法拉連推兩劇，不過轉頭又返大陸接內地劇做配角搵真銀，明剃樂小姐眼眉，難怪被踢出今年賀壽名單之列。《 FACE》圖片
俾條生路我！（設計對白）
娛聞樂
嫌戲少推劇激嬲樂易玲 陳法拉派大少祝壽補鑊
每年有份獲邀出席 TVB高層樂易玲生日派對的藝員，猶如未來一年得寵指標。上周五晚（ 6月 29日），樂小姐提早慶祝 53歲牛一，即使八號風球下，仍有大班藝人濕住身仆去為她賀壽。
每年就算幾忙都一定為老細贈興的陳法拉，今年卻一反常態，全晚竟然 no show。據知全因她連環推劇激嬲樂小姐，被踢出「賀壽名單」之列。知衰的陳法拉當晚急急派出平日唔愛 social的男友薛世恆做和事老。為樂小姐，薛世恆局住陪壽星女唱歌娛賓，更留到散場至走。呢個男友都算唔話得。
去年尾失落視后後，不忿的陳法拉以「面癱」理由請假足足半年，聲稱返美就醫，推了四十集長劇《名媛望族》，其間卻經常精神奕奕出席活動搵真銀。真病定心病，樂小姐全看在眼裏。「上次法拉推劇，係人都知佢嬲個視后俾 咗杏兒，加上《名》劇個角色戲份少過楊怡，佢覺得公司唔睇佢，咪話請假囉。樂小姐都知佢點諗，試過軟硬兼施叫佢開工，不過法拉就冇理佢。」知情人透露。
今年男友單拖撐場
薛世恆當晚棄用法拉男友身份改以星煥老闆身份出席生日會，更拉埋老婆經理人 Cindy（右）聯手狂樂小姐，又獻唱又隊酒，留到凌晨 5點幾散場先走。相信樂小姐條氣順番唔少。
去年風騷孖住現身
去年中仍聽教聽話的法拉，帶埋男友一齊為樂小姐慶生，不過今年卻遭樂小姐掟入雪櫃。
樂小姐拉隊落樓影大合照，被一班小生花旦簇擁着的樂易玲，意氣風發。
大派利是
有眾多猛男陪伴，樂小姐當晚心情大好，主動落樓向記者大派利是，不過一提法拉名字，她只笑不答，極力迴避。
嘿嘿，醒定啲呀！（設計對白）
睇死公司冇人用
至今年四月，法拉唞夠復工，隨即獲公司安排接拍新劇《法網狙擊》。不過戲份依舊被楊怡騎住，角色要配森美做二線。唔願屈就做配角的她，又再以病辭演。不過正在「養病」期間，法拉屈尾十戮力宣傳即將推出的新唱片，其間更接拍大陸劇《大漠謠》飾演李夫人一角。「法拉拍完《東西宮略》後，覺得自己上到一線，所以唔係做第一女主角 嘅劇，都唔會接。佢私底下仲同人講，話公司根本冇人用，就算揀劇拍， 啲監製都實要用佢。」
可惜，以為坐定粒六的陳法拉，連番推劇終觸怒樂易玲。據知樂一個月前向一眾監製落口諭，短期內不要搵法拉拍劇。收到風的陳法拉自知玩大 咗，原打算在今次生日派對上向樂小姐負荊請罪，可惜連邀請卡都冇收到的她，即使再厚顏，亦冇藉口現身。
去年拍畢《東西宮略》（右圖）後，法拉一直以「面癱」為由請假長休，又唔肯屈就二線而推掉大劇《名媛望族》及《法網狙擊》，戲霸上身，益晒翻版法拉朱晨麗（上圖中）上位。《壹週刊》圖片
《壹週刊》圖片
木獨男獻唱
派對之最
過去樂小姐生日會的鐵腳如徐子珊、吳卓羲和黃宗澤等，今年因拍劇未有出席，人、禮同樣欠奉。雖然星光比往年黯淡，但當晚一樣有大批藝人冒住八號風球到來祝壽，夠晒俾面。
最持久
高海寧 陳展鵬 7pm-5am
派對 7時多開始，兩個派對新丁高海寧和陳展鵬一早到場幫手打點，又買定禮物壽星女，玩到散場先至走，俾足面！樂小姐肯定相當滿意。
最重手
林夏薇 林峯 9pm-2am
有傳樂小姐為就林峯檔期而提早一日搞生日。林峯當晚出手勁豪，送上一大疊連卡佛現金禮券予壽星女，難怪峯少多年來一直係樂小姐最錫愛將，地位從未動搖。 
最快閃
李亞男 王祖藍 11:30pm-12:15am
與女友李亞男結伴到場的王祖藍，校啱時間喺樂小姐切蛋糕時出現，不過櫈都未坐暖就速速閃人，好趕時間喎！ 
最遲嚟
胡杏兒 12:30am-3am
自稱有工作在身的胡杏兒，到樂小姐切完蛋糕，至手拎 Celine紙袋到場，不過總算遲到好過冇到。 
最有心
葉翠翠 9pm-11pm
因為腳傷而正在休養中的翠翠，撐住枴杖都要現身贈興，擦鞋功夫一流。
留言列表
