中山美穗淡出後，一直無乜消息。一回歸，是非又來了，一時話佢廿年前同工藤靜香爭仔爭到絕交，一時又話佢飲醉酒，連底都露埋。無單好嘢。

外太空

師奶大戰　中山美穗 VS山口智子

2012年11月08日 ~~ 第1183期香港《壹周刊》

木村收視神話告終？新劇《 Priceless》出埋浴都只錄得 16.9%首播收視，打破歷來最差紀錄。
你估仲係《悠長假期》同《沉睡森林》嘅年代咩？係！當山口智子跟中山美穗兩位師奶復出，我真係以為自己回到 96年、 98年。尤其，當你每晚開電視也見到劉松仁、陳玉蓮、米雪……

《情書》，數數吓原來已經是 95年的電影，小樽都被摧殘到唔同晒，何況係人？

據講，中山美穗真係打算全面復出，仲話想拍《史密夫與史密妻》式喜劇。唔係啩？

中山美穗玩姊弟戀

睇《巴黎戀愛寫真》預告片，真係以為睇緊《日落巴黎》。張國榮加鍾楚紅加張曼玉套 TVB音樂特輯呀！
你點估到，原來係《情書》導演岩井俊二監製，《悠長假期》編劇北川悅史子寫劇本？
Well，自從嫁咗俾小說家後，呢十年，中山美穗人間蒸發，定居巴黎。兩年前，幫老公手，復出拍攝改編老公小說嘅《別了誘情人》，仲拍埋床戲，都唔夠今期同岩井俊二合作咁受矚目。話晒當年《情書》係經典中經典，《悠長假期》編劇又話自己寫足六年至寫好個劇本。埋單，日本上畫第二個星期已經跌出票房榜十大。
因為成 42歲人仲搵 30歲嘅向井理做拍檔？記招上仲話下一齣戲可以合演夫妻？電影講向井理去巴黎旅行，遇上住喺巴黎嘅中山美穗，相處幾日，撻着，姊弟戀，好鬼浪漫。
咁都唔掂？呢個時候，當然要搵嘢賴！俾着係我，就會將所有責任推俾岩井俊二：「都係岩井俊二衰啦，無啦啦話日本政府買釣魚台係挑釁所為，得罪晒日本人，咪連累咗套戲囉！
「一定同我老咗無關㗎！」係咪好合理先？

跟老公定居巴黎，《悠長假期》編劇順勢將個故事搬去巴黎，但係搵來細中山美穗十二年的向井理齊齊談情，你可能情願睇楊怡咬劉松仁。

上次拍《別了誘情人》有突破尺度的床戲，今次不靠這項作賣點了。因為，今次不是改編老公本小說了。

然後，去巴黎取景，跟旅遊特輯的，沒分別。嗯……

山口智子阿姑插水

一退退咗十六年，仲要喺身處《悠長假期》高峰嗰陣退，我確實好佩服山口智子。
傳聞老闆娘開的雜貨店生意不景，被迫復出。嘩，《悠長假期》嗰時 31，一轉眼， 47，後生少少嗰輩分分鐘連山口智子係邊個都未知。復出劇《 Going My Home》，台前幕後星光熠熠，用上《下一站天國》電影導演是枝裕和拍劇集，男主角係《羅馬浴場》大紅嘅阿部寬，女配角係宮崎葵，山口智子扮演烹飪節目主持，似李司棋的角色般，陪老公找尋傳說中的生物。結果，第二集收視得番 8.9%……然後，有未經證實消息指山口智子喺街頭狂嘴男人，而個男人唔係佢老公唐澤壽明。
葉玉卿女士，我勸你如果不等錢開飯，還是留在超級市場好了。

《 Going My Home》中，阿部寬扮演老公，以為老豆有私生女，於是帶老婆齊齊調查，坊間對劇集的評價是悶。

《悠長假期》呀，《 LV》呀，嗱嗱臨拎番套老翻出嚟煲啦。

好多人睇完《 Going My Home》，覺得山口智子戲份少，角色無得發揮，但係 keep得算好。夠啦，同期有劇出嘅鈴木保奈美，俾人話殘到似阿婆呀！

如果你覺得木村拓哉熒幕情人是綾瀨遙，你可以揭過本頁不看了。山口智子於 96年拍完大爆的《悠長假期》，竟然忍心退出，做唐澤壽明老婆就算。比陳慧珊、關詠荷堅幾倍。