憑《潛行凶間》彈起嘅湯夏迪獲導演基斯杜化路蘭賞識，欽點為奸角 Bane（左）。湯夏迪更為角色增肥至 198磅，鍛煉出 30磅肌肉。
來路貨
決戰蝙蝠俠
終於來到最終章。
《蝙蝠俠》第 3集《夜神起義》作為系列大結局，預想得到，大製作大堆頭，連帶奸角都幾何級數地邪惡。
嘩，咁蝙蝠俠好危險？總有辦法解決嘅。搵香港警察噴埋胡椒噴霧，應該 sure win。
未介紹先回顧。
上一集《黑夜之神》，葛咸城本來一片平靜，點知小丑中途殺出搗亂。蝙蝠俠決定跟正義檢察官 Harvey Dent聯手對付敵人，但 Harvey遭到小丑陷害，不但變壞成為雙面人，還助紂為虐四處害人。
開講有話：邪不能勝正嘛！蝙蝠俠最終成功制服雙面人，不過考慮到雙面人由正義變邪惡，必定令政府蒙羞，引起群眾混亂。蝙蝠俠惟有隱瞞真相啃晒所有罪名，等大眾繼承 Harvey正義遺志，繼續打擊罪惡。
奸角 Bane曾身受重創，身上裝有嘅特別裝置為止痛而設，吸一吸醒腦提神，索一索舒筋活絡。
係人都知，蝙蝠俠除咗多 high-tech武器外，本身係冇乜技能。何況事隔 8年重出江湖，打架確係冇以前咁醒。值得一提，係今集會繼續以 IMAX鏡頭拍攝，全片約有 50分鐘，比上集多出一倍。
上一集奸角雙面人，表面上「壯烈犧牲」，實則惡貫滿盈。不過蝙蝠俠為顧全大局，毅然食死貓，仲夾埋警長（中）歌頌雙面人嘅正義精神。
除咗新奸角之外，電影保留大部分卡士，基斯頓比爾（右）仍係蝙蝠俠；摩根費曼（左）則係得力助手。
正義復出
第三集《夜神起義》（香港 7月 19日上映）就係由蝙蝠俠成為過街老鼠、銷聲匿跡 8年後講起。
蝙蝠俠做番二世祖，認識身份神秘嘅貓女俠。同一時間，邪惡大隻佬 Bane出嚟搞亂檔。比着以前蝙蝠俠，三兩下手勢就搞掂啦。不過事隔 8年，莫講話五大肌膚問題出晒嚟，體力、戰鬥力都急劇下降。一句到尾，蝙蝠俠都要去廁所、蝙蝠俠都要食飯，都要撩鼻屎……雖然形勢不利，但自己地盤俾人搞喎，蝙蝠俠老虎蟹梗係反擊啦！
安妮夏菲維飾演嘅貓女俠，角色亦正亦邪，同蝙蝠俠有少少曖昧。
貓女俠同奸角 Bane係同一夥。 Bane當時身陷囹圄，貓女俠入獄協助對方逃獄。
安妮自言貓女俠係入行以來最辛苦嘅角色。咁梗係啦，為咗塞得入件緊身衫，安妮一星期操足 5日肌外，仲加大量伸展、跳舞訓練。
最強敵人
回顧經典奸角
《蝙蝠俠》系列由 2005年《俠影之謎》揭開序幕，當中出現過不少經典奸角，趁住大結局前應該要回顧下。
小丑
《黑夜之神》嘅大奸角，喺葛咸城放炸彈，更殺死蝙蝠俠女友。希夫萊德格不久意外濫藥身亡，其表演獲大眾讚賞，被奧斯卡封為「最佳男配角」。
雙面人
雙面人被小丑綁架時，慘被毀了半邊面，性情因此大變，四處搞事。
稻草人
稻草人研究致命毒氣並跟拉阿古合作，企圖控制葛咸市。
影子集團首領拉阿古
本為蝙蝠俠恩師，但拉阿古原來係犯罪集團首腦，兩師徒最後對決。
留言列表
