雖然李慧詩週日（ 5日）無法在爭先賽再贏獎牌，但已令全港市民將佢捧為「單車女神」！《蘋果日報》圖片
比賽第一
香港車神追夢棄愛 李慧詩：用了半年都忘不了
自從 04年「乒乓孖寶」李靜同高禮澤取得奧運銀牌，香港人等足 8年，終於再由 25歲的單車女神李慧詩，贏得奧運史上香港第一面銅牌。
100% made in HK的李慧詩，在牛頭角下邨長大，中學在觀塘梁式芝書院就讀，背景草根，要靠後天勤奮鍛煉造就今日成績。努力練車背後，原來李同其他 80後一樣熱愛寫 blog，兩年多前曾在 blog透露失戀經歷，「原來上天要我去忘記你，我用了半年時間都忘不了……」
港女唔怕揭開肚皮，比班運動機械人更有血有肉！
天生患有貧血的李慧詩（ Sarah），除了先天缺陷， 06年公路訓練時更因閃避狗隻而炒車，令左手嚴重骨折，但養傷期間， Sarah堅持每日返體育學院做器械訓練，刻苦鍛煉加堅強鬥志， Sarah於 10年終於克服傷患，成功贏得廣州亞運會金牌。
Blog透生活苦
由於經常要四處征戰， Sarah少有機會返屋企同家人見面，加上日對夜對都係隊友同教練，缺少傾訴對象，所以 Sarah曾熱衷於寫 blog抒發感情。唔似一般少女愛在 blog中講玩講食， Sarah愛寫關於自己的成長及戀愛經歷。原來 Sarah家境唔好，細個要幫手擺檔賺錢，「記得爸爸是做小販，我們三兄妹齊當上伙計，我只會賣紙巾……」
細細個已經要為生活煩惱，長大後亦喜歡在 blog講愛情辛酸。當年只得 23歲的 Sarah，透露曾經失戀，「生病的時候，軟弱得又想起你……原來上天要我去忘記你，我用了半年時間都忘不了……要把你從我的記憶永遠刪除，我要為神為自己，為其他愛我的人好好享受我的人生。」
拍過 3次拖的 Sarah暗示當年俾仔撇，好在現時重新出發，更成為奧運銅牌得主，家陣變港仔新寵，飛你嗰個呻笨啦。
吹喇叭
兩年前正值李慧詩失戀期間，可幸她專注單車夢，令她奪得亞運金牌，開心到拎住成支香檳吹喇叭！其教練沈金康（右）亦為愛徒開心。《蘋果日報》圖片
李慧詩（箭嘴）上週五（ 3日）在女子場地單車凱林賽，奪得一面銅牌，事後獲恒生銀行發放 75萬獎金。《蘋果日報》圖片
在牛頭角下邨長大的李慧詩（中）有一兄（左）一姊（右），李曾自爆媽咪偏心家姐，一度令佢同家人關係惡劣。
BB
就讀幼稚園時期的李慧詩，樣子生得成熟，與現時分別不大。
初中
李慧詩（中）曾是田徑運動員，但因喜愛高速度運動而轉玩單車。
中五
李慧詩中五畢業後，決定轉做全職運動員。
四眼
因踩單車而令腳粗，李慧詩話夏天唔敢着裙，要冬天先敢着長裙扮靚。《蘋果日報》圖片
戰衣助衝牌
李慧詩攞到銅牌，件戰衣都唔嘢小，喺理大做足 2年風洞測試，務求將風阻降到最低，又話可以拉緊肌肉幫助爆發，加埋部價值成 10萬嘅戰車，務求加快 0.1秒。《蘋果日報》圖片
乒乓爭標 梁柱恩拒做餐飲太子
