Geek友講場

The Really Big Things大芒 Android明恰 iPhone 5

2012年10月24日 ~~ 第283期 Face

呢排 SmarTone個 iPhone 5廣告，猛話部機大咗同時又細咗，打破物理定律，講到好巴閉咁。但查實佢個芒大極都係得 4吋，仲要只係拉長咗，對鍾情一手無法掌握大芒 嘅人而言，始終都係揀番大芒 Android機先有揸拿！
以「 LG版 Note」 Optimus Vu為首嘅 4部大芒新機， size比例各有不同，用法同手感亦各異，無論你用機習慣係點，都應該搵到 fit你手形嘅大芒手機。

Spec.

系統： Android 4.0
處理器：四核心 1.5GHz
制式： 3.5G、 GSM
屏幕： 5" IPS 768× 1,024
鏡頭： 800萬像素
記憶：內置 32GB
體積： 139.6× 90.4× 8.5mm
重量： 168g
售價：$4,998
查詢： LG（ 3543 7777）


機身雖然大，但佢係一體成型冇得開背蓋換電，而且不能加 Micro SD咭，偷輕咗好多。


由於機身實在好闊，一般男人單手揸機，手指公頂盡篤到芒中間，多數時間要雙手用機。

黃金比例
5" LG Optimus Vu

拍埋 iP5，闊度多咗一半咁滯，顯得更大份！

𠵱家連 iPhone 5都忍唔住拉長咗個芒變 16:9， 4:3芒機已經買少見少，呢部堅持以黃金比例示人、令用家雙眼睇得舒服嘅 LG Optimus Vu，就顯得更特別！
即使數據上寸數一樣，同尺數嘅 4:3芒，實際面積都會比 16:9芒大，所以初見到比 Galaxy Note更加方形嘅 Optimus Vu時，真係覺得佢大塊到嚇人一跳，連筆者隻大手都只係啱啱可以單手握實部機，不過部機係 sell用 Stylus筆操作，又唔覺得係大問題。而玩落仲發現 4:3真係好處多多，比如打直用機時，畫面闊度好足，睇網頁同 ebook時毋須下下轉橫部機，亦唔使不斷左捽右捽，加上個 IPS芒有 768× 1,024電腦級高解像度，水準同 Retina不相上下，睇網頁同電子書時對眼都舒服啲，幾啱鍾意睇字嘅用家。 

試盡黃金比例

試睇片
不過睇 16:9片就會上下有黑邊，睇超寬銀幕電影 trailer時條黑邊仲更加粗，似足以前用 4:3電視播電影光碟。


試睇漫
用呢個芒睇漫畫最正，唔使放大或左右捽，一個芒夠睇晒全頁，闊度仲夠顯示埋少少隔籬頁添。


試打字
直度打字， keyboard掣已夠晒大，上面仲有足夠空間睇電郵或文件介面，好睇過打橫部機時嘅窄長介面同鍵盤。


試用 app
試過好多新舊 apps，都冇發現對應 4:3芒有問題，唔會見左右有黑邊。

首批送筆玩手寫

有咁大個芒，當然預期可以玩埋手寫，所以 Optimus Vu預載咗 Quick Memo同 Notebook app，方便人快速抄低資料同整理文件。不過佢支 LG Optimus Vu Rubberdium熱感筆，只會隨首批貨附送，送完即止。而且佢雖然都係行四核 U，用落感覺好快，但就唔似得 Note II咁可以畫中畫同時行兩個 app，有埋呢個功能就更正喇！




首批貨限量附送呢支熱感筆、手機 case同保護貼，總值$388，要買就趁手。不過機身冇位插筆，要插喺原裝 case上。


話明大芒玩筆，揀筆觸介面好緊要，由顏色、筆尖形狀、粗幼、透明度都可自己控制。


日系漫畫別注
呢部 Vu於日本都賣得好好，仲同少年漫畫《 JoJo奇妙冒險》 crossover出別注版手機，機背有圖案，仲有大量漫畫 wallpaper同主題，限量 15,000部幾日已經清晒。


Vu內置一個類似 Word的圖文製作 app Notebook，除打字，仲可以為文字加插畫，用筆將圖片放大縮細移動。

最大最快 5.55"
Samsung GALAXY Note II LTE

Vu好明顯就用來打 Note，而 Note II部 LTE版亦已經喺上星期開售（支援所有 4G台），定價$6,198，比 3.5G版貴$500，以佢嘅機王規格，價位仍算合理。 Note II個 5.55吋芒雖然大，但始終係 16:9窄身屏幕，拎起嚟就手過 LG Optimus Vu，寬屏幕亦都啱晒 OL煲韓劇，用盡大芒冇黑邊！


無論男仔女仔單手用，手指公都只篤到 4行 icon，最後嗰行點都要靠另一隻手篤。


同樣係 16:9芒，以比 iP5大 1.55吋嚟講， Note II LTE機身都唔算好大。

Spec.

