close
FBI
玉女送上床唔吼 黃宗澤歪面冧 Stephy
黃宗澤（ Bosco）同胡杏兒分手已經 3個月，雖然大家都未有新戀情，但聽講 Bosco仲係對杏兒念念不忘，搞到冇胃口食嘢，成個人瘦晒，真係陰功豬。
FBI收到風，大約半年前 Bosco同杏兒醞釀分手期間， Bosco拍緊由黃柏高（ Paco）監製新戲《等．我愛你》。呢套戲講述鄧麗欣從小去咗台灣讀書，想返香港工作，投靠咗表哥黃宗澤，從此展開同一屋簷下生活。戲中 Bosco飾演嘅自卑男秋炳鬼咁多桃花，唔只同女主角 Stephy由歡喜寃家變情侶，而且仲有由強國玉女掌門人趙柯飾演嘅鄰居送上門，戲中二人難得有床戲，但竟然瞓到背對背，連身體接觸都冇，嘥啲喎。
FBI仲八到，原來 Bosco拍呢場戲時，因為感情問題，就算同玉女演床戲都冇厘心機，導演一叫「 cut」，就自己走埋一邊呆坐，冇人夠膽撩佢，所以即使《等》片上畫都一定唔會有緋聞。
29歲嘅趙柯（左），一直走玉女路線， 07年曾拍過 TVB同內地電視台合作嘅電視劇《歲月風雲》，飾演胡杏兒嘅好姊妹，同黃宗澤前度杏兒與林峯有唔少對手戲，又會咁蹺嘅？
趙柯幫 Bosco煮埋飯、又送雪糕車，但 Bosco始終對佢冇 feel，令趙柯經常發脾氣引佢注意。
套戲由 Paco監製， Paco愛將森美梗有份演出，飾演女王，經常以愛情專家身份出計教 Stephy追仔。
有靚女趙柯送上門唔受溝， Bosco偏偏愛上鍾意同佢鬥氣嘅 Stephy，今次已經係 Bosco同 Stephy第 3次合作，好有默契，演鬥氣寃家簡直 easy job。
全站熱搜
留言列表
