《巴黎戀愛寫真》
上映日期： 11月 8日
中山美穗新戲《巴黎戀愛寫真》，以巴黎做故事背景，由名編劇北川悅吏子做編導，原來 5年前北川寫劇本時已指定由長居巴黎嘅中山美穗演出，但據知美穗要等老公放人先可以拍，卒之等足 3年先開工。
日面
42歲美穗姐姐愛情回春
日本天后中山美穗，自 02年閃婚後息影多年，唔少影迷都超掛住佢。好彩美穗女神終於有新戲《巴黎戀愛寫真》登場，等大家止吓渴。
鐵定 11月 8日香港上畫的《巴黎戀愛寫真》，主 sell浪漫，全片於巴黎取景，今次 42歲的美穗，唔同舊拍檔木村演情侶，改嗒細佢 12年的新紮小生向井理玩姊弟戀，老牛食嫩草，成個人 refresh晒。聽落咁似芷珊姐姐嘅！
下月頭登陸香港的《巴黎戀愛寫真》，是中山美穗同導演岩井俊二繼 17年前的《情書》後再度合作的電影。但今次岩井改做監製，而且曾幫日劇《悠長假期》編劇的北川悅吏子今次更出任編劇加導演一職，台前幕後陣容超強勁。
12年姊弟戀
《巴》片主 sell浪漫情懷，講做攝影師的向井理到法國旅行，因迷路而偶遇旅居法國的女作家中山美穗，其後美穗帶向井理遊覽巴黎期間互相產生好感，繼而譜出姊弟戀。
戲中 42歲的美穗同 30歲的向井理玩姊弟戀之餘，仲有親熱床戲，最近美穗於訪問中自爆：「其實對手大過我同細過我唔係問題，我只係做戲，但拍攝時正值 311地震之後，當時我個心好唔安樂，但拍戲時又要扮到好開心去談戀愛，當時內心好矛盾。」
甩鞋撻着
影片開頭，旅居巴黎嘅美穗，一次行街唔小心甩鞋仲仆落地，就喺咁狼狽嘅情況下，向井理伸手扶佢起身，姊弟情緣由此起。
孭住遊街
由於美穗對鞋爛咗，向井理就孭住美穗，由美穗帶路一齊穿梭巴黎街頭，有俊男陪伴又有靚景，美穗忍唔住對向井理心動。
極速上床
美穗同向井理由邂逅到撻着，短短 3日時間已發展到一齊攬住喺床上親熱嘅階段，但因向井理要返日本，美穗就好唔捨得，仲攬得好實。
長居巴黎
而美穗自 02年同名作家 辻仁成結婚後，一直長居法國巴黎，今次電影公司為遷就美穗，唔只搵北川悅吏子度身訂做一個於巴黎發生的愛情故事，全片由頭到尾遠赴巴黎取景，難怪美穗都話好感動：「多謝電影公司同影迷一直支持我，見到鏡頭裏面置身喺巴黎嘅自己，感受好奇妙而且好感動。」咁多人撐，美穗真係要拍多啲好戲答謝影迷喇！
42歲嘅美穗雖然大足男主角向井理 12年，但拍埋一齊都幾合襯。而向井理就話：「美穗前輩係我偶像，能夠同佢演戲已經好榮幸，今次仲扮情侶，我收到消息後開心到瞓唔着。」
套戲由甩鞋開始展開情緣，上月尾搞宣傳活動，女主角美穗亦搞 gimmick，在台上玩換鞋，點知企唔穩要向井理扶住，事後美穗好尷尬話：「真係醜怪呢！」
留言列表