系統： Android 4.1
處理器：四核心 1.6GHz
制式： LTE、 3.5G、 GSM
屏幕： 5.55" HD SUPER AMOLED
鏡頭： 800萬像素
記憶：內置 16GB、 microSDXC
體積： 151.1× 80.5× 9.45mm
重量： 182g
售價：$6,198
查詢： Samsung（ 3698 4698） 

奴 Comment

我試過 Note II，覺得大芒機係幾爽，尤其我工作或者創作時係鍾意用筆多過打字，大芒機有番書寫感覺。但我隻手細，用嚟傾電話有啲尷尬， 5吋剛剛好，再大啲就唔好喇！ 

LG埋堆！
Nexus 4轉會

Nexus4傳聞相，外形跟 Galaxy Nexus相似，機身一樣係曲面，但機背就有粒粒「 Matrix」數碼格仔圖案。

LG呢期真係發力勁追 Samsung，除咗有 Vu打 Note II，更厲害係埋到堆，取代 Samsung為 Google生產第 4代親生仔 LG Nexus 4。 4.7吋大芒、繼續冇實體鍵，採用 1.5GHz四核處理器， 2GB記憶體，傳聞更會係第一台搭載 4.2系統嘅 Android。 Google將於 10月 29日，喺美國舉行新機發布會，到時先知堅定流。 

HTC Nexus 5
有可能

初代親生仔由 HTC代工，傳聞 HTC出 5吋 Nexus手機，張相機背見到日文，似係合成相，但機能就講到好實， 5吋全高清芒，四核加 2GB Ram，而且都傳咗一段時間，有一定可信性。 

出年有 Samsung Nexus 10

Samsung同 Google又唔係完全斷交，聽講仲搞緊第 2代親生平板 Nexus 10（ 10吋），有內部人士話此機會喺今次發表會見埋街，仲有得睇全新 Android 5.0平版系統！ 

微軟 Suface tablet
十月蘇寧速賣

此外， Microsoft仲會喺 10月 26日，全球同步舉辦 Windows Phone8上市發表會，大晒自家打造平板機 Surface，配色超 sharp、有 keyboard的 smart cover更加係型，香港將於 10月 26日起由蘇寧雷射獨家發售， 32GB版（$3,888）、 32GB配黑色鍵盤保護套 Touch Cover版（$4,688）以及 64GB配黑色 Touch Cover版（$5,488），售價幾吸引。

Spec： Windows RT介面/Nvidia T30四核處理器/Wi-Fi連線/10.6" TFT屏幕/內置 32GB或 64GB記憶體/275× 172× 94mm/680g/查詢：蘇寧（ 2783 2999） 

日製最輕 7" NEC N-08D

5吋都唔夠大？想挑戰大芒極限，同期有呢部日系 7吋手機 NEC N-08D，佢同 Samsung G-Tab 2一樣，插入 SIM咭就可以當電話打。佢另一賣點係僅重 249g超輕機身，比起 7吋 G-Tab 2（ 345g）同 Nexus 7（ 340g）輕近 100g，拎呢個大芒出街，睇書煲戲打電話都冇話玩到手痺。 

Spec.

