探熱針
有得執 PSY帶挈 A貨錢國偉 買樓買鑽
韓國大叔 PSY的《江南 Style》在 YouTube點擊率衝破九億，挾超強人氣殺到澳門掘金，露面唔夠三粒鐘袋走 300萬，一歌走勻世界賺到笑。明抄惡搞《香港 Style》都有着數，Ａ貨錢國偉有機會埋身上台跟真貨拍住跳，一樣水漲船高，內地騷價由四萬跳到十萬，聖誕、新年商演更加無停。豬籠入水，肥 Wilson買樓買鑽，孝敬女朋友。
細佬，抽番佣好噃！（設計對白）
早前在新濠天地跟真貨 PSY做騷，帶挈女友陳宛蔚做主持，孖住搵銀。
跳升十萬
錢國偉搵埋一班兄弟鄭伊健、錢嘉樂等，幾千蚊平搞《 Hong Kong Style》大收後，跟大叔 PSY有幾成相似的他開始不停接騷，身價更由本來四萬升到十萬。
「肥 Wil（錢國偉）拍完《喜愛夜蒲》後， 喺內地都有 啲人識，佢拖埋連詩雅、 Jeana都做過一輪騷。到《 Hong Kong Style》爆咗出嚟，好多人搵佢返內地走場，如果要跳埋舞，十萬人仔冇得減。不過佢都唔係見錢開眼，之前政府喺青衣搞騷，錢一啲都唔多，佢都無所謂照接。」知情者說。
錢國偉在西貢新購入的村屋，二樓連天台，他的坐駕泊在附近小路。
有騷做，跟住肥 Wil做節目的一班天使，都有機會拉衫尾搵外快。
五百萬村屋
與原裝 PSY在澳門過招，錢國偉人氣再升，跟樂易玲孖住出席廣告頒獎禮，又要幫無綫拍賀歲片，同久休復出的葉玉卿做對手戲。
據了解，過去兩個月已有近百萬落袋的錢國偉，索性將一直租住的七百呎西貢村屋，由租變買。
「間屋二樓連天台，要差不多五百萬，但肥 Wil搬咗入去後一直順風順水，兩集《夜蒲》都收得唔錯，而家籌備緊第三集。本來諗住同班朋友玩吓扮 PSY，又俾佢搵到條財路。早兩日佢女友（陳宛蔚）仲喺微博晒命，話一次過收到兩隻戒指。總之肥 Wil近排好『老黎』，之前盈盈樂樂結婚玩抽獎，肥 Wil女友又中埋機票大獎。」錢國偉身邊人透露。
肥 Wil跳馬舞跳出財路，有指在 MV有份出現的 JJ亦因而有機會一齊登台做騷。
女友陳宛蔚在香港電視的記者會上谷咪搶鏡，近日又在微博晒鑽，指一次過收到兩隻鑽戒。
古巨基早前在馬來西亞做騷，亦有搵肥 Wil跳馬舞。
他在香港亦有密密接騷，其中一個政府搞的回歸騷，肥 Wil又一拖六演出。
葉玉卿返香港拍賀歲片，今年有份演出的肥 Wil以 PSY造型出現，被卿姐大讚。
扮到有金執
正版吃香，帶挈老翻都有條掘金路。娛圈幾位扮 嘢王，因為扮 嘢到似層層，所以就算擺明係 copy做老翻，一樣豬籠入水，靠扮 嘢掘金發達。
陳國坤
俾星爺發掘，由 喺《喜劇之王》開始扮李小龍的陳國坤，因為入型入格，從此大茄變主角，靠扮偶像開拓內地市場，接拍一套內地劇《李小龍傳》出位，賺人仔賺到至今無停手。
盧海鵬
扮 嘢始祖鵬哥由昔日 EYT扮羅文、徐小鳳，扮邊個似邊個，無人能及功力，為他帶來不少登台掘金機會。早前再顯神功，一把年紀扮畢彼特，同樣惹來網民激讚，為 孭飛的舞台劇《蝦仔爹哋》大收宣傳之效。
溫超
因為聲線似足周星馳，所以得把聲已經令原本在內地係二打六的溫超，進身影壇，伙拍吳君如演出《嫁個一百分男人》，仲俾王晶點名讚係百搭男配角。 
留言列表