李慧詩摘銅為港爭光，另一港將梁柱恩亦有望成為港隊攞牌。 15歲進入廣東省乒乓球隊，現年 33歲的梁柱恩， 95年跟隨在港做餐飲生意的家人，由廣東移民來港，從此代表港隊比賽。 04年出戰雅典奧運 8強止步，令梁一度想退出球壇，掛拍繼承家族生意，但港隊教練今次再選梁打倫奧，令佢重燃信心。
可以隨時劈炮唔撈，希望梁柱恩週二（ 7日）凌晨，可以放開心情打 4強戰！
梁柱恩（右）同江天一（左）及唐鵬代表香港男團打入四強，只要週二（ 7日）擊敗南韓，便至少奪得銀牌。路透社圖片
繼承前輩
梁柱恩（右一）同雅典奧運銀牌得主李靜（左二）及高禮澤（右二）份屬好友，今次成績有望趕上前輩。《蘋果日報》圖片
蔡其皓 全家撐港仔
被視為黃金寶接班人的蔡其皓，代表香港出賽倫奧，雖然空手而回，但 21歲仔中五畢業後，轉做全職運動員，攞過'10亞運團體追逐賽銀牌，又係全港首位奪得環南韓公路賽冠軍。
蔡其皓最聽屋企人話，雖然搵錢唔多，但難得蔡父仍十分支持，孝順仔上年仲將公路單車錦標賽冠軍錦標，送給在場支持的爸爸，孝順又努力，難怪連教練沈金康都讚佢係醒目仔。
蔡其皓一家四口，都撐到行。《蘋果日報》圖片
香港單車王子黃金寶好撐蔡其皓，比賽時更不惜去幫他搬車做打雜。《蘋果日報》圖片
林丹曬燈操黑
本來成身好乾淨的肌肉，近年忽然興起勁紋身，仲要個個圖案都有故仔講。路透社圖片
週日（ 5日）反勝馬來西亞球王李宗偉， 28歲的林丹，幾經辛苦下衞冕金牌成功，再一次發揮「超級丹」威力！ 
Eason最熟
林丹同 Eason、古巨基等人稔熟，經常來港見面飯聚。《蘋果日報》圖片
《蘋果日報》圖片
黑過古天樂
衞冕金牌成功，林丹話奧運後第一時間要籌備一個特別婚禮畀老婆謝杏芳。
4年前在京奧仍然青靚白淨的林丹，今屆忽然大執，除鏟青留鬚、皮膚黑過古天樂外，身上更多了 5個紋身，型味濃 man到震。據知「超級丹」能夠幾年間冇晒國產味，全靠曬燈變黑。「林丹同 Eason、古巨基班港星好熟，一有時間就會嚟香港搵佢哋，除咗飲飲食食，林丹仲會問去邊度曬燈好，佢次次嚟香港都會曬㗎！佢跟得班星多，自然識打扮啦！」林丹身邊人透露。
兩年前已同退役羽毛球世界冠軍謝杏芳簽咗結婚證，林丹話倫奧後會正式擺酒，仲話希望盡快生小丹。據知林丹現時每年的廣告收入超過 200萬美金，有錢真係零舍有品味！
強國人乜都鬧
睇倫敦奧運見到自己國家拎獎梗係開心，但近日方力申、蔡卓妍及梁靜茹等藝人，在微博上支持自己地方的運動員，卻被大班野蠻強國人留言鬥臭，勁無辜。
抦阿 Sa唔撐祖國
蔡卓妍日前在微博恭喜李慧詩，竟換來強國人大罵阿 Sa只替香港運動員高興，乜都有得鬧。
方中申引發罵戰
方力申恭喜李慧詩奪得奧運銅牌，一句「為香港爭光，零的突破！」竟觸動微博上的內地童鞋神經，強調應該是為中國而非香港爭光，更引發中港罵戰。
趕梁靜茹出中國
馬來西亞出生的梁靜茹為李宗偉驕傲，即引來童鞋插佢在中國地方搵食，都不幫中國的運動員（林丹），更聲言要抵制梁靜茹。
留言列表
