百蚊去租。專做租相機及鏡頭生意嘅 b3camera老闆 Rex，就提醒用家租機時要注意以下幾點。 

留意時限
租機時限一般以 24小時為計算單位，渣打馬拉松凌晨五點開始直至中午，最好喺馬拉松前一日（ 2月 23日）嘅下晝四點後租機，影完馬拉松仲可以同朋友食埋慶功飯先去還機，唔怕會超時。

熱門租罄
部分熱門長焦距鏡頭（如 70-200mm*）都幾搶手，如果租唔到，可考慮租一支 24-105mm再配搭兩倍增距環（例如 Canon EF 2.0X III），都有近似效果。

細心檢查
租機時一定要小心 check清楚鏡頭有冇問題，如果還機時發現有事，租機鋪會將鏡頭拎番原廠維修，維修費用將會喺按金扣除。

抵押代金
租相機同鏡頭都要俾按金，除咗用現金或信用卡支付，部分租機鋪接受「抵押」服務，可以用客人嘅鏡頭當抵押品，再俾埋餘下差額就得。

保險唔包
一部相機、一支鏡頭，閒閒哋都要萬幾兩萬蚊，可唔可以為租返嚟嘅裝備買短期保險？詢問過幾間保險公司，回應都指而家並冇任何為租借嘅電子產品提供短期保險，所以用家一定要好小心用機，跌爛咗就要自己 full paid，喊都無謂。

*如果配非全片幅相機，焦距就要乘大，例如 Canon乘 1.6為 112-320mm； Nikon乘 1.5為 105-300mm。

點 Check鏡

Rex建議大家 check機時跟足以下方法，萬無一失。


Rex建議租客至少用五分鐘慢慢 check相機或鏡頭，因為有好多細微問題好難一眼就睇到，唔好掉以輕心。

第一步　睇清鏡片
開盡鏡頭光圈葉片（ Nikon鏡頭須拉住鏡頭底光圈安全扣），然後對住光源細心觀察裡面鏡片有冇花痕。

第二步　測試對焦
將鏡頭接上相機，即時試拍幾張相，測試對焦準唔準確；再扭動變焦及對焦環，試吓可唔可以正常操作，同埋扭得順唔順暢。

第三步　必試防震
好多人都會忽略測試防震，其實部分 Canon鏡頭內置 IS（ Image Stabilizer）、 Nikon鏡頭 VR（ Vibration Reduction），支援防手震功能，有時壞咗都唔知。試鏡時可嘗試設定最大光圈（ F2.8）、 1/8至 1/16s快門連拍幾張，影像依然夠 sharp就冇問題。 

參考租價

根據 Brian同 Edwin建議嘅基本同增值裝備，喺 b3camera租晒嘅話，大約要千三蚊，都算合理。

落場裝備

仲有幾日就到渣馬，而家再講跑步衣著已太遲，一來著新鞋參賽係禁忌，二來突然著壓力衫壓力褲又未必適應到，都係老老實實著番正常裝備好過。不過，都有少少唔影響跑姿嘅裝備，可以一諗。

第一身視點

配埋條頭帶，可以戴喺額頭拍低跑步過程，不過電量大約只用到一個鐘，跑全馬半馬嘅話，就唔夠錄足全程。

GoPro HD Hero 3
售價：約$3,300（機身連防水殼及頭帶）
網址： http://gopro.com 

監察心跳

初次參賽，好易受其他跑手影響，跑快咗都唔知，甚至夾硬谷過心跳率上限，隨時有性命危險。可以考慮戴隻具備心跳監察功能嘅運動手錶，至於心跳率上限，可以根據以下算式計算，或預先輸入個人資料例如年齡，「爆錶」時就會有聲效提示。

心跳上限算式：（ 220-年齡）× 85%
假設你今年 40歲，心跳率就唔好谷過 153【（ 220－ 40）× 85%】，正所謂唔需要快，最緊要跑得晒，安全返到屋企先至醒。

Garmin Forerunner 910XT
售價：$3,619（錶連心跳帶）
網址： http://www.sw-garmin.com.hk 

匯報行蹤

跑到成身濕晒，仲要打電話講位置，既麻煩又嘥氣，自動匯報就輕鬆得多。

約咗親友嚟幫你影相，但長跑時間好受體力同身體狀況影響，好難準時跑到去影相位。唔想朋友等太耐或連廁所都唔敢去？除咗打電話報告行蹤，仲可以喺 smartphone裝免費 app RunKeeper，再俾錢升級做 RunKeeper Elite會員，系統會實時顯示你跑到邊，親友只要用手機瀏覽器登入 RunKeeper網站（只須登記成為免費會員及預先加入朋友清單），就可以減少走漏眼機會。 

RunKeeper Elite

作業系統： iOS、 Android
費用：約$38（月）/約$156（年）
網址： http://runkeeper.com 

相簿自搜

著奇裝異服跑，好易成為鏡頭焦點，大前提係有冇能力先？

即使冇親朋戚友到時幫你影低跑步英姿，都唔一定要幫襯大會攝影師（ marathon-photos.com）先有靚相，因為禮拜日會有好多跑會跑友或龍友沿途影相，之後會放上指定討論區或網站，免費俾人下載，隨時靚過大會攝影師嘅作品。 

Sportsoho運動版圖

入面嘅相簿幾乎有齊香港各項運動賽事嘅相，隨時即日有相！之前有參加過其他長跑或三鐵賽事，可以試吓搵相。
網址： http://www.sportsoho.com 

香港長跑網

討論區跑友主要影長跑及山賽，按賽事月份分類，相可以入「長跑影集」搵。
網址： http://www.longrun.hk 

泰基長跑會

同樣係長跑及山賽為主，相片數量豐富，搵都有排搵。
網址： http://www.thaiquain.com 

搵相策略

唔似得大會相簿可以用參賽號碼搵相（收錢㗎嘛），網友分享嘅相簿要人肉搜尋，點先可以喺茫茫相簿中搵到自己？其實有計。

忌穿大會跑衫

新手參賽通常著大會跑衫，個個一色一樣……最好著件顏色另類跑衫，再加條搶眼頭巾，就更易搵番自己。

留意身邊人

長跑好多時要分散注意力，減輕痛苦感覺，不妨沿途記低附近跑手個樣同埋裝束，既可分心，搵相時見到呢啲跑手，就要加倍留神。 

睇成績

睇相簿大概知喺邊度影，比對番自己同其他選手嘅分段時間，搵相會快好多。

大會公布比賽成績後，睇相時可用其他選手嘅號碼查番分段完成時間，比對自己成績，約略可知道睇緊嘅相係咪未到抑或已經過咗龍。 

Facebook

只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。 

text：科技組
photo：攝影組
graphic：祝健中