陳敏之(Sharon)是一個捱了十年,終於捱出頭來的好例子。
曾幾何時,陳敏之就是43吋長腿,面目模糊得只見其腿不見其人。
經過多年的努力,今天已是電視台當家花旦之一,比起同是「小室徒弟」的另外幾位來說,成績算是好得多。
至少沒有白捱,《東西宮略》夏迎春,做到第二女主角了,只不過敏之說:
「夏迎春,不是一個討好的角色,好多粉絲都唔鍾意,直頭鬧話我人品咁好,點解要做奸妃?」
奸妃唔易做,有得揀,人人都想做第一,做鍾無艷。
「講性格,我絕對係鍾無艷,唔似夏迎春,因為我唔係一個嬌嗲同攻心計的女人。」
敏之說自己最大的特點和弱點,就是做人太直,心軟易信人,正宗鱷魚頭老襯底,屬現實版鍾無艷。
世界殘酷,鍾無艷忠忠直直,就算唔使乞食都一定捱得慘過人,奇就奇在,個個都要爭住做。
「其實我想做鍾無艷。」
這是陳敏之親口說的。
![](http://img.eastweek.com.hk/article_multimedia/18830/1_n.jpg)
十年拍劇生涯,今日的陳敏之演技純熟,對住空氣一樣畀到「奸妃」眼神。
二奶型大婆
論外形論資歷,其實陳敏之早就可以和差不多同期出道的胡杏兒及楊怡睇齊,擔正做女主角,時也命也,第二女主角,都總好過冇。
更何況這個夏迎春,還是被很多人讚賞。
「好多人唔鍾意我做奸妃,上網留言勁鬧,但我知道就係做得好,入型入格,至會有人憎你。」
敏之繼續對此發表高見。
「夏迎春表面上係二奶,但實際上係大婆,所以角色妒忌心好重,因為唔明自己點解唔可以坐正。而且好明顯大王(郭晉安)根本就鍾意夏迎春多些,又唔係大奸大惡,次次搞屎棍,咪又係為雞毛蒜皮的小事。」
敏之說得肉緊,代入感更是爆燈,唔講角色名,我仲以為佢講緊自己。
或許在她心中,做個要捱世界的大婆,都好過做歎世界但要畀人鬧的二奶。
更何況這個二奶其實一樣做到嘔。
![](http://img.eastweek.com.hk/article_multimedia/18830/2_n.jpg)
近兩星期陳敏之出騷頻繁,工作狂之名真的不變。
![](http://img.eastweek.com.hk/article_multimedia/18830/3_n.jpg)
從06年開始,差不多年年都在TVB的萬千星輝頒獎禮上有提名,但直到去年才得到「最佳女配角」。
十年生死
陳敏之在同一間公司工作了十年,剛剛於去年得到俗稱「老人牌」的服務金牌。
「好開心,雖然十年在TVB話長唔長,但話短亦唔算短。這十年經歷了很多事,生離死別、病過、傷過樣樣齊,十年可以話係一個關口,過了,就覺得自己大個女,夠成熟可以去下一個層次進發,即將會面對好多變化。」
以今日的角度來說,三十三歲已是中女,敏之亦自認心態變了。
「我是工作狂,曾經試過足足三日冇瞓、冇沖涼、冇落過妝。當年細就以為自己頂得住,乜工作都殺,依家唔得了,點都要休息。」
早兩年病過了、傷過了,世界隨之改變。
![](http://img.eastweek.com.hk/article_multimedia/18830/4_n.jpg)
去年獲得TVB服務十周年金牌,見證了陳敏之人生開始走向另一階段。
「三十幾歲唔細了,不是BB女,自己唔錫自己冇人會錫你。以前日日掛住做,淨係諗住儲錢買樓、每個月畀錢供樓,見到鍾意的東西也不會買,因為會即刻諗買呢隻表,夠供幾個月樓啦,即刻勒住,但現在會對自己好些。」
今天樓供滿,弟弟即將大學畢業,雖然還是要照顧母親,不過擔子看來是輕了。
「錢已經不是最重要,不是第一了。健康最緊要,有工作收入穩定,照顧到屋企人,夠啦!」
只有一件事不會變:
「工作狂是不會變的。」
不見近日有劇上,曝光率大增之際,陳敏之近乎日日有騷出,搵真銀當然冇手軟。
要拍照的事
前年拍劇受傷,更患上腎炎,康復後去學氣功,食中藥調理身子。驀然回首,敏之卻發現:
「要拍照的事,真的不少。」
