面對面
說好的青春呢？ Mr.
搖滾精神，關乎道火。
奈何呢道火，往往隨着青春流逝被澆熄。
出道第五年的 Mr.五個成員裏有四個踏進三十大關，唯一一個 25歲的鼓手 Tom，也在今年做了爸爸。
下月將推出第六張專輯、第三次踏上紅館舞台， Mr.說，聚在一起，他們開始像中年男人一樣話當年，一邊消耗青春、一邊緬懷青春：
青春，就是上台前先把自己灌醉，只求感覺，不顧後果；青春，就是手腳靈活肚腩未現，自我感覺良好；青春，就是窮快活，不怕開工不足餓親嫩妻幼兒； 32歲的主音 Alan叫停隊友少感慨多做事：「有得做時好做啦，將來冇力做時大把時間去感慨。唔好當成長係妥協，當佢係遊戲囉，玩一關、過一關，過咗呢一關，咪又有得升呢囉！」
Alan 遊戲人生
80年出世的 Mr.主音布志綸，洋名 Alan，聲線酷似歌神陳奕迅。出道兩年後， Alan因為護花爆樽事件登上社會新聞版，被揭發與富家女 Sally及未婚夫的桃色糾紛。兩年過去， Alan首次承認 Sally女友身份。
我 𠵱家有個穩定交往嘅女朋友，唔怕講埋畀你聽，就係當年上咗港聞、家住九龍塘嗰個。出事嗰陣我哋發展緊，都仲未係情侶，但係就連累到佢俾人起底，話佢屋企大把，又笑我以後唔使 do。我從來唔稀罕富豪生活，呢個女朋友我最欣賞佢，亦係佢自給自足，從來都冇靠過屋企。遇到呢個女朋友係個天安排，唔該大家唔好扭曲我哋嘅感情同目的，你哋愈係咁睇我哋，我愈係要做啲嘢出嚟畀你哋睇。
Mr.今年踏入第五年，老實講，遇上樽頸位，我覺得有啲迷失……好想變，但係又唔知變得啱唔啱，應唔應該變。就好似個個都想周杰倫變，但係變咗仲好唔好聽先？仲係唔係周杰倫先？不過每個人每個樂隊都會有一個迷失期，有好多樂隊嘅迷失期出嘅嘢，其實好正。咪將迷失成為賣點，當自己新開始囉！所以我哋隻新碟同演唱會，名為《 New Beginning》。
10年十月， Alan在九龍塘渭州道捲入爆樽爭女風波被帶返警署，事件揭發他與家住過億獨立屋富家女 Sally交往。《蘋果日報》圖片
夾 band冇人鍾意太理性，一定要有個瘋癲階段。我哋瘋癲過，但係入行做歌手，無可厚非有時要為職業去妥協。無論做邊個職業，都會遇上呢個情況，我哋可以當佢係挑戰，要掌握到個遊戲點玩，先至可以過關、先至可以升呢。掉番轉頭，唔好當佢係職業，當大家玩緊遊戲囉。人生根本就係喺無窮無盡嘅痛苦當中尋找快樂嘅過程，咪當人生係一場遊戲囉，玩一關，過一關……趁住仲有青春，唔好嘥時間感慨……做啦，有得做時快啲做！
Dash 維園阿伯
明年一月，第三度踏上紅館舞台的《 New Beginning Live》演唱會，本月開始優先訂票。
31歲的譚健文，人稱 Dash，有個孖生弟弟阿榮。兩兄弟一早在唱片業打滾，因此一手造成 Mr.被譚詠麟賞識而獲引薦入行。過去一年，弟弟阿榮、鼓手 Tom先後結婚生子，其他成員個個都有穩定女友，單身多年的 Dash說正好，因為自己在 Mr.中最多不足，比別人更多時間自我增值。
我係真心覺得五個成員我最多不足，反正我需要多啲時間擺落隊 band度，冇拖拍咪啱啱好囉，專心啲做嘢。朋友結婚生仔、細佬又就快做爹哋，隊友搵到另一半我都替佢哋開心，呢啲嘢急唔嚟……就算搵到，我都唔相信呢個世界有 perfect match，都要磨合同遷就，就好似一隊樂隊一樣，我覺得咁先至有火花、先可以永久……我成日覺得，我哋五個經歷過咁多嘢，雖然唔知有一日會唔會有拗撬，亦唔知事業最終會點行，但係我相信我哋老咗一定會聚埋一齊，成班維園阿伯一樣，吹水吹一日，一齊話當年。我覺得個畫面就好似《大魚奇緣》套戲咁，成班老嘢講埋好多嘢，子子孫孫都當我哋吹水，到底係唔係真，我哋自己最清楚。 
以 band仔來說， Mr.行運一條龍，成名作〈如果我是陳奕迅〉大 hit，還獲陳奕迅本人帶挈遊勻全世界伴奏世界巡迴演唱會。
一年要出兩隻碟，十一月同一時間做碟又做演唱會，時間重疊咗，歌迷對我哋嘅要求亦都多咗，壓力一年比一年多。冇話人哋畀壓力，我哋係創作人，自己都唔想重複，唔想做啲差唔多嘅嘢。
以 artist嚟講，我哋算最少化妝整頭，最少用外形去吸引人哋嚟睇嚟聽，我哋一向唔係嗰啲人哋想我哋點，我哋就變成點嘅樂隊。過咗三十歲，青春流逝就梗㗎啦，但係唔係冇咗道火，唔係因為慎言而唔再出聲，而係想出聲時，更加知道個力應該擺喺邊，呢啲叫成長。
Ronny 當年今日
Mr.入行多得樂壇校長譚詠麟，一手發掘、穿針引線與唱片公司簽約外，還指定合唱、合作出碟、以及為演唱會伴奏。
