IT人黃震宇○九年創辦 Mydress.com，大講女性時裝潮流，「不時有客人用奇怪眼光睇我，有時佢哋一班女仔講時裝經，我都插唔到嘴。」他笑言。

壹盤生意

「天使」打救時裝網

2012年12月13日 ~~ 第1188期 香港《壹周刊》

搞網站､一夜成名是不少 IT人的夢想，包括黃震宇（ Edmund，廿九歲）。他三年前放棄四萬元月薪，開設時裝購物指南網站 Mydress.com，立志打造時裝版的 Openrice（開飯喇！）。
創業路一波三折，先是遇到「伯樂」，獲得「數碼培育計劃」資助，進駐數碼港，免兩年租金。怎知兩年過去， Edmund不但一年多無糧出，網站更瀕臨倒閉。危急關頭，獲前淘寶海外業務及營運總監黎文打救，找來天使基金做「白武士」，注資五百萬。網站起死回生，上月正式推出寄賣平台，公司終於由蝕錢變成收支平衡。一切來得像做夢，背後除了家人的支持，還有一股打不死的「傻勁」。

起步　伯樂相助　夢成真

Edmund是典型的中產下一代，父親是公務員，母親是中學教師，讀名校喇沙書院，後往美國密西根州大學讀電腦，再於柏克萊加州大學取得資訊管理碩士。回港後在跨國公司 Questex擔任網站經理，月薪約四萬。這個典型「喇沙仔」故事於○九年八月出現變化， Edmund決心創業。「打工只係想儲錢同經驗，創業靈感來自老婆（當時是女朋友），佢出席宴會前想買衫，覺得無網站提供相關店鋪資訊。我就諗，飲食有 Openrice，買衫都應該有一個時裝版嘅 Openrice。」外表看上去只有二十出頭的 Edmund，說話甚快。他利用工餘時間編寫程式，再以十萬元向日本 NTT公司租用伺服器及管理系統，創立 Mydress.com。「我希望網民可透過網站的時裝店搜尋器，搜尋各類時裝店，並給予評分，用最短時間得到最多時裝資訊。」 Edmund憶述。


Mydress.com銳意打造成時裝版 Openrice，現有四萬名會員，每個月瀏覽量約二十多萬人次。


未有新股東前，資金緊絀的 Mydress甚少花錢做宣傳，去年曾派人在旺角街頭派傳單宣傳。

進駐數碼港

自知沒有雄厚資本，唯有向外求。他一開始便瞄準較易申請的兩個資助計劃，包括科學園的「科技創業培育計劃」及數碼港的「數碼培育計劃」。「科學園嘅計劃要有幾個股東先可以申請，數碼港唔使，而且門檻比較低，只要有計劃書､創業意念就得。我申請時已有 website，所以獲批機會好高。」 Edmund笑言，八月遞表，十月已獲批，可以免租兩年使用數碼港的辦公室，面積約三百呎，還有招聘､廣告等津貼，以及協助配對投資者等。信心大增的 Edmund隨即辭職，專心創業。

夢醒　買衫不同揀餐廳

公司辦公室位於荔枝角潮流工貿中心，由於網站主打女性時裝，除 Edmund外，四名職員都是女的，負責時裝編輯、網頁設計、客戶服務及銷售。

「一 瞓身」即「中伏」。 Edmund略帶尷尬道﹕「坐足三個月，先有第一個客。」肯賣廣告的都是些 cold call或朋友介紹的小型時裝店，「當時網站純粹係指南性質，話俾人知邊度有咩鋪､賣啲乜。但女仔買衫唔同揀餐廳，唔單只想知鋪頭喺邊，仲想知道點配搭。我係男仔，唔清楚用家要啲乜，就瞓身去做，真係有點戇居，人工都蝕埋。」他自嘲道。網站靠廣告費維生，有時一月才有數千盈利。
另外， Edmund對數碼培育計劃亦有微言。「津貼係實報實銷，但好難申請。例如唔津貼網上推廣費，但我做網站生意，唔通賣報紙廣告咩﹗」至於聘請員工，最多可申報人工的七成做津貼，但規定只能請本地大學畢業生，而且要剛畢業一年內的，「我係創業初哥，唔想花時間教新人，想請個有經驗、獨當一面嘅人。」他苦笑道，兩年下來，沒拿到其他津貼，最大幫助是免租，「每個月只要俾二、三千蚊管理費，計劃更不時舉辦講座、會議同 workshop，幫我識咗好多業界嘅人，包括天使基金嘅投資者。」 

轉型　指南變導購

時裝店指南行不通， Edmund即着手改革，請了一名員工，四出尋找品牌加盟，同時加強網站用家分享的功能。「我邀請咗一班時裝 blogger喺網站分享潮流資訊，又主動找不同品牌合作，搞 blogger分享會。」 Edmund說，他堅持網站要走中高檔路線，「如果乜都做，就同淘寶一樣。好多時裝品牌想做網上生意，但無一個同佢哋品牌形象相符嘅平台去做。」
去年中， Edmund見團購大行其道，便開始跟保露絲、 Playboy等大品牌合作做團購。「大牌子分店多，客人可以喺分店試啱尺碼先攞貨。網站先教你點襯，再配合團購，發揮『導購』嘅功能。」團購每月為網站帶來數萬元的收入，卻難有發圍，「大品牌唔會成日減價，廣告收入又唔穩定。」數碼港培育計劃於去年十一月完結，他將辦公室遷往長沙灣。「諗住俾多一年限期自己，再搵唔到投資者注資就唔做。屋企供我去外國讀書前後使咗成百萬，我有份幾萬蚊嘅工唔做出來創業，連家用都俾唔到，心裡面好慚愧。」 Edmund說。




