張國榮上身
午間食飽飽，龍心突然從百寶袋中拿出兩個喇叭，張國榮上身大唱〈 Monica〉，令在場食客看得目瞪口呆。
娛聞樂
瘋癲背後 龍心自爆被囚犯搞下體
別人笑我太瘋癲，我笑他人看不穿！曾自稱人格分裂的「維園霆鋒」龍心，癲得好醒目。
記者與他短兵交接一天，直擊他由東涌大鬧到銅鑼灣，每一步，龍心都精心部署，務求以最出位的言行吸引群眾的目光。事實他亦很成功，完全由他控制大局。正如他所說︰「我要支配所有人！」
在澳洲考取碩士學位的他，原本一個大好青年，卻因為去年 10月在保加利亞捲入強姦案，引發心魔，行為變得激進偏鋒。訪問中，龍心竟透露被當地囚犯性侵犯︰「班囚犯當我係女咁，搞我下體，好侮辱！」如果他冇吹水，現在他的控制慾，可能是對當時極度無助的反射。
龍心反轉東涌
當街舞旗
龍心與記者到東涌的噴水池，抽完支飯後煙，他突然拎住支旗在街中熱舞，其間吸引小孩主動走近撩他。龍心亦童心大發，但未幾小孩已被父親拉走。
「維園霆鋒」龍心（真名林克霖），因為貌似謝霆鋒，加上頻頻將出位短片放上 youtube，迅即成為近日網絡紅人，短片點擊率高達 200多萬。繼在維園《城市論壇》自稱美國黑社會福 X幫響朵後，上月初，龍心又因為在人網節目《星期 5冇女 2》中涉非禮模仙樂都（吳堯堯），聲名大噪，出位短片日日新鮮。 
女粉絲合照
有女 fans要求合照，龍心即鬆毛鬆翼︰「你抽我水，我都要抽番你水！」隨即搭住對方膊頭合照，詐癲納福。又不時出口撩女記者，但當女記者黑面抗議時，佢又即時收斂打圓場︰「講笑啫！」
勁歌熱舞後，當他知道有人報警，指他騷擾客人，他大怒下不停以粗口辱罵侍應，直至餐廳經理向他解釋是商場報警時，他態度又 180度轉變，陰聲細氣向經理道歉，還說：「錫番啖先！」認真抵死！
做訪問錢
龍心最近紅到成為《 3D古龍群俠傳 Online》代言人，他自稱尚有十幾個廣告商排住隊同佢傾，就連做訪問，他一樣有風駛盡︰「訪問有冇錢？冇錢？咁食番餐勁都有啩！知唔知我拍個廣告都賺 8萬。」
當日，龍心穿上泰山裝、手持旗幟現身。他揀咗食日本嘢，甫坐下即柯打最貴的食物，還拋下一句：「有老屈無秘笈。」之後還打包埋做晚餐，又食又拎！
問到去年在保加利亞被控強姦，龍心深心不忿︰「我根本冇做過，警方冇任何證據就拉我，我喺拘留所已經被班大隻佬又打又搞，班囚犯當我係女咁，搞我下體，好侮辱！好彩我最後扮癲申請保外就醫，唔係俾班人打×死都唔知咩事！」自此，龍心話缺乏安全感，所到之處都會拍片及錄音，以免再被屈。
16歲就初戀的龍心，自言並非濫交︰「以前讀書會溝鬼妹，但我好怕羞，只敢拖人手仔，反而係班女好豪放，撩我搞嘢。當年（ 30歲左右）落親蘭桂坊都大把女埋身。」
龍心向記者展示昔日的鬼妹女友照。當時的他青靚白淨，比現在更似謝霆鋒。
龍心涉在網上電台節目中性騷擾仙樂都，惟事後他反指仙樂都博宣傳。
當阿媽工人
扮癲變真癲，他說返港後被家姐送去精神病院。他說︰「家姐咁做係再插多我一刀。我之前打工儲咗一百萬，幾年前東亞銀行擠提，家姐叫我攞筆錢出嚟擺住佢度，話高息啲。啲錢一去冇回頭，依家佢想支配我，幫我供樓同俾錢我。但之前我問佢攞番 5萬佢都唔俾，話我啲錢已經使晒！」
當日下午四時許，龍心邀記者到其東堤灣畔 800多呎的寓所參觀。未幾，同住的林媽媽攞鮮花返家，龍心則命令記者以蝴蝶手與伯母打招呼。龍心稱呼母親為工人，父親為「傻福」，他說︰「寫吓『傻福』啦，幫佢出位。佢成日恰人同吠，成隻門口狗，而我阿媽就鍾意俾人恰，我降佢職做工人，因為佢只係識服侍我，但唔識關心我！（點解唔見你爸爸？）傻福最鍾意支配人，佢唔想俾我支配，咪自己走囉！」
除了訪問，龍心由中午玩到凌晨，由東涌和民餐廳胡鬧到銅鑼灣麥記，鑊鑊高潮。凌晨二時離開麥記老遠，龍心突然發現把鮮花遺漏在枱上，他堅持折返取回，還說︰「我要救番佢（花），因佢都有生命！」
亦人亦魔，亦正亦邪的龍心，時而愛心氾濫，時而歇斯底里。真癲假傻，只是一線之隔！
除家中一角放了一堆雜物外，龍心的寓所整潔乾淨。書架上有幾本紫微斗數等命理書籍。他說雜物是讀書時代的舊課本，他會將廢紙及舊衫集齊，放到樓下的收集站。
衝擊博覽館
回家化了個妖妝後，龍心傍晚再出動，到博覽館衝擊 Jason Mraz演唱會，最後遭大批保安攔截。
追住明哥影
離開博覽館後，龍心再到銅鑼灣食消夜，在麥當勞撞正黃耀明跟一位男性朋友買 cake，龍心當然食住上，立即上前問對方識唔識佢。初時明哥都有禮貌同佢微笑，但最後都嚇到走夾唔唞！
留言列表
