場事情報科

山寨 Lightning線未見影　先達翻炒淘寶貨

2012年10月24日 ~~ 第283期 Face

iPhone 5條 Lightning線因內藏防偽晶片，令生產難度大增，連 Apple自己都生產唔切，全球勁缺貨，強國條山寨線又一直只聞樓梯響，搞到真線不斷被炒貴，最喪賣過$400！仲要呢兩個禮拜 Apple都冇供貨，先達想炒都冇貨，反而淘寶網有大量供應兼冇炒得咁喪，所以成班先達友上晒淘寶入貨炒，轉一轉手就賺兩水，仲好過轉售 iPhone 5！

拆盒偷線賣

其實香港 Apple自從 iP5開賣首週供應過 Lightning線到市面後，一直都冇再派過貨，呢段期間就算上 Apple Store網站訂，都要 1至 3星期先送貨，所以現時市面真係賣一條少一條。咁淘寶啲線又係點嚟呢？部分係班賣家喺初出時由香港掃上大陸，部分係外國水貨，仲有啲散裝根本係由收番嚟嘅 iP5度偷出嚟，事後就重新包好機盒，當冇開過咁賣去更北嘅地方，十個賤！


真 Lightning線 喺先達閒閒 哋賣$350， 啱 啱係舊 30針線 嘅 10倍價錢！


早 喺 iP5出機 嗰個禮拜，已經有水貨客去百老匯掃線北上賣。但因盒裝線再比散裝賣貴 50人仔，入貨要成$270一條，所以冇乜先達友吼。


由 iP5偷出 嚟 嘅線連袋都冇個，先達友會求其搵個袋仔包住賣。


iP5持續缺貨， 16GB白機上週回收價重升上$8,650呢個出機首日高位，黑機約平$100。

轉手賺$200

由於大陸同香港相反，線多用家少，所以炒價反而冇香港咁喪。拆機偷出嚟嘅散裝只賣 100至 150人仔一條，計埋運費都係$150至$210，但落到嚟香港就至平都賣$350，起碼執$200一條，賺到笑！電機兒個先達 friend大陸輝，呢排就係咁樣賣咗 50條線，賺咗成萬蚊，差唔多夠交租。佢仲話啲客真係好心急買線用，更有人問過佢有幾多貨，話想掃晒佢，好可能又係想轉手再炒貴啲！


其實 喺兩、三星期前上 Apple Store訂線 嘅話，今個禮拜已開始會收到貨，冇乜用家再搶線，炒價實會大插。


先達友雖可炒線賺錢，但 Uwants等網 嘅收機佬頂盡出到$160收線，同淘寶入貨價差唔多，冇肉食，散戶唔好炒。

30針轉插又炒

除咗呢條 Lightning To USB線，另外嘅 Lightning To 30-pin轉插同 cable都勁多 iP5用家想買，不過去到上週五截稿日，香港市面都只有轉插賣，條 cable仲係未有。前者已經炒貴$60，睇嚟後者都炒硬，想早日用正價買到佢哋，好嗱嗱聲上 Apple Store訂購喇！


原價$238嘅轉插， Apple已有少量現貨派到市面，但家唔係賣晒，就係炒到$298。


$298嘅 Lightning To 30-pin Adapter，市面仲未有貨，未知會炒到幾錢，但上 Apple Store訂反而話 5至 7天送貨，比轉插仲快，奇怪！

山寨線又話本週有貨

其實早喺國慶之前，淘寶網已經有賣家接受山寨線預訂， 60至 90人仔一條，但到貨日期一再延遲，最新又話今個禮拜會有，好鬼！不過之前啲貨品介紹一直都係貼真線相，早幾日終於有山寨線實物相出現，睇嚟可信程度高啲。只係咁耐都仲未有用家試用報告話 work，一味得班賣家話用到，就算今個星期真係到貨都要睇定啲先好買。


山寨線兩邊插頭都比較長身，一睇就分得出，應該唔會有人當真線賣，但始終仲未有賣家 show入面塊晶片畀人睇，用唔用到仲係未知數。


呢排電機兒問過好多話有山寨線現貨 嘅賣家，但個個都推三推四話仲未有貨，次次都話下星期有，一味靠吹！

電機兒

見盡奸商、騙徒，恃住有幕後高人力撐，唔怕得罪人，有嗰句講嗰句。 

撰文：電機兒
部分攝影：葉偉豪、電機兒