早兩個禮拜仲話 WP8有齊常用 apps，轉頭 WhatsApp就「被下架」（紅圈），用家真係粗口停不了。

IGOSSIP

WP8冇 apps玩？

2012年12月13日 ~~ 第1188期香港《壹周刊》

Microsoft嘅 Windows Phone 8作業系統推出唔夠兩個禮拜， WhatsApp、 PayPal兩間公司嘅 apps齊齊消失 Windows Phone Store，令唔少啱啱買咗 Nokia Lumia 920、 820嘅香港用家嬲爆， PayPal都算啦，但 WhatsApp簡直係港人最常用嘅 app，冇咗佢真係斷六親咁滯！

網友發現 WhatsApp官網有 WP8版嘅 app畫面，即係唔係單純吹水啦，咁都好啲。

究竟發生乜事？原來 WP7.5同 WP8架構基本上差唔多，但 WhatsApp喺新系統下竟然無端端搶咗背景音樂資源嚟更新狀態，搞到電量消耗超快，所以先暫時收起。至於幾時有？ WhatsApp方面雖然話未肯定到幾時，但就保證「重生版」會提速六倍。心急買咗 WP8手機嘅用家，提速反而係其次，快手俾番個正常 WhatsApp出嚟先至緊要。

手動升級最穩陣

冇咗又靚又好用嘅 Cover Flow瀏覽介面，果粉真係喊晒口。

Apple上星期推出咗 iTunes 11，用家如果揀咗俾 iTunes自動更新嘅話，打開新 iTunes嗰陣應該都幾後悔，事關 Apple竟然粒聲唔出取消咗大受歡迎嘅 Cover Flow唱片封套模式，起初仲以為同 Mirror Worlds告佢侵權有關，但明明單案上年已判咗 Apple贏，今次 iTunes 11轉 layout抽起 Cover Flow，真係冇嘢搵嘢嚟搞！求其去一個 Apple討論區，都可以睇到民怨有幾深。
唔緊要，只要去 http://www.emacconsulting.com網站，用 downgrade iTunes 11嚟搜尋就可以搵到降番去 10.7版本方法。記得裝完之後，幫 iTunes揀番手動升級，以後等其他人試用完新版本，知道冇事先升級就冇咁煩。

好意頭禮卡

上期幫大家揀咗批平靚正聖誕好禮，有冇心頭好？冇嘅話不如考慮吓 Apple新推出嘅 gift card。 7仔、 Pacific Coffee雖然有定額 gift card賣，但就冇得自訂禮價，如果想送好意頭禮卡，例如整張$288儲值額，就一定要去 Apple Store搞喇。特登去 ifc鋪試買，唔知係咪服務太新，所以唔係個個店員知有得自訂金額，要再問上級先知有。不過，買禮卡手續超快，揀好卡款等店員 scan條碼再輸入儲值額，唔使五分鐘就搞掂，趕時間又諗唔到送乜，呢份禮物都唔算失禮。

自訂金額禮卡有三款，對方收到後只要喺 iTunes戶口內按「兌換」，輸入番卡後編號，就會增加賬戶金額。

李先生只知有$200、$500、$1,000定額禮卡賣，唔知儲值額可以自訂。