close
揞名爆
「好跳得」背「震震豬」偷食 𡃁妹
娛樂圈嘅情情愛愛呢，媽咪姐都睇到化晒！好似早前先見姐仔「震震豬」去「好跳得」有份投資嘅食店坐鎮，兩個人好 sweet咁食吓嘢傾吓偈，打風都打唔甩咁款。
之但係，最近事情嘅發展又急轉直下嘞喎！事緣近年唔多幕前演出嘅「好跳得」，除咗努力開拓飲食生意外，原來亦不忘發展佢嘅「交友事業」。據圈中二五所講，近排已經少見「震震豬」落食店「巡視業務」，取而代之嘅係一個卜卜脆嘅青春少女。「好跳得」好好㗎！每次都拖住人哋隻手上食店嘅 VIP房，吩咐夥計攞晒啲鎮店名菜上嚟，兩個人閂埋房門，咁就兩粒鐘嘞。久而久之，班夥計見呢位 𡃁妹嚟得仲密過「震震豬」，都開始改口叫佢做「阿嫂」㖭！
咁「震震豬」又點呢？可憐嘅佢，仍然係乜都唔知，仲以為自己樣靚身材正，「好跳得」一定飛唔出佢五指山！講真，男人嘅嘢，邊話得埋吖，況且當年「震震豬」咪一樣做過「小三」，仲搞到滿城風雨㖭。呢啲，咪叫因果囉！
全站熱搜
留言列表
