冇人管到我！（設計對白）
上周三（ 6月 27日），劉美君到商台宣傳新碟，她向記者解釋經已和公司溝通過放假問題，她說：「呢個月咪宣傳囉！」
娛聞樂
請假三個月赴美瘟仔 劉美君玩謝環球
身為環球歌手的劉美君，上周出席電台活動時忽然火起，力斥無綫冇俾錢，將歌手節目的片段製成 DVD發售的行徑如同翻版，更揚言唔怕被無綫封殺。
一向剛烈的劉美君，發炮鬧無綫外，原來連自己公司都唔放在眼內。劉美君新碟本周五（ 6日）出街，環球唱片公司一早部署定谷碟計劃，準備暑假宣傳。但劉一個屈尾十話請三個月假，更義正辭嚴在微博話：「七月頭出唱片，不等於我要留下。」據知劉美君請假和男友到美國遊山玩水，今次環球唔嬲就假。
08年回流返港做番老本行的劉美君，簽約環球後奉行一年一碟制。去年推出發燒碟《 Love Addict》翻唱國語歌，銷量出奇地好。食髓知味，環球於是提議劉美君再出翻唱碟，雙方更一早傾掂數，準備暑假展開連串宣傳計劃，包括兩場小型音樂會、簽唱會等。
環球高層黃劍濤：阿姐，你玩嘢咩！（設計對白）
環球唱片香港區高層黃劍濤（ Duncan）承認劉美君今次新碟只集中在 6月宣傳，他說：「佢係有私事而請假。」
鬼妹仔性格的劉美君，早前曾在微博發表近百字中文，重申自己態度企硬外，更暗示有人迫她做無謂宣傳。
開會不歡而散
做勻四電視台
劉美君出山後， 09年幫過無綫主持《超級巨聲》，不過因四大與 TVB糾紛問題而被飛。加上環球和無綫交惡，劉索性遊走其他電視台，今年 10月還幫王維基拍新劇。
now《一個地球》
到雅蒲島拍攝旅遊節目，意外仆崩鼻。
CTI拍劇
上月和王維基到了鳳崗鎮，為新劇睇景。
有線娛樂台訪問
接受主播區永權（左）訪問大談健身之道。
亞視《亞洲星光大道》評判
做《亞洲星光大道 4》評判兼唱新歌。
掛住拍拖
今年 47歲的劉美君， 09年與細她半年的美日混血兒 Steve撻着，她亦經常將二人拍拖行山（右圖）和出埠旅行的相放上微博，大晒幸福。
低胸鍛煉
近年劉美君愛上運動，每朝早必定抽時間鍛煉兩小時。她經常將自己身穿低胸背心健身和運動紀錄放上微博，其中一張𠌥低身露罅滴汗相，相當誘惑。
攞膽唱 Twins
劉美君周五（ 6日）推出新碟《偷》，全部是粵語翻唱歌。劉當年曾彈 Twins咬字不清，她今次卻揀〈戀愛大過天〉翻唱。〈戀〉派台後，不少網民洗板式在劉的微博留言話難聽。記者聽過該曲，發現劉刻意放輕聲線，騷味略嫌太濃。
新歌飽受過千網友批評，所以劉美君發現有人識欣賞後，便立即回覆，更送簽名 CD回禮。
返美國娶新抱
原來劉美君和第一任丈夫黃泰來所生的兒子將會於美國搞婚禮，因此她才向環球請假。娶新抱固然事大，但劉美君這杯新抱茶也毋須飲足三個月。知情人士說：「佢個仔 9月先娶老婆，請咁耐假，都係想早啲同男朋友喺美國玩啫！」雖然劉美君和美籍男友 Steve拍拖三年，但二人愈來愈癡纏，一向戀愛大過天的劉美君，當然唔放過這次瘟仔機會。
經過長達兩星期的磋商，環球無奈放人，但劉美君就要提早谷碟。記者就此事問過黃劍濤，他說：「佢（劉美君）都有做宣傳，佢係有啲私人事先請假啫。（咩事請假呀？）我唔得閒，開緊會，麻煩你打俾宣傳部。」而宣傳部 Ann則說：「佢（劉美君）做嘢認真，好講求原則。佢係請假，不過之前都有話俾我哋聽嘅！至於係咩事請假，你哋問番佢本人好啲喇！」至於劉美君則否認曾因此事和環球鬧不快，她說：「我同公司合作咗四年，大家有晒共識，唔會唔夠宣傳喎！我好早已經同公司攞假。今次放三個月，係籌備個仔嘅婚事。」
劉美君作風大膽， 82年就跟導演黃泰來結婚生一子一女， 92年離婚。劉 02年再和甄姓男子結婚，並誕下一女，可惜又是離婚收場。《壹週刊》圖片
劉美君男人緣旺盛， 01年曾和尹子維當街勾手指尾，但戀情無疾而終。《蘋果日報》圖片
留言列表
