隨變麻辣雞煲$98/半隻，$188/一隻
雞肉有雞味亦嫩滑，略嫌斬得太碎，湯底香辣，受不到辣者，叫微辣就可以。

試食王

雞煲不及當年勇

2012年12月13日 ~~ 第1188期 香港《壹周刊》

佐敦渡船角的隨變雞煲成功帶起雞煲熱潮，老闆之間的恩怨情仇也成為花邊新聞，但我只關心老闆反目後，雞煲的質素 keep得住與否。第一次吃，念念不忘那美味，後來主理人自立門戶亦都幫襯過，但已覺得失色不少。今次隨變在港島開分店，急不及待去試。同日打電話訂了七點枱，七點三去到已經滿座，侍應話：「要等多一陣，我哋入席時間通常係六點至七點半，唔好意思，有位打俾你啦。」為何當初唔講清楚？侍應好聲好氣又不停道歉，先至冇咁嬲，等了二十分鐘先可入座，訂枱機制，係廢嘅。

一坐低，見到餐具有污漬，侍應再道歉即時換走。餐牌多咗幾款新菜式，菜名勁刁鑽，叫偶然相遇、巴山凝雨，其中一款冰窖藏珍，似西餐 fine dining用大型冰模上枱，不過冇得供應；想食燒烤，又話通風未得，所以暫停。雞煲分隨變麻辣及饞嘴麻辣，要小辣，侍應細心咁話等於出面嘅中辣。湯底食得出足料，雞件算多，仲有成個洋葱、長葱等配料，藥材味重，又麻又辣，但飲落冇以前鮮甜，好彩雞肉夠嫩滑入味。配料款式多但相當寒酸，一份$14至$16的丸類得三粒咁多，兩個人都分唔勻，自製水餃細隻到放入煲內會搵唔番。好在尚算新鮮，墨魚丸夠大粒又唔粉，萵筍爽甜，石蠔鮮味但唔大隻，淥完已經縮到變蠔豉。


尖椒皮蛋$32
金黃色的皮蛋，不算溏心，但醬汁帶麻辣味勁香口，非常開胃。


半殼石蠔$73/4隻
蠔肉唔算厚身，但勝在鮮甜，而且清洗得乾淨，好吃過美國桶蠔好多。


萵筍$26，隨變粉$26
萵筍清甜，但切得太薄身，推介的隨變粉似發脹米線，唔好食。


自家製花果茶$23
用藍莓及洛神花沖成，味道酸酸甜甜，但竟然唔凍，敗筆。

食至中途，湯底愈滾愈辣，而且出現苦澀味，就算加湯中和都已經食唔入口。侍應細心咁放低包 Tempo紙巾，仲冇收錢，老闆娘親自逐枱問意見，服務真係冇得彈。水準其實唔算差，但食完冇牽腸掛肚的感覺，始終敵不過老闆分家餐廳跌 watt的宿命，為食客着想，和好如初算啦。


侍應做事爽手，會幫你倒走碟上的雞骨，加湯又用手擋住，細心勤快，贏舊店多多聲。


環境比起舊鋪好好多，座位有軟墊唔係摺櫈，仲有間貴賓房。

評分

食物：★★★
服務：★★★★
環境：★★★
價錢：★★★ 

隨變燒烤麻辣雞煲
地址：灣仔謝斐道 307至 311號快添大廈地下 2號鋪
電話： 2891 2787

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

$21食米芝蓮菜式兼贏機票

南海一號供應的南海煎蠔餅原價$168，現在$21已食到！

為慶祝優意集團 21周年，旗下六間餐廳包括南海一號、合江小鎮及米芝蓮二星餐廳夜上海，推出多款$21菜式，有糟炒魚片、黑豚生菜盞和鮑魚炒乾絲，西班牙餐廳 1/5 nuevo亦有兩款招牌菜賣$21。在任何餐廳消費仲可以參加抽獎，頭獎是雙人來回巴塞隆拿機票連酒店，吸引！
查詢： 2521 0804
注：優惠期至 2013年 1月 31日 

一田首創網購松露

白松露大多只於餐廳供應，少有零售，今年一田設網上預訂服務，即日起至 23日，收到柯打即時採摘， 5天內出土直送買家手上，確保新鮮。 Supreme級由$5,492/50克起，更高級的及 Top Supreme由$6,894/50克起，另有較便宜的黑松露可選。首輪柯打即日至 16日將於 12月 22日至 23日送抵，用來做聖誕禮物勁矜貴。
網址： http://eshop.yata.hk/ 

撰文、攝影：試食王