屋企望落乾淨舒適，查實干擾內分泌的「整蠱兵團」和致癌「毒氣魔王」無聲無息地由傢俬、牆壁殺出，混入塵中，侵襲人體，更專攻小朋友、甚至寵物， Jessica話以後會慎選傢俬。

頭號健康

家居隱形惡魔大通緝

2012年11月08日 ~~ 第1183期 香港《壹周刊》

香港出晒名空氣污染嚴重，咪以為將屋企打掃乾淨，閂埋門窗開冷氣，就可以置身事外。專家話，一旦裝修用錯料、買錯傢俬，屋企一枱一櫈都會釋放有毒物質，混入細小塵粒，吸入肺部，長遠影響內分泌、呼吸道等健康。肉眼不見不代表乾淨，魔鬼藏在細節裡，以下由傢俬、廚房及清潔用品中，緝拿暗藏殺機的「毒氣魔王」和「整蠱兵團」。

整蠱兵團

成員：塑化劑、溴化阻燃劑、全氟化合物
罪狀：干擾內分泌

毒氣魔王

成員：甲醛、 VOCs
罪狀：致癌物質

八年前， Jessica為避開馬路大塵，由大圍市區搬入元朗八鄉村屋。遠離市區，人煙稀疏，以為可打造一塵不染的安樂窩。信心十足地參加綠色和平的家居灰塵測試，點知驗出可模仿人體荷爾蒙、干擾內分泌系統的「整蠱兵團」──塑化劑、溴化阻燃劑、全氟化合物。「驗塵結果真係嚇親我，我屋企好少用膠，點會有塑化劑？」罪魁禍首最大機會是客廳張人造皮梳化。
「整蠱兵團」在外國非常出名，城大生物及化學系副教授林漢華解釋：「它們叫環境激素，分別有軟化塑膠、阻燃、防水防污功能，廣泛應用到生活各層面的消費品上。」綜合統計學及病理上的研究，「整蠱兵團」可擾亂人體內分泌系統，長遠可令男性精子數目及活躍度減少，造成不孕，甚至令女仔早熟、男仔痴肥及胸部發育旺盛等。「小於十微米的家居塵就已經好似一架巴士，載住不同化學物質穿過鼻腔，進入肺部。」


裝修用的油漆和蔗渣木板多數含甲醛，刺鼻又澀眼。專家提醒，裝修和買木傢俬後記得預留兩至三星期「過冷河」時間，盡量讓甲醛吹走，並切忌邊住邊裝修。


綠色和平項目主任江卓珊指，早前在中國及香港十四個家庭抽取灰塵樣本，均驗到三大有毒化學物質，包括塑化劑、溴化阻燃劑、全氟化合物。

買錯梳化惹毒入屋

城大林漢華教授指，歐美的環保法例要求嚴格，因此歐美傢俬的甲醛、溴化阻燃劑等化學物成分會較符合安全標準。

「人造皮，其實咪即係膠。」林漢華教授解釋：「將 PVC或 PU的塑膠物料軟化，令其質感似皮，就要用塑化劑。」 Jessica的梳化在深圳訂造，「一來平，二來款式多又靚， size仲可以跟足我要求，點知出事。我買完已好驚，因為朋友在深圳買張床褥爛咗，見裡面有紙巾、乾草、木碎等，好恐怖，原來張床褥係用垃圾壓出來。」
Jessica家中養有兩狗一貓，經常在梳化跑跑跳跳，久而久之布滿刮痕，「舊了或刮爛的梳化，裡面加了『阻燃』化學物的乳膠會露出來。乳膠經防火處理，一旦火災發生時可拖延毒氣排放。但這種溴化阻燃劑同人體甲狀腺中的碘好相似，可以干擾甲狀腺，影響小朋友發育。」林漢華教授解釋。 

甲醛跟住木傢俬

知道梳化是家中毒塵元兇， Jessica諗住換張木座椅，但買木傢俬都要好小心，否則好易引來「毒氣魔王」──致癌物質甲醛入屋。生產力促進局環境管理高級顧問周錦文就接過類似個案，「曾經有一個退休老人家，難忍屋企陣刺鼻氣味，打來求助。我上去睇，一入去已聞到一陣濃烈氣味，差啲頂唔順，量度完發現甲醛含量超標三倍。原來因為佢屋企剛剛裝修完，訂造了成套入牆木櫃，但甲醛用得太多，最終要將所有新櫃拆走。」
理工大學土木及結構工程學系教授李順誠更警告：「買木傢俬千祈唔好貪平，頭三個月甲醛釋放出來好大陣味，雖然用耐咗會減少排放，但唔會完全消失，未來十年二十年都會跟住你。」
所以，周錦文建議買價錢較貴的實木傢俬，「實木傢俬通常由原條木材鋸出來，不似蔗渣板要用大量含甲醛膠水將木成形。」