33歲的譚澤恩，洋名 Ronny，是 Mr.中最年長的一個，亦是樂隊起步時期正職賺錢最多的一個。當年 Mr.一個窮過一個，月賺三萬的 Ronny捱義氣月月揹起 band房月租，有機會出道，二話不說辭工全職夾 band。 Ronny說，想當年，更有搖滾精神。
當興趣變咗職業，確實樂趣冇以前咁多。前排我哋喺 band房圍埋一齊睇出道前嘅 video， free到呢……以前我哋好鍾意飲醉酒上台， Alan通常一至兩支紅酒，我就兩支大啤，係就係影響水準架啦，但係冇所謂，台下除咗自己啲 friend，都冇人識我哋，怕咩啫？最緊要 high吖嘛……以前出騷真係去玩，講真嗰句，飲醉酒一定影響水準，但個表演會好睇得多，因為我哋真係 high。搖滾幾時都係精神重要過技術，但係我哋 𠵱家變咗唱歌同玩結他嘅 example， spot light打住，唔可以影響水準，唔可以俾人覺得「香港隊 band係咁」。 
我以前十幾廿歲打籃球，自己覺得自己好好波，係自我感覺好到連校隊都不屑入嗰種。過咗三十歲，體力下降，肚腩都走埋出嚟，打打吓仲會拗柴添，年紀對我哋嘅影響其實好大……青春時鍾意認叻，覺得自己要做一定會做到，人老咗，爭勝心態就會少咗，會向現實低頭。其實我哋年青時鍾意發表問題，係唔係都要講，係因為睇嘅嘢少。人老咗就會唔急於發表，講真，聽吓人點講先，睇遠啲先……掉番轉頭講，聽吓人哋講先啦，有啲嘢自己真係未必知。年紀愈大，其實愈發現我哋知嘅唔夠多。
Tom 少年白頭
Tom與模 Evelyn曾經糖黐豆，去年 6月爆分手即與 Evelyn好姊妹 Leanne搭上，其後 Tom與 Leanne結婚生子， Evelyn都沒有到賀。
鼓手杜志烜， 19歲加入 Mr.，年紀最小，感情經歷最豐富。入行不久，就與模 Evelyn（蔡穎恩）相戀，看似兩小無猜如膠似漆的一對，去年中突然宣布分手。原來 Tom在為樂隊製作 MV之際，認識 Evelyn老友、同為模的何思諺，兩人迅速撻着並於同年十月奉子成婚。我發現，才 25歲的 Tom，白頭髮是 Mr.裏最多的一個。
唔係做咗爸爸後先開始多，我十幾歲已經有白頭髮啦！好似養咗寵物都會錫佢，諗多咗佢一樣。有家庭，一定會凡事以家為先，好多嘢留番屋企至講……有自己嘅家，感覺係唔同啲。
以前搵到錢，見到鍾意就買， 𠵱家唔會任意妄為，仲要養老婆養個仔吖嘛。我唔知做咗老豆後有冇加速自己成長，但係唔理阿仔睇唔睇到，我做每樣嘢都相信阿仔有朝一日會有樣學樣，呢樣嘢令到我想活出一個更好嘅自己……我唔係要扮好人、扮幸福家庭，粗口我照講，我都有情緒要發洩，我係想活一個更精采嘅人生，畀阿仔知道我努力過，作阿仔榜樣。小朋友睇媽媽同爸爸唔同，爸爸就算係賣魚佬，小朋友都可以好崇拜佢，覺得佢係成條街市劏魚最快嗰個…… 
去年 10月奉子成婚， Tom與陽光妹 Leanne的兒子杜卓霖翌年 2月出世。《蘋果日報》圖片
老婆話畀我知「有」嗰刻，畢生難忘，好坦白咁講，絕對係唔想要嘅……你問佢哋咁多個，個個已經三十幾歲，佢哋想唔想有 BB？ Ronny話，唔係想唔想，係 rea唔 ready。我當時都係咁同老婆講「未 ready喎！」，我老婆勸我生佢出嚟時話：「你一生人都唔會覺得 ready㗎！十年後賺夠錢，又可能會有第二個 plan呢？如果我有病生唔到又點先？你點知十年後發生咩事呢？既然 𠵱家有咗，你又鍾意我嘅，就應該順從上天安排。」佢講得啱喎，唔好話自己唔 ready，有咗就應該要 ready。好似我哋做碟做演唱會甚至出道，校長想簽我哋一樣，我哋都覺得未 ready㗎，你永遠問我，我都會話未係最好、未 ready，咁點嘛？個台擺喺度唔上去唱咩？係唔係同呢個女仔過一世，就正正喺老婆同我講呢一番言論時，我就覺得可以一世啦。兩個人拍拖，鍾意就梗㗎啦，到決定結婚時會諗，大家信念係唔係一致……佢唔只同我信念一致，個信念仲強過我，呢啲女仔去邊度搵？
說好的 MJ呢？
Mr.五為一體，這一次訪問，卻只出席了四個。約好了的 MJ（譚傑明）缺席，是因為譚爸爸在訪問當天凌晨，因病辭世。 MJ因此全面停工，放下所有安排好的唱片以及演唱會宣傳工作，專心療傷並為父親打理後事。
這一次訪問，主題是逝去的青春，事實上，要告別青春，沒有甚麼比面對生離死別來得更悲壯更直接。套用 Alan的比喻，就把它當成人生這場遊戲的一道關卡，人人都會遇上，過了關，咪升呢囉。
MJ，節哀。 MJ，加油。
MJ父親於上週二（ 16日）凌晨因病去世，因此全面停工處理家事。
留言列表