首飾店 Crisella是 Mydress的客戶，其營運主管梁穎茵指網站定位較高檔，符合品牌形象，每月廣告費只需千五元，另透過網站出售貨品，抽佣約兩成至四成﹐較市價為低。 




Edmund於今年五月和相戀五年的女友 Jacqueline結婚，現住在由他父母買下的美孚新邨單位。在嶺南社區書院教書的 Jacqueline支持丈夫乘年輕創業，雖然收入不穩，但有自己的薪金用作家庭開支。 

翻生　白武士擲五百萬入股

去年中， Edmund開始四出叩門，找天使基金入股。天使基金（ Angel Fund）概指一些投資者或基金，願意入股仍處於起步階段､高風險､高增長的企業。在美國，天使基金為不少貸款無門的小企業，特別是科技型企業提供資本而聞名。「香港好多基金都指明投資規模較成熟､甚至有潛質上市嘅 IT公司。有家族基金或做製造業嘅投資者肯投資，但生意性質唔同，幫唔到我發展。」 Edmund見了四十多個投資者，直至去年底，認識前淘寶海外業務及營運總監黎文（ Leon），在他引薦下，找到合適的天使基金，大手注資五百萬元。 Leon接受電話訪問時表示，該基金正進行數宗交易，不方便透露名稱，他解釋﹕「香港未有 Mydress呢類平台，就算依家多咗時裝網購平台，但都係好單向式，不像 Mydress會舉辦活動，會員之間有面對面嘅互動，商家知道用家要啲乜。」黎文指，基金亦看中 Mydress走中高檔路線，可以招徠本土或國際品牌。
Edmund指基金入股後，自己仍是大股東，有話事權。但問到五百萬是否分期支付，以及公司市值超過一千萬時，他即支吾其詞道﹕「呢 啲我唔講得，一千萬？數字上可以咁講，網站能獲注資幾百萬，仍保持話事權，咁嘅個案喺行業來講好普遍。」新金主總算解決了資金問題， Leon更利用自己做電子商貿的經驗，助 Mydress改革，在分享平台外，再建立一個網上銷售平台，為品牌寄賣貨品，上月推出。「個基金專投資電貿業務，擁有物流公司，仲喺葵涌有個一萬呎嘅倉， Mydress可以共用呢 啲資源。」 Edmund解釋，時裝品牌可在分享平台上宣傳產品，同時在銷售平台出售產品。
現時，公司收入已由廣告費變為以賺取貨品買賣的佣金為主。「每件賣出去產品都會抽佣二十至四十巴仙不等。」 Edmund說，公司還多了門生意，就是為其他品牌公司打造網上旗艦店，打入大中華區市場，「管理費每年五十至六十萬，再按銷售額抽佣，第一個客係日本最受歡迎美容飲品 Chocola BB。」公司重新起步， Edmund卻比兩年前更堅定，他一臉自信道﹕「雖然過去兩年賺唔到錢，但阿爸阿媽､老婆，甚至外母外父，個個都支持我趁後生搏一鋪。我就快三十歲，唔搏等幾時﹗」


Mydress將會幫日本美肌飲品 Chocola BB管理大中華地區的網上旗艦店及銷售，早前邀請了一班時裝 blogger參加品牌舉辦的活動。


入股 Mydress的基金在葵涌有倉庫，內有包裝、物流系統，協助網站發展商貿平台。

開業資料（ 08/2009）

網站設計及系統：$150,000
廣告宣傳：$50,000
iPhone App：$50,000
其他：$50,000
總投資：$300,000

營業資料（ 11/2012）

營業額：$368,000
入貨：$200,000
人工：$130,000*
租金：$30,000
其他：$8,000
盈利：$0

過來人點睇

Openrice創辦人鍾偉民 Ray

Ray於九九年創辦網站 Openrice，打造網上餐廳指南及食評分享平台。最初幾年都是「食穀種」， Ray要做幾份兼職來維持生計。「我堅持有得做，但呢類賣內容嘅分享平台急唔來，要時間儲知名度及用戶，部分食家如 KC Gourmet，開始有 fans。」 Ray表示，後來網絡及智能手機急速發展及普及化，亦令網站用戶大大增加。○六年，公司終於收支平衡。○七年， Ray為「發大來做」，將公司賣盤予求職網站 JobsDB，自己轉任網站顧問。「有咗資金，網站功能得以提升，如新增了地圖，員工由五人增至十三人，新老闆聘請我繼續打理網站，制訂發展策略。」
Ray看過 Mydress.com後，表示只看見到一大堆沒有名氣的時裝 bloggers的分享，令人眼花繚亂，同微博、甚至傳統時裝雜誌分別不大，不覺得能教人怎樣配襯衣服。網站想靠內容來賺錢，最少需要五十至一百萬嘅用戶，每月的頁面瀏覽量要過千萬，否則好難拿到廣告。 

撰文：黃秋娥
攝影：嚴寶權