坊間愈來愈多低揮發性的環保油漆、膠水，買前睇清楚標籤是否寫住「 low voc」或「 zero voc」（上圖），價錢一般比傳統裝修物料貴二至三成。

通緝家居惡魔

資料提供：綠色和平、室內空氣質素資訊中心、香港城市大學生物及化學系副教授林漢華 

油漆散毒氣

除木傢俬之外，油漆的刺鼻氣味都來自甲醛，「好多人以為，單位新裝修完有陣油漆味係正常，但呢陣味根本不一定要忍。如果用水性油漆、低排放裝修物料，可以做到無味。建議市民向裝修及傢俬公司要求選用低排放物料，但要白紙黑字寫清楚，以備貨不對辦時仍可追究。」
有研究塵粒的李順誠教授補充：「港人鍾意開冷氣打邊爐，用支裝 gas作為燃料，會釋出有毒氣體，混在塵中，自己吸番入肺，建議改用電磁爐。除打邊爐外，點蚊香、燒香等都最好避免，進行時亦要開窗及抽氣扇，保持空氣流通。」


屋企用易潔鑊煮食，緊記落油以避免過熱而釋放有害物質。煮食時盡量開窗、抽氣扇，並建議改用無火煮食。


理大設「塵粒分析儀」，李順誠教授指，理大會定期到路邊及室內地方抽取塵粒化驗，往往驗出含重金屬及化學物質。

吸煙殺蟲致癌

吸煙、噴殺蟲水時，唔開窗同樣是危險動作，周錦文說：「二手煙釋放的不只甲醛，仲有好多致癌物質。」據環保署資料顯示，二手煙中所含的粒子好危險，因為可在停止吸煙後，仍停留在空氣中數小時。
「而殺蟲水內含 VOCs，在密閉空間殺曱甴，同時都『殺』埋人。建議用水性的殺蟲劑或曱甴屋。」李順誠教授說。
講到廚房潛伏的毒物，林漢華教授立即諗起塑膠包裝。世 衞證實，塑膠包裝的化學物有機會轉移到食物，只是多與少的問題。唯一的可行辦法是，「縮短用塑膠包裝的時間，例如買返屋企後立即將食物換到一個玻璃或淺色的瓷質器皿內。
「另外仲要注意不要俾生產商誤導，例如膠盒標示『 Microwave Safe』，只代表將膠盒放入微波爐叮熱時，膠盒唔會熔或變形，但在加熱過程中，塑化劑和色素等化學物質有機會釋放出來。」

易潔惹的禍

標榜不易黐底的易潔鑊為煮食帶來方便，難怪幾乎家家必備。所有不黐底的鑊、鑊鏟表面，都塗有一層好薄的全氟化合物，林漢華教授指出：「過去曾有研究驗出美國人血液裡含有全氟化合物，這種物質雖然可隨尿液排出，但含量卻有上升趨勢。
「易潔鑊雖然方便，但切忌過熱。如溫度超過攝氏二百至二百四十度，塗層就會分解，可能釋放有害物質。一般煤氣爐開到見到藍色火，溫度已高達攝氏九百度，落油後，溫度會下降至唔超過攝氏二百度。所以，唔乾煎就無大問題。」易潔鑊含有的全氟化合物到底有咩害處，林漢華教授解釋：「對肝不好，影響對脂肪的新陳代謝，懷疑會引致肝癌。媽媽會傳俾胎兒，令胎兒體重比正常輕，影響發育、內分泌等。」

邊清潔邊放毒

坊間清潔劑、漂白水多數無寫明成分，可能含有 VOCs並具腐蝕性，使用時緊記開窗、抽氣扇並戴手套。

既然屋企有毒塵，想保持室內環境清潔，自然要勤加打掃。但亂用清潔劑，反而會釋出有毒致癌氣體，真係愈描愈黑！
究竟點揀清潔劑，綠色和平項目主任江卓珊指，現時香港法例只規定醫療產品要寫成分，其餘產品包括清潔劑、化妝品、傢俬等都唔一定要寫。因此，市民購買這類產品時應注意：
•不買帶香味清潔劑，因為人工香精可能含干擾內分泌的化學物。
•不買標註含抗菌殺菌功效產品，可能含致癌甲醛。
•不要將含氯漂白劑和其他清潔用品混合，可能釋放有毒氣體。
•不要隨意更換產品容器，可能同新容器產生化學反應，成有害物質。
資料提供：綠色和平 

話你知

免費下載由香港綠色和平製作的《無「毒」消費品指南》，可從家居裝修及傢俬、嬰兒用品、廚具及清潔用品、化妝品等方面了解日常生活中的有毒化學物，並作出適當選擇。
網址： http://www.greenpeace.org/hk keyword我們的工作→污染防治→調查報告→無「毒」消費品指南

環保署轄下的「室內空氣質素諮詢中心」提供家居污染物、空氣質素改善建議及服務供應商等資料，並設環保建材及傢俬示範，以供參考。
網址： http://www.iaq.gov.hk 

撰文：吳穎湘
攝影：吳超德
插圖：朱桂葉