亞熱帶
新聞之女 柴崎幸
同慣福山雅治、木村拓哉、竹野內豐等型男合作，柴崎幸靚不容置疑，可惜人靚口賤，得罪人多，連累她在《神探伽俐略》第二季由女一變客串，仲同第二季女主角吉高由里子反面。
慘得過柴崎幸對事業唔着緊，「集郵」才是正職，潮男見一個食一個，又偷食唔抹嘴，成日被傳媒影到同男星密會。格衰兼喪溝仔，和木村的新劇《安堂機械人》又被彈左抄右抄，柴崎幸的負面新聞厚過電話簿。
宿敵扮合拍柴崎幸在《神探伽俐略》第二季只在首集出現，負責帶新一季女主角吉高由里子（右）出場。不過由於 fans力撐，電視台加咗一集特別版，由柴崎幸一個孭飛。 
新劇狂抄橋《安堂機械人》講述物理學家被殺，兇手將他的未婚妻柴崎幸列為下一個目標，這時與物理學家外貌一樣的機械人安堂（木村拓哉）出現，守護伊人。故事被指將《未來戰士 2》、《死亡筆記》等作品炒埋一碟，收視不足 20%，不及《半澤直樹》一半。 
本田翼在《安》劇飾演的維修機器人，由於不時從抽屜現身，被指抄《多啦 A夢》。
同木村鬥爆陰毒
柴崎幸負面新聞特別多，她早前曾缺席新劇《安堂機械人》宣傳，搞到老拍檔木村亦忍唔住話：「再同柴崎幸合作，已經覺得佢比以前安分守己好多！」暗寸柴崎幸得罪人多。後來柴崎幸反擊：「以前我係有啲任性，呢幾年都改咗啦！木村拓哉就冇點變，對人一樣咁親切，尤其對女仔仲好溫柔㖭。」擺明話木村鍾意對女仔獻殷勤，兩人互爆陰毒。
《神探伽俐略》第二季原本仍然是柴崎幸做女主角，不過好衰唔衰，柴崎幸同織田裕二去年因為拍《外交官黑田康作》鬧不和，織田同福山雅治老友鬼鬼，於是他在福山面前大打毒針，搞到福山向電視台要求，第二季主角改用 24歲的福山師妹吉高由里子。
柴崎幸遷怒於吉高，仲四圍話吉高係靠陪電視台高層上牀至有主角做。吉高不甘受辱，改口叫 31歲的柴崎幸做「老虔婆」。著名動畫《魯邦三世》耗資 60億日圓（約港幣 4億 7千萬）拍真人電影，柴崎幸和吉高同是女主角峰不二子大熱人選，兩名宿敵又要鬥過。
首遇木村其實在 10年前的《 Good Luck》，柴崎幸同木村已經合作過。木村飾演「日版 Cool魔」（下），柴崎幸就係維修員。 
《魯邦三世》是日本著名動畫，以一對亦敵亦友的男女俠盜為主角。柴崎幸有機會飾演的女主角峰不二子，勝在形象百變，唯一不變是身材爆燈。 
功夫少女回到未紅時，柴崎幸在《東京攻略》做過梁朝偉女助手，後來紅咗，柴崎幸更在周星馳監製的日本片《少林少女》擔正。
潮爆頭飾柴崎幸一向以潮人自居，去年以黑白和服造型現身東京影展，配搭以紙鶴做成的頭飾，平凡中見不平凡。 
拍劇交惡柴崎幸 06年同織田裕二拍《星級大改造》，已經被指唔尊重織田，兩人面和心不和。事隔六年，去年兩人拍《外交官黑田康作》時不但冇收火，織田更懷恨在心想趕絕幸妹。
喜愛雜食
其實柴崎幸溝仔不在乎名氣，只要夠潮，奀星都唔拘。她的獵食名單包括樂隊主音 Issa、演員妻夫木聰、 DJ栗原曉等人，「食材」相當廣泛，而且多次都是涉及三角關係。
04年 玩出禍
被刊登同男友 Issa的密照，戀情因而曝光。不久，宮澤理惠就出招硬撬 Issa，更流出慾照，失威柴崎幸於是怒掟 Issa。
05年 做小三
柴崎幸同妻夫木聰因為拍《 Orange Days》撻着。男方多次出入女方閨房，當時聰仔正印係水着女優香，不過柴崎幸唔介意做小三。
08年 拖到實
被聰仔狠飛後，柴崎幸隨即搭上搖滾組合 Uverworld主音 Takuya。兩人十指緊扣去橫濱睇燈飾，而且三晚都同度春宵，真 happy！
留言列表