系統： Android 4.0
處理器：雙核心 1.5GHz
制式： 3.5G、 GSM
屏幕： 7" TFT 1280× 800
鏡頭： 800萬像素(後置)/200萬像素(前置)
記憶：內置 16GB、支援 microSD(最高 64GB)
體積： 199× 114× 7.9
重量： 249g
售價：$4,680
查詢：三禾電氣（ 2374 0618）

日系機直用冇麻煩

DoCoMo日系機 𠵱家唔使解鎖，部機直接插香港 micro SIM咭就可以用到 3G。系統語言有日文英文選擇，輸入法麻煩啲，預設都係只有英、日，不過 Android裝輸入法其實唔難，店員亦樂於幫手。整體嚟講此機喺香港使用，除咗唔對應其 2100MHz LTE、日本制式數碼電視外，其他打出打入、 SMS、 MMS功能全齊，唔使聽到日系機就驚麻煩。


主打 249g世上最輕 7吋板，自然夠晒薄，薄過 iPhone5少少。


micro SIM直插就用得， 3G完全對應，日系 Android機真係好方便。




當年 Samsung話 7吋適合單手操作，但其實只可以叫單手拎到，篤芒揀 app，單手係篤唔盡角落位 icon。


N-08D真係可以貼住耳仔講電話，唔係硬食用 speaker或 handsfree操作。部機冇 note咁貼心，冇單手輔助，打電話個 keypad仲要鬼咁大，少少難篤。

店主意見:7吋少樣揀

三禾電氣老闆 Simon點解會入呢部日系平板賣？佢就話其他 7吋冇個好樣。「 NEC之前都出過 7吋平板電話，反應幾好。大 size都仲有 iPad揀，但 7吋比較好用嘅都係得 Samsung，所以日系機吸引到揀樣嘅顧客，預計會更好賣。」 

機能實測
芒靚夠順滑

部機雖然得雙核，而且只行 Android 4.0.4未上 4.1，但用落幾順手，快速 scroll都唔覺窒。最欣賞佢個芒，雖然唔係 IPS或者 Amoled，但一樣亮度十足，可視角度亦佳，拎出街睇片冇話反光睇唔清，對於主打多媒體功能嘅平板嚟講好稱職。機身設計亦有日系嘅簡約風格，要彈嘅係按掣排位唔就手，開關細粒唔放角位放正上方，解鎖唔順手，音量掣亦嫌太細粒。

試盡屏幕

試睇片
睇片係此機強項，色水靚亮度亦夠， 16:9size用盡 7吋芒，睇落唔會比有黑邊嘅 iPad輸蝕。


試睇漫
7吋屏幕睇漫畫完全唔使放大都睇得清對白，舒服過用電話睇好多。


試打機
用虛擬手掣打 7吋 game都係略為大部，兩手相隔太遠，打落唔順手。

單手極限 4.5" Sharp SH631W

唔係三心兩意，只係 Android選擇多，我哋可以試完 5吋、 7吋，再後悔嫌大，改番玩單手用得盡嘅 4.5吋極限大芒！
呢部 Sharp SH631W拎上手感覺同 iPhone 5差唔多大，但個芒就大半吋，只因為佢機身四條邊都偷到好盡，冇嘥到任何空間。而且 home、 menu等「四大天王」掣變埋做虛擬掣，收番入屏幕底部，機底就唔需要留位擺掣，所以成部機只有一般 4吋芒機咁上下大，揸上手完全唔覺大塊咗，單手用機絕冇問題，女仔亦好啱手形。 

Spec.

系統： Android 4.0
處理器：雙核心 1GHz
制式： 3.5G、 GSM
屏幕： 4.5" TFT 540x960
鏡頭： 800萬像素
記憶：內置 4GB、 microSDHC
體積： 127.6× 66× 9.5mm
重量： 117g
售價：$2,888
查詢： Brightstar HK（ 2980 8088）

中日融合

SH631W係一部針對中、港市場而設計嘅「半日系機」，好多個部分都係由中國設計，其規格雖算唔上頂級，但換個角度，$3,000有找買部雙核日系，即使 4.5吋唔係 HD高清，性價比仍然唔錯。


拍埋 iP5，真係冇明顯大咗，但個芒的確大咗 0.5吋。


Android「四大天王掣」變晒虛擬 key，好在個芒 size適中，單手可以篤晒。


雖然係日本牌子，但因大陸廠方參與設計比較多，所以個樣好樸實，日系機 fans未必 buy。

試盡屏幕

試上網
屏幕夠大顯示 8成 Yahoo!首頁，雖然都要捽大先睇得清啲字，但至少睇圖嘅視野夠闊。


試睇片
正宗 16:9芒，睇多數片都唔會有黑邊，不過只採用普通級數 TFT屏幕，色水普通，冇日系 Sharp機嘅靚芒優點。




《 FACE》 Gadget版監修人
903 DJ Donald 

撰文：陳兆奇、司徒港燊
攝影：傅新發、吳偉業