龜•波•氣•功！

漫遊毒物

Kinect龍珠體感出龜波

2012年10月24日 ~~ 第283期 Face

揸高達、做神槍手、把妹達人、穿越時空 RPG，一直以 嚟遊戲機幫機迷實現唔少夢想，如今連超級撒亞人都可以做埋， XBox360同 Kinect成功為廣大《龍珠》迷爭取到首隻飛甩手掣落手出龜波氣功 嘅體感遊戲，監修當奴都話直頭係實現童年夢想一定要試！同期 Kinect有《 Nike+Kinect Training》及《 Dance Central 3》等勁作，唔做撒亞人都可以運動 keep fit，男女通殺。

互動片段

當奴出手打龍珠





機種： XBox 360（ Kinect專用）
廠商： Bandai Namco
類型：體感動作
人數： 1人
售價：$339
查詢：智高（ 2418 8896）


隨 game附送悟空超級撒亞人頭帶，入面有 QR code可以用 喺遊戲入面 scan嚟開新招。

奴 Comment
必殺技正！

細細個就聽人講街機有體感《龍珠》，但一直都係流料，所以呢隻 Kinect版真係完成 咗我童年夢想。玩完發覺運動量幾大，成日連打出拳，第二場已經流汗。整體 嚟講幾滿意，動作唔係好準 㗎喇，但係必殺技動作做得好正。不過記得校番語音做日文，聽悟空講英文真係好奇怪。

必殺絕招　人人唔同

體感打《龍珠》，當然以第一身視點進行，基本攻擊靠出拳出腳，防禦就雙手擋前或者左右閃身，幾直接易學。至於大家最關心 嘅必殺技就每個角色有兩招，先要擺出預備姿勢儲氣，招招唔同，例如龜波就雙手抱球腰間，圓氣斬就單手舉高，儲滿氣會進入必殺技特寫，睇準時機做動作出招。當奴心得係出拳腳冇乜用，要靠儲氣出超必，儲氣時可鬆手擋招再儲過，唔好企定畀人打！




攰！


分近戰同遠戰，遠戰時一樣出拳放波，但擋波就要打橫揮手，跳一下可自由切換遠近戰。


每招必殺技出法都跟足原作，呢個招式有冇同學估到係乜？冇錯，就係無限 嘅圓氣斬！


敵人出超必時有動作提示教你避，要做 啱動作先避到。


普通攻擊周不時會出現連打情況，要好快出拳先可以追加傷害，阿奴都話辛苦。

阿奴示範出龜波

先要做準備動作，儲氣加左方支「氣」棒，兩招必殺技一招要用 50%氣、一招更用晒 100%。


儲夠氣就會進入特寫畫面，見到畫面顯示先好推波出去， timing靚個龜波會大 啲。

比達、布歐
角色大雜燴

隻 game只可以單打，但內容冇偷懶，由比達篇開始一路打到布歐篇，角色超過 50個！而且同一角色都有幾個版本，更用唔同必殺技，悟空都分龜波版、界王拳版、超級撒亞人版等唔同選擇。入面仲有首次登場 嘅原創角色悟空老豆巴拉庫超級撒亞人版，幾有誠意。


呢個超級巴拉庫睇落咪又係同悟空一樣樣，係條頭巾同戰鬥服有少少分別 啫。


電視版一路由比達篇打到去布歐篇，杜拉格斯同人造人等角色全部有得用。

Nike打造
Keep fit健身好認真

唔鍾意玩《龍珠》，甚至唔鍾意打機 嘅話， Kinect一樣都可以畀你健身 keep fit。由 Microsoft同 Nike合作開發 嘅《 Nike+Kinect Training》可以話係最強最 pro健身遊戲，入面 嘅內容由專業人士製訂，仲可以同手機上 嘅「 Nike+」連動，全方位追蹤你 嘅運動量。足不出戶，都可以有專人同你減肥健身。 




