吳先生當日見合約上剔着「 now SPORT精選」，以為可看英超、西甲，故立即簽約，最後卻發現所的是上網合約。（鄒潔珊攝）

投訴

睇波變上網　 nowTV蠱惑

2012年12月13日 ~~ 第1188期 香港《壹周刊》

來季英超播映權由電訊盈科旗下的 now TV成功投得，惟本刊近日收到投訴，有讀者為看英超而安裝 now TV，卻在職員誤導下，簽下網上行的寬頻上網合約而非電視合約。

吳先生是英超球迷，為追看賽事，一直都有安裝有線電視，九月中他收到 now TV的推銷電話，「本來諗住仲有成年，唔使裝住，但個 sales話有個 cold call客戶專屬優惠，可以優惠價二百蚊裝個體育精選頻道，到時一樣睇到英超同西甲，仲送埋上網。我見咁抵，最後決定簽兩年約。」
由於電話客戶無法即時簽約， now TV安排員工上門，讓吳先生簽訂合約，「佢上嚟嗰晚成十一點幾，好快咁揭份合約，我都未有時間細睇，就叫我簽。我當時見到合約上剔住『 now SPORTS精選』，以為冇問題就簽咗。」
豈料至十一月中， now TV員工上門替其安裝電視接收器後，吳先生卻發現該體育頻道原來不播放任何球賽，只有足球賽事精華及其他體育節目。「即刻打電話去問，啲職員話我簽嘅係一份網上行嘅寬頻合約，個體育台就係免費贈送嘅精華頻道，根本就冇得睇波！」


now TV成功購得未來三季的英超播映權，球迷「轉會」前記謹睇清合約。（美聯社圖片）


律師何傳經認為，事主有理據推翻合約。

承認有誤導

吳先生後來向 now TV投訴， now TV承認職員有錯，但卻企硬要吳先生賠償毀約金，才可再跟他簽訂電視合約，「佢哋職員翻聽錄音，都話個 sales當時有誤導，但就話我已經簽咗約，所以一定要賠錢斷咗張約先可以再轉約，話斷約費最多平一半（即一年）俾我。佢哋職員誤導，仲要我賠番二千幾蚊，有冇搞錯？」

專家話　有理據推翻合約

記者翻查吳先生與 now TV簽訂的合約，發現合約上多項重要資料都未有填上，如客戶資料「經核實」一欄未有畫剔，亦沒有填上職員資料及申請日期。
律師何傳經指，合約多項資料留空，足以證明 now TV職員當時未有解釋清楚合約便着吳先生簽名，再加上若職員曾承認有誤導，吳先生大可訴諸小額錢債審裁處，贏面極大，「法庭會考慮事主喺被人誤導的情況下才簽約，好大機會推翻份合約。其實 now TV見佢係小市民，想賺多啲先會企硬唔幫佢轉番份約。」

回應　趕唔切拒覆

本刊把吳先生投訴轉介至 now TV，但發言人卻指本刊只給予他們兩天時間作回覆，太倉卒，趕不及回應。（馬梓皓）

壹判官

now TV誤導在先，仍厚面皮要事主賠錢，固然唔啱，不過讀者們亦應睇清楚先簽約，下次就唔使拗餐懵！

評分：劣劣劣
（五個劣為最嚴重）