元秋巴辣，又唔浪漫，依然深得老公梁海明愛錫，愛情難解。（《蘋果日報》圖片）

中環人語

蔣麗芸老公　梁海明「第三手貨」

2013年02月21日 ~~ 第1198期 香港《壹周刊》

憑「獅吼功」喺立法會出晒位嘅政壇元秋蔣麗芸，喺上星期情人節突然柔情似水，向傳媒大爆甜蜜，話自己四十二歲都有人發狂追求，終感動下嫁；雖則唔記得老公梁海明生日，但老公十六年來依然對佢死心塌地。頂得順元秋，認真唔簡單，梁海明係一介工程師，原來情路上，係「飽歷滄桑」之人。


梁海明係 Divorced person，蔣麗芸起碼係佢第三段婚姻，見過鬼都唔怕黑，勇氣可嘉也。

根據婚姻登記處資料，蔣麗芸夫婦喺九七年十二月註冊，當時四十三歲的梁海明，婚姻狀況係「 Divorced person」，即係離過婚。再追查落去，原來佢三十三歲時，同曾做過藍十字保險董事嘅張文璐結過婚，當時嘅婚姻狀況，一樣係「 Divorced」！數數手指，即梁海明起碼有三段婚姻；見過鬼都唔怕黑，最終愛上「元秋」，呢啲叫愛情定係勇氣呢，又？ 

本週大割引

國泰賣免稅品竟然要出到大割引呢一招，此又情何以堪？要賣幾多支酒至冚到加酒價條數呢？生意難做也。 

Give me a break
陳智思玩塗改液

傳係下屆特首熱門人選嘅行政會議成員陳智思，媽媽陳沈時芬今年八十大壽，兩母子同姪女陳曉鈴，三代人喺大會堂搞畫展，請到懵董、林鄭、梁愛詩，仲有國務院僑辦主任李海峰、中聯辦主任張曉明到場。讀藝術嘅陳智思，大學時為咗喺同學間突出自己，自創用塗改液點畫，一支塗改液就點「晝」到九幅，慳錢也！佢舊年完成咗幾幅大作，都係用時懵事做主題，包括「政總西座」，仲有「一國兩制」同「國民教育」。小宗問佢支持定反對國教，佢就好有玄機咁話：「畫嘅好處就係任你點講我嘅諗法。」之不過佢形容幅畫好似「洗腦」。佢點睇？明晒！
問突然高調論政嘅陳智思，係咪有意選特首？佢好大反應咁話：「父母一定反對，我做咗邊個睇盤生意？」不過小宗叫陳智思學 CY發誓「 N屆唔選」，佢又唔制，但參選佢又話無信心，心大心細喎！


陳智思同母親陳沈時芬都係愛畫之人，陳老太仲大讚阿仔呢幾幅表達政見的畫有深度添。（嚴寶權攝）


陳智思形容為「洗腦」的塗改液畫，叫「國民教育」，有意思喎！

千奇百趣
再捉騎呢民企

本刊上期刊登《騎呢民企逐隻捉》，揭露香港上市的民企，名號改得漂亮，但不乏魚目混珠者，今期來個添食。

騎呢名業務
乾隆科技（ 1236）：個名舊過「咸豐年」，原來係搞軟件新科技！難有信心喎。
東北虎藥業（ 8197）：東北虎乃瀕危稀有動物，公司個名咁「勁」，其實賣嘅係感冒、消炎、胃痛藥，「小兒科」耳。
延長石油國際（ 346）：公司喺非洲有兩個油田，近年股權兩度易手，大股東「壽命」無得「延長」。
中國安芯（ 1149）：銷售喺礦場用嘅預警系統，不過大陸礦場仍然意外頻生，安唔安心先？
中國動物保健品（ 940）：生產和銷售俾動物用嘅醫藥及疫苗，喺中國最大，喺大陸真係做貓做狗，都好過做人。 

本週團拜
踢館挑戰

香港葡萄酒商會靈蛇新春團拜，你估佢哋在何處舉行？尖沙咀樂道之 The Round House— Kitchen+ Beer。
我哋孤陋寡聞，對呢處地方並無認識，但人哋講到明係 Kitchen+ Beer，你葡萄酒商會就特登揀呢度嚟團拜，踢館挑戰乎？蓄意示威乎？新年流流，亦得以和為貴乎？ 

灣仔現「龍吐珠」

喺灣仔鬧市出現「龍吐珠」，有諗頭也！難怪大鴻輝身家愈來愈多。（于港民攝）

低調富豪大鴻輝主席梁紹鴻，今年以$156億身家，打入《福布斯》香港富豪榜第二十五位，今時不同往日矣。最近佢旗下第一間、喺灣仔皇后大道東嘅 Hotel Indigo早前開幕，連林鄭、李國寶都俾面出席。間酒店投資咗八億，設計經多番修改。最特別係，酒店頂樓竟然有一個凸出之平台，配合物業設計，恍如一個「跳水台」。小宗八到，此乃池底透明的游泳池，身在其中游來游去，可俯覽附近灣仔景色；而酒店外牆，加了一些裝飾後就如一條龍，該泳池位置正好如「龍吐珠」。咁都俾梁紹鴻諗到，抵佢發達也！ 

金牙大狀講嘢
思歪大有料到

田少話商界當思歪冇到，佢口中嘅商界理應唔包括超人李。

田少北俊同友報《蘋果》講，商界當思歪冇到。如非手民之誤嘅話，有呢個諗法嘅商家佬則錯到唔可以再錯矣。
須知特區有嘅係行政主導嘅政府，姑勿論思歪個人幾咁冇料到都好，實權在握，佢分分鐘都可以學得亞視令江主席死去活來咁令到你班商家佬要幾煩有幾煩。君不見，佢一句零雙非啫，啲私家醫院即刻冇晒大肚婆生意矣。推出零雙非之時，佢未坐正，但已咁有殺氣，大權成咁，點到你當佢冇到？
即以樓市而言，若果佢要整低啲樓價，佢可以運用嘅行政手段真係多到三日三夜都講唔晒。除咗加強版 SSD、 BSD，你估佢可唔可以學得喝停雙非咁，以行政手段唔准銀行借錢俾人買樓呢？你估佢可唔可以用行政手段凍結樓價吖？
口輕輕話當思歪冇到嘅商家佬一定係腦囟未生埋。你幾時見老薑如超人李者會出此狂言？佢只係會拆售酒店房間而已。 

中環人語迷你版

呢個唔係住宅，係一個投資項目。

估中邊個中環人講呢句說話，送你 JWATCH J-37水晶版藍寶石鏡面限量版手錶一隻
有意參加者，請於二月二十五日 24:00前將答案電郵 mailto:centralman@nextmedia.com
小宗只接受電郵，郵寄免問。 

上週人語揭曉

如此多的藏品我用盡畢生也品嘗不完。

答案：唐英年
得獎者： Lee Far
中獎時間： 1:00pm 13/2/13

本刊員工及直系親屬不得參加。
為求公平及杜絕偷步搶答起見，請於星期三下午一時後
來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年二月二十八日本欄揭曉。 

廣告時間

你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！

爆料熱線/whatsapp:6829 5929 

(宗菁華)