818 娛樂八掛大放送★

好姨廣場

陳慧琳忙做 老豆陪蝦餃仔親子郊遊

近年好多學校都著重親子教育，學校有呢個要求，都係希望家長係仔女成長歷程中，多親身參與同溝通。近年唔少藝人結婚後都會生小朋友，為唔想仔女咁細個離開自己去第二度讀書，唯有俾佢去貴族學校。但呢學校對明星家長要求仲高，有個天王為仔女鋪路入學校去見校長時，校長好嚴肅問佢可唔可以抽到時間，陪仔女返學校參加親子活動，天王為入到搶手名校，點都硬住頭皮都要話「可以」。

樂壇天后陳慧琳(Kelly)婚後生兩個仔，大仔劉昇(蝦餃仔)舊年開始入讀紅磡名牌幼稚園St. Catherine’s 國際英文幼稚園。第一日返學，Kelly同老公劉建浩接返學，但之後都係見到劉建浩陪仔返學多。鬼咩，Kelly唔想個仔成為焦點，加上工作排得密密麻麻，但遇到囝囝上台表演，佢都會抽到時間去睇。

早前蝦餃仔學校搞親子遊，Kelly派老公請假陪蝦餃仔去。兩父子著住T恤短褲，爸爸負責背囊出發。見坐靠窗蝦餃仔對街上事物都好好奇，邊望邊做出古怪表情。雖然陪仔女去旅行多數都係媽咪，但劉建浩似乎同其他家長都好熟絡，大家有傾有講。下午校車返到學校解散，劉建浩拖住蝦餃仔去附近停車場，番架七人車，車寶貝仔返屋企。好姨今次真係要讚蝦餃仔，佢平日返學、放學都要扭爸爸或者工人抱抱。但當日蝦餃仔全程自己行，經過大半年蝦餃仔已經大個啦！

其實蝦餃仔有個天后級媽咪，要過正常小朋友生活實在係難，但好彩仲有個爹頂住，Kelly先可以安心去做。