最搶眼的火車座位，遠觀頗討好。

試食王

咪搞小忌廉啦！

2012年11月08日 ~~ 第1183期 香港《壹周刊》

都要怪海港城 100個叮噹搞得有聲有色，童年時代的日本漫畫主角，市場潛力驚人。 MegaBox新日本料理店日和號就用呢招，事先張揚每幾個月轉換不同主題，新張頭炮︰廿幾年前所有小妹妹都熱愛的小忌廉。唔係什麼周年亦冇特別事件，將家陣唔算好 hit的角色翻炒出來做主角，唔緊要，有少少綽頭，就可以製造話題。

餐廳有特定主題，客人自然有一定期望。去到餐廳門口，見到一架印有小忌廉圖案的火車，遠睇幾靚幾特別。行入去睇真啲，呆一呆呀！火車卡位只不過用幾條鐵枝搭一個框架，掛上幾個膠手環當扶手，椅背印圖案再貼幾張海報，就完事。主題餐廳喎，幾張海報幾幅畫就算？ Figure都冇個？搵唔到手稿展覽可以理解，放幾支神仙棒、小星環，係咁意砌幾本漫畫係咪好難？ Fans專程來捧場的話，應該嬲爆。奇怪地餐廳裝有投影機，旁邊另設一個小台，不過暫時乜都冇，咁係咪遲啲先有嘢睇？


其他座位放得頗密，火車以外便不太見小忌廉踪影，旁邊的小型舞台預備擺展覽？


近睇，就係鐵通加膠手環，不如正正經經砌啲舒服卡位算啦。

感覺，就係一間平價日本料理，用幾幅漫畫做裝飾，然後話你知咁就叫主題餐廳。到下一個主題？換晒啲畫咪搞掂囉，香港地做生意呀，最緊要快！座位放得逼，格調似茶餐廳。菜式以壽司、拉麵等為主，款式算多，部分創新，北京填鴨卷、鵝肝三點盛等，但係北京填鴨是煙鴨胸加片京葱、三點盛的鵝肝片大約有 2mm厚。午餐$46起，我揀最豪的鐵板三文魚扒拼帆立貝，根本就是雪藏貨煎得很乾。兩個人花費三百幾，食物質素唔合格。服務？仲嬲。一小時內，全場完全冇侍應主動加茶，要求加茶，應完一聲，冇件事。忘記送上餐飲，追完，又係冇件事。埋單仲好笑，送一張儲印仔卡，問佢儲印換啲咩？竟然答︰「詳情你自己睇。」喺一間逼到似茶餐廳的日本料理，要兩個人食三百幾蚊一餐？難怪翠華搞到上市啦！唔好食都算，茶都冇得飲多啖，問多句都嫌我煩？唔好以為砌架火車、改過個名、買起小忌廉做話題，客人就會送上門。就算午市大把附近 office客，都唔代表大家甘願接受你咁樣價錢咁樣質素。希望只係第一日開張場面混亂，未 ready會改進，不如先處理好食物和服務水準，俾啲誠意客人睇，放過小忌廉啦。而當然，我得到的儲印卡上面係冇寫換購詳情的。


穴子沙律太鼓壽司$28
鰻魚捲着壽司飯，上面加些蟹子沙律，味道算正常。


海膽玻璃蝦卷$28
半溶見到粒粒的海膽，賣相差過超市壽司。


鵝肝三點盛$52
因為只售$52，所以得三塊 2mm厚的鵝肝是可以理解的。


北京填鴨卷$22
煙鴨胸加一片京葱，同北京填鴨冇關係的。


鐵板餐$125
鐵板燒三文魚扒乾得似柴皮，帆立貝雪藏味重，蝦天婦羅的蝦冇乜味，唯一可取是分量十足。

評分

味道：★★
環境：★
價錢：★★
服務：★ 

日和號日本料理
地址︰九龍灣宏照道 38號 MegaBox 10樓 5號鋪
電話︰ 2359 0025

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

高貴珠寶下午茶

Qeelin
下午茶每位$328/兩位$626

如果鍾意在 102樓歎 tea的豪華，只限 11月供應的全新珠寶 high tea，你會更熱愛。酒店跟珠寶品牌 Qeelin合作，下午茶甜點以品牌不同系列為靈感，例如著名的 Wulu葫蘆系列，變成 Wulu牛油蛋糕配紅桑子奶油； Bo Bo熊貓做成朱古力，高貴又可愛。鹹點的鵝肝慕絲迷你熱狗等，用料也上乘。歎下午茶仲可以換 Qeelin小禮物，好難抗拒。

The Lounge& Bar
地址︰九龍柯士甸道西 1號香港麗思卡爾頓酒店 102樓
電話︰ 2263 2270
供應時間︰ 11月份星期一至星期日 3pm-6pm 

去赤柱捧小廚神場

11月， Wine& Dine停不了，赤柱廣場於 11月週末再次舉辦國際美食音樂節，除了多位名廚即席示範之外，今年更請來一眾媽媽最愛的《 Junior MasterChef》澳洲小廚神 Jack Lark和芬蘭冠軍 Ida，另外還有韓國人氣搞笑音樂麵包騷 Pang Show首度來港表演，節目豐富有睇頭。

赤柱國際美食音樂節 2012
地點︰赤柱廣場露天廣場
日期︰ 11月 10、 17、 24及 25日 12nn-7pm（小廚神於 24及 25日示範）　查詢︰ 3168 0080 

撰文、攝影：試食王