Party開始無耐,新人連埋一班到賀嘉賓影大合照留念,留意洪天明跟老婆企在中排及前排位置,依然煙韌到痺,拖實老婆唔放手。
當晚錢嘉樂被催婚,另一半湯盈盈亦high爆,全晚又跳又唱,比新娘更加投入。
阮兆祥被曾志偉點名催婚,來玩人的倒轉被玩,他亦即時執生,表示會跟錢嘉樂同一日結婚,給女友Crystal派定心丸。
盈盈與鍾麗淇都是玩得之人,她們見到天明家蔚的結婚照時,突然扮嘢癮起,即場扮他們擺的甫士互嘴,非常搞笑。
周家蔚在台上多謝一班姊妹,尤其當年跟她一起參選環球小姐的新加坡小姐以及菲律賓小姐都特登飛來香港,她愈講愈感動。
老豆洪金寶跟高麗虹離開時,依然清醒的洪天明親自送他們出酒店上車。
有指洪天明生母曹恩玉跟高麗虹在婚宴內面左左,他即時否認之餘,當晚提到多年來住在韓國的生母養育之恩,天明在台上更講到眼濕濕,要老婆為他抹眼淚。
派對期間播出了天明向家蔚求婚的經過,蛋糕上的一句will you marry me已令家蔚甜在心頭,並哭着答應。
前港姐王愛倫兒子Chester,當晚除不請自來,更倒濕前度女友周家蔚,又在場內四圍溝女攞電話號碼,結果被睇唔過眼的新郎開名鬧爆。
壯男將醉到不省人事的Laughing推入車廂,他亦全程合埋眼,任人擺布。
陳法拉跟陳敏之被指合作拍劇唔妥,二人不單在宣傳活動扮friend做好姊妹,更孖住去婚禮,陳敏之做埋司機接對方到場,交足戲。
張學友被問到有否傳授一對新人生仔秘笈,他表示生女可以問佢,生仔就要問啱啱生咗的陳慧琳,即時交波閃入場。
劉華近來出現都會被問老婆朱麗倩生女一事,他例必顧左右而言,當晚更合十面對,唔講咁多。
四大天王之一的郭富城,揸住掛SKY車牌的法拉利出現,放低賀禮即鬆人,來去匆匆,完全唔俾機會大家去問他跟熊黛林的婚期。
吳卓羲冇到,個樣又唔同咗的張馨予以女友身份代表出席,雖然收埋事業線,但當晚穿著通花白色喱士枱布套裝裙的她,內裡仍著緊身小背心晒身材。
留言列表