二○○三年父親去世,再加上近年的傷病,敏之說:「甚麼都是假的,最重要是珍惜眼前人,去了就是去了,不會返轉頭的。我以前不會主動去約朋友見面,現在一日有時間就安排聚會,好似我好多同學都結婚生仔,一有時間就食飯敍舊。」
多些關心親人、朋友,所有聚會都值得紀念。
也多得宗教信仰,讓她有了寄託。
「其實由細到大都係基督徒,但自從爸爸過身之後,覺得好需要有一個信仰去支持自己,有時自己諗唔通,就讓神去安排,好多事情就自然會容易起來。」
敏之雖說信命運,凡事卻也要靠努力。
![](http://img.eastweek.com.hk/article_multimedia/18830/5_n.jpg)
「我好信命運有安排,人一定有順有唔順,唔順時就要有人幫,一定要自己順境時儲番來,所以我信做人好、做事好,就會有人關心。」
就如與契姐伍詠薇的友誼,已經超越了一般朋友。「她是我的親人,有事冇事都成日見。」
此所以早兩年伍姑娘代理瘦身產品,陳敏之就是代言人的不二之選,當時我訪問伍姑娘,她就說過:「我第一個人選就係敏之!點知我都未問,佢(敏之)已經話,兩姊妹乜都唔使講,我做代言人。」
反過來又證明陳敏之自認為人好夠雷(義氣)。「我係好直、好爽快,又係大家姐,鍾意照顧人,個人又冇乜心計,好多事都冇所謂,幫朋友冇計,但我又唔係咁容易畀人搵笨,皆因工作上我其實係好『擸』。」
七年不癢
人生經歷多了,來到某一個位,自然會有成家立室,結婚生仔的衝動,更何況近年娛樂圈時興結婚生仔,敏之亦似乎到了這個年紀。從前的她向來避談感情事,卻也一反常態,承認與男友感情穩定,沒有七年之癢。
「與男友拍了七年拖,一直好和平連鬧交都很少,可能是他比我大七年,又是金牛座,與我這個山羊座在性格上互相補足。」
有成熟男友在旁,可以放心拼搏。
![](http://img.eastweek.com.hk/article_multimedia/18830/6_n.jpg)
同為小室哲哉弟子,陳敏之做了當家花旦,葉佩雯嫁了Eric Kwok,Zoie譚凱琪繼續在有線做主持。
![](http://img.eastweek.com.hk/article_multimedia/18830/7_n.jpg)
陳敏之與男友William拍拖多年,早已視對方為結婚對象,只等待一個好時機。
「現在一齊住,有時忙到真係返屋企沖個涼瞓兩個鐘就又出門,佢一直好明白,好支持我。很穩定冇壓力,大家自由度好高,我不可能和一個o靚仔拍拖的。」
雖然仍未打算結婚生仔,為的是要調理好身子。
「之前病時食了太多西藥,需要一段時間去調理身子,我不想在身體不夠好時生小朋友,我要等準備好生育才會結婚,到時自然會公布,但都不想太高調。」
敏之早前更開始學氣功,也許亦是其中一個準備事項。
只要做 不要問
陳敏之出道前做過sales,也做過模特兒,拍照經驗超級豐富。
拍攝過程中極度認真,哪一邊臉較靚、盞燈的位置是否適中、以至髮型的鬈曲程度,全部一絲不苟。
甚至認真到有點執着。
「因為對自己有信心,想做到最好。」敏之說。
回顧過去,敏之常常以《聖經》金句「不要怕只要信!」來鼓勵自己。
「做人做事,有信念就得,永遠不要怕失敗,事關最後是成是敗冇人知,而且兩樣都未必是壞事。」
![](http://img.eastweek.com.hk/article_multimedia/18830/8_n.jpg)
《東西宮略》劇中夏迎春與鍾無艷鬥到火紅火綠,劇外兩人屢傳不和,卻不時攬頭攬頸自拍。敏之說:「宣傳啫!邊有咁多不和吖!」雖然我都覺得,陳敏之做鍾無艷,陳法拉做夏迎春,不論外形同氣質都啱啲!
敏之說人要經歷過才會成長,亦只有從錯誤中才會真正得到教訓。
「所以我做人從來不會同人比較,只相信努力一定可以有成果。」
鍾無艷亦是一直相信,終有一日可以感動到齊宣王,才能義無反顧地去愛。
唔做奸妃,很想做鍾無艷,陳敏之的堅持,終有一日必可成真。
只是她說:
「不要怕失敗,只管繼續做,亦不要問點解,因為公司一早決定咗。」
陳敏之,果然深明大公司的生存之道。