close
同你吟一吟
抵投徐子珊一票
無綫扮民主，今年全民投票揀視帝視后，十個候選「最佳女主角」，一半以上係陪跑，爭崩頭嘅楊怡同徐子珊，上星期三（五日）孖住做手錶品牌活動，「是非檔」𢱑銀。
有錢落袋，交足戲，攬腰揸晒手合照，友誼小姐上身。如果只係計活動當日表現，八珍會投徐子珊一票。
自爆通宵開工喊咗六個鐘，再加感冒纏身嘅徐子珊，除咗堅持唔笑擺出一副冇厘精神樣病容外，仲即場攞紙巾抹鼻，七情上面，幾逼真呀！
嗱，八珍唔係話佢扮病，但既然唔舒服，又何必著打虎裝，露出大邊膊頭呢？保重呀你！
加多兩錢肉緊，徐子珊攞紙巾擰轉身抹鼻，咁逼真，啱啱喺馬來西亞嘅 Astro頒獎禮攞咗獎嘅楊怡都冇你符。
主動攬住死敵楊怡條腰再揸埋手合照，徐子珊只係堅持唔笑，八珍終於明白，病到唔識笑原來係咁。
全站熱搜
留言列表