機種： XBox 360（ Kinect專用）
廠商： Microsoft
類型：體感健身
人數： 1人
發售日期： 10月 30日
售價：$259
查詢： Microsoft（ 3071 4868） 

運動量唔兒戲

遊戲會見到自己虛擬影像，好似對住塊鏡咁跟教練做動作，冇打過機都識玩。同《 Wii Fit》比較，運動量明顯較大，單係一開始 嘅體能檢定已經做足半粒鐘，動作由原地跑到 瞓地動作都有，玩完包你喘晒氣。遊戲會跟你體形同設定 嘅目標定好一個星期健身課程，亦有大量 mini game可以輕鬆玩，睇你需求。


高難度示範一
雙手放 喺背後盡量扣緊身體再屈膝，試玩發現唔會話雙手掂唔到就過唔到關 嘅，盡力而為啦！


高難度示範二
唔少動作要 瞓地做，呢個伸展動作難在要慢同 hold住，做多幾次真係會手騰腳震。

手機連動 Nike Fuel

Nike Fuel係 Nike設計 嘅運動能量計，類似卡路里，但仲會計算埋你 嘅體格入去，更加準確。《 Nike+Kinect Training》可以同手機 嘅《 Nike+》 app連動，無論出街跑步，或者 喺屋企打機，都能夠計算到你 嘅 Nike Fuel運動量，仲可以將成績放上網比較或者貼上 fb博 like， keep fit都冇咁悶。 

奴 Comment
冇得偷雞

《 Nike+ Running》好好用，對呢隻 Kinect版都有信心。覺得佢好親切，會定好晒要玩咩項目唔使煩。另外真係盡顯 Kinect機能，認動作好準，做得唔好唔會計，冇得偷雞，犀利！ 

Freestyle舞王
Dance Central 3

Kinect入面 嘅跳舞遊戲，一向以《 Dance Central》最勤力，話咁快已經出到《 Dance Central 3》。今集除 咗加新歌之外，仲加入故事模式同原創舞步新要素，雖然隻 game冇〈江南 Style〉，但就可以同朋友一齊 freestyle用騎馬舞 battle，最 啱成班 friend一齊玩。 




機種： XBox 360（ Kinect專用）
廠商： Microsoft
類型：體感舞蹈
人數： 1-2人
發售日期： 10月 30日
售價：$259
查詢：微軟（ 3071 4868） 

原創模式易入手

《 DC》動作要跟住遊戲角色做，初學者好難跟得切，反而新加入原創舞蹈就 啱晒同唔識 嘅人對戰。玩法先由一名玩家出題做動作，跟住第二名玩家就模仿回答再到佢出題，大家各諗 4招之後，遊戲就會用呢堆動作編一段完整舞曲，可以將〈江南 Style〉 嘅騎馬舞放晒入去，旁邊睇都好笑。


出題玩家要跟節奏做相同動作 4次，電腦認到之後仲會幫個動作起名，江南騎馬舞就被叫「難以模仿」。


各自做完動作，最後會由電腦編舞曲， 啲動作大家都玩過，易玩過正常 game。

故事模式玩穿越

今集新增單人玩 嘅故事模式則增加耐玩性，你要扮演時空特務穿梭時空學習唔同年代 嘅舞蹈。每個時代都有特定舞蹈，要你 喺歌曲入面準確跳到先過到關，幾有難度。


每個時代都有指定歌曲，你要 喺呢堆歌入面完成指定舞步，分開做都得，唔使一首歌做晒。


今集主打懷舊，七、八十年代舊舞曲， 啲動作都幾盞鬼。

玩後感：舞蹈專業

阿奴就唔擅跳舞，所以我 哋搵 嚟有舞蹈底子 嘅模特兒 Analdia試 game，佢就話：「動作都幾真，同埋認得好好。貼士係跟拍子，一個動作錯 咗就要放棄，努力做好下一個。一首歌會重複好多 step，錯多幾次就會記得。」 

撰文：司徒港燊
攝影：彭自維
模特兒： Analdia@GME